ខេត្តកណ្តាល ៖ បន្ទាប់ពីមានការភ្ញាក់ផ្អើលឃើញបុរសម្នាក់ដេកស្លា.ប់នៅក្នុងរថយន្តឡង់គ្រីស្ស័រ ពណ៌ត្រេអ៊ី ពាក់ស្លាកលេខខេមរភូមិន្ទ០២-២-៥៣០៩ នៅក្បែរចេតិយក្នុងទីធ្លាវត្តបទុមសាគរ ហៅវត្តក្របៅ ស្ថិតនៅភូមិព្រែកតាពៅ សង្កាត់ដើមមៀន ក្រុងតាខ្មៅ កាលពីវេលាម៉ោង១២ថ្ងៃត្រង់ ថ្ងៃទី១៨ ឧសភា ប៉ូលិសព្រហ្មទណ្ឌកម្រិតធ្ងន់បាន
ខេត្តកណ្តាល ៖ បន្ទាប់ពីមានការភ្ញាក់ផ្អើលឃើញបុរសម្នាក់ដេកស្លាប់នៅក្នុងរថយន្តឡង់គ្រីស្ស័រ ពណ៌ត្រេអ៊ី ពាក់ស្លាកលេខខេមរភូមិន្ទ០២-២-៥៣០៩ នៅក្បែរចេតិយក្នុងទីធ្លាវត្តបទុមសាគរ ហៅវត្តក្របៅ ស្ថិតនៅភូមិព្រែកតាពៅ សង្កាត់ដើមមៀន ក្រុងតាខ្មៅ កាលពីវេលាម៉ោង១២ថ្ងៃត្រង់ ថ្ងៃទី១៨ ឧសភា «បុរសម្នាក់ស្លាប់ក្នុងរថយន្តឡង់គ្រីស្ស័រ សង្ស័យបម្រុងប្លុងចោល» ប៉ូលិសព្រហ្មទណ្ឌកម្រិតធ្ងន់បាននាំខ្លួនអ្នកបើកបររថយន្តនោះមកសាកសួរដើម្បីរកចម្លើយពិតប្រាកដពីការទាក់ទិននឹងមូលហេតុដែលមានមនុស្សស្លាប់នៅក្នុងរថយន្តនោះ ។
តាមព័ត៌មានពីមន្ត្រីប៉ូលិសបានឱ្យដឹងថា អ្នកបើកបររថយន្តនោះឈ្មោះវង់ ដួងតារ៉ាវិវឌ្ឍន៍ ភេទប្រុស អាយុ៣៦ឆ្នាំ រស់នៅផ្ទះលេខ៤២Eo ផ្លូវលេខ១៩ សង្កាត់ជ័យជម្នះ ខណ្ឌដូនពេញ រាជធានីភ្នំពេញ ជាមន្ត្រីផ្នែកស្រាវជ្រាវទីចាត់ការបុគ្គលិកអគ្គបញ្ជាការឋានន្តរស័ក្តិអនុសេនីយ៍ឯក និងមានមុខរបរមួយទៀត ជាមេជាងសំណង់។ ចំណែកជនរងគ្រោះត្រូវបានស្គាល់អត្តសញ្ញាណហើយគឺ ឈ្មោះសៀង ហាំងគាង ភេទប្រុស អាយុ៣២ឆ្នាំ ស្រុកកំណើតនៅភូមិស្រែស្ពៃ ឃុំគងជ័យ ស្រុកអូររាំងឪ ខេត្តកំពង់ចាម មុខរបរជាជាងកាត់កញ្ចក់ ។ ជនរងគ្រោះត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី កាលពីយប់ថ្ងៃទី១៨ ឧសភា ។
ការស្លាប់របស់ជនរងគ្រោះនេះត្រូវបានឈ្មោះវង់ ដួងតារ៉ាវិវឌ្ឍន៍ ជាអ្នកបើកបរបានប្រាប់ប៉ូលិសថា អ្នកទាំងពីរធ្លាប់ស្គាល់និងរាប់អានគ្នា ព្រោះជាជាងដូចគ្នា ហើយនៅល្ងាចថ្ងៃទី១៧ ឧសភា វង់ ដួងតារ៉ាវិវឌ្ឍន៍ និងជនរងគ្រោះបានជួបគ្នាហើយបបួលគ្នាមកពិភាក្សាពីរឿងធ្វើពិតានផ្ទះឱ្យគេ។ បន្ទាប់ពីពិភាក្សាគ្នារួចហើយ ក៏បានបបួលគ្នាទៅហូបអាហារនៅម្តុំផ្សារឌុលម៉ិច ដោយហូបស្រាបៀរអស់ចំនួន៦ដប រហូតដល់ម៉ោងជាង១២រំលងអធ្រាត្រក៏បានជិះរថយន្តជាមួយគ្នា ដើម្បីរកផ្ទះសំណាក់ស្នាក់នៅ ប៉ុន្តែរកមិនបានក៏បានបើករថយន្តនោះមកតាមផ្លូវវ៉េងស្រេងម្តុំបុរីពិភពថ្មី ហើយនាំគ្នាដេកក្នុងរថយន្តនោះទាំងពីរនាក់ គឺនៅខាងមុខផ្ទះល្វែងម្តាយក្មេករបស់ឈ្មោះវង់ ដួងតារ៉ាវិវឌ្ឍន៍។ ពេលដេកនៅក្នុងរថយន្តនោះគេមិនទាន់ពន្លត់ម៉ាស៊ីនរថយន្តទេ បញ្ឆេះឱ្យត្រជាក់ ទើបពន្លត់ សំរាន្តលក់រហូតដល់ម៉ោង៩ព្រឹក ថ្ងៃទី១៨ ពេលភ្ញាក់ពីដំណេកក៏បានហៅឈ្មោះសៀង ហាំងគាង (ជនរងគ្រោះ) មិនព្រមភ្ញាក់ក៏ចាប់អង្រួនខ្លួន ស្រាប់តែរឹងស្តូកគឺ ស្លាប់បាត់ទៅហើយ ។ ពេលនោះខ្លួនភ័យស្លន់ស្លោរពេក មិនហ៊ានប្រាប់គេឯងទេ ក៏សម្រេចចិត្តដឹកជនរងគ្រោះមកកន្លែងធ្វើចេតិយនៅវត្តបទុមសាគរ ក្រុងតាខ្មៅ បំណងយកសពមកទម្លាក់ចោលនៅក្នុងព្រៃក្បែរនោះ ប៉ុន្តែដោយសភាពការណ៍មិនអំណោយឱ្យ ព្រោះមានយាយជី តាជីនៅក្បែរនោះ មិនហ៊ានយកសពទម្លាក់ចោលក៏បានរាយការណ៍ប្រាប់សមត្ថកិច្ច និងបានប្រឌិតរឿងថា ជនរងគ្រោះបានស្លាប់នៅក្នុងរថយន្ត ខណៈមកដេកចាំគ្រឿងសំណង់ធ្វើចេតិយទៅវិញ ។
ប៉ូលិសបច្ចេកទេសដែលទៅពិនិតិ្យសាកសពបានឱ្យដឹងថា ជនរងគ្រោះស្លាប់ដោយសារគាំងបេះដូង ប៉ុន្តែគ្រូពេទ្យដែលពិនិត្យសាកសពដែរនោះ និយាយថា ជនរងគ្រោះស្លាប់មានបែកពពុះមាត់ ដោយសារមានជាតិពុលនៅក្នុងខ្លួន នេះជាការសន្និដ្ឋានជំហានដំបូងប៉ុណ្ណោះ។ បើទោះជាបែបណាក្តី អ្នកបើកបររថយន្តឈ្មោះវង់ ដួងតារ៉ាវិវឌ្ឍន៍ មិនត្រូវបានឃុំខ្លួនទេ គឺ ប៉ូលិសកំពុងធ្វើការស្រាវជ្រាវជាបន្តទៀតដើម្បីរកភស្តុតាង និងសាក្សីទាក់ទិននឹងការស្លាប់នេះ ព្រោះហាក់បីដូចជានៅមានអាថ៌កំបាំងច្រើនជាងនេះទៀត ៕
ចែករំលែកព័តមាននេះ