រាជធានីភ្នំពេញ ៖ រថយន្តដឹកអ្នកដំណើររបស់ក្រុមហ៊ុនពន្លឺអង្គរខ្មែរបានបើកបុកម៉ូតូមួយគ្រឿងបណ្តាលឱ្យមនុស្ស២នាក់ស្លា.ប់ភ្លាមៗនៅនឹងកន្លែង និងម្នាក់ទៀតរងរបួសធ្ងន់ត្រូវបញ្ជូនទៅសង្គ្រោះនៅមន្ទីរពេទ្យកាលពីវេលាម៉ោង២និង៤៥នាទីរសៀលថ្ងៃទី១៩ ឧសភា ២០១១ លើផ្លូវជាតិលេខ៥ ស្ថិតក្នុងភូមិដួង សង្កាត់សំរោង ខណ្ឌសែនសុខ
រាជធានីភ្នំពេញ ៖ រថយន្តដឹកអ្នកដំណើររបស់ក្រុមហ៊ុនពន្លឺអង្គរខ្មែរបានបើកបុកម៉ូតូមួយគ្រឿងបណ្តាលឱ្យមនុស្ស២នាក់ស្លាប់ភ្លាមៗនៅនឹងកន្លែង និងម្នាក់ទៀតរងរបួសធ្ងន់ត្រូវបញ្ជូនទៅសង្គ្រោះនៅមន្ទីរពេទ្យកាលពីវេលាម៉ោង២និង៤៥នាទីរសៀលថ្ងៃទី១៩ ឧសភា ២០១១ លើផ្លូវជាតិលេខ៥ ស្ថិតក្នុងភូមិដួង សង្កាត់សំរោង ខណ្ឌសែនសុខ ខណៈយានយន្តទាំង២នេះ ធ្វើដំណើរបញ្ច្រាសទិសគ្នា ហើយបុកគ្នាពេញទំហឹង ។
យោងតាមសម្តីរបស់សមត្ថកិច្ចខណ្ឌសែនសុខបានឱ្យដឹងថា មុនពេលកើតហេតុមានម៉ូតូ១គ្រឿង ម៉ាកឌ្រីម C125 ស៊េរី២០១១ ពណ៌ខ្មៅ ពាក់ស្លាកលេខ ភ្នំពេញ 1AJ-3967 ជិះគ្នា៣នាក់ ក្នុងនោះមានក្មេងប្រុសម្នាក់ផង បើកពីជើងទៅត្បូងលើកំណាត់ផ្លូវជាតិលេខ៥ ក្នុងគោលបំណងយកម៉ាស៊ីនចាក់ VCD ទៅជួសជុល ស្រាប់តែមកដល់កន្លែងកើតហេតុ ក៏មានរថយន្តក្រុង១គ្រឿងរបស់ក្រុមហ៊ុនពន្លឺអង្គរខ្មែរបើកពីត្បូងទៅជើង (បញ្ច្រាសទិសគ្នា) មកបុកចំពីមុខពេញទំហឹង បណ្តាលឱ្យក្មេងប្រុស១នាក់ ត្រូវរថយន្តកិនបែកខ្ទេចខ្លួនស្លាប់ និងបុរសម្នាក់ទៀតបោកក្បាលស្លាប់ភ្លាមៗនៅនឹងកន្លែងចំណែកម្នាក់ទៀតរងរបួសធ្ងន់ត្រូវបញ្ជូនទៅសង្គ្រោះនៅមន្ទីរពេទ្យ មិនដឹងថា យ៉ាងម៉េចយ៉ាងម៉ានោះទេ?
សមត្ថកិច្ចនិយាយថា ជនរងគ្រោះទាំង៣នាក់គឺ១-ក្មេងប្រុសឈ្មោះស៊ឹម ស៊ីដេត អាយុ១២ឆ្នាំ (ស្លាប់) ស្នាក់នៅភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្តាល ២-ឈ្មោះទិត ទឹម ភេទប្រុស អាយុ២៦ឆ្នាំ ស្នាក់នៅភូមិពោធិមង្គល ឃុំព្រែកតាទែន ស្រុកពញាឮ ខេត្តកណ្តាល (ស្លាប់) និង៣-មិនទាន់ស្គាល់ឈ្មោះទេ ព្រោះពេលរងគ្រោះត្រូវសមត្ថកិច្ចចាត់បញ្ជូនទៅសង្គ្រោះនៅមន្ទីរពេទ្យភ្លាមៗបាត់ទៅហើយ។ ចំណែករថយន្តដែលបង្កហេតុត្រូវសមត្ថកិច្ចខណ្ឌសែនសុខយកទៅរក្សាទុកដើម្បីរង់ចាំដោះស្រាយតាមផ្លូវច្បាប់ ៕
ចែករំលែកព័តមាននេះ