រាជធានីភ្នំពេញ ៖ លោកឧកញ៉ា អ៊ឹង ម៉េងជឺ បានប្រគល់រថយន្តមួយគ្រឿងប្រភេទហ៊ីយ៉ាន់ដាយ ដល់អធិការដ្ឋាននគរបាលខណ្ឌសែនសុខ ដើម្បីទុកបម្រើការងារក្នុងអង្គភាព។ ពិធីប្រគល់-ទទួលរថយន្តនេះធ្វើឡើងនៅវេលាម៉ោង១១ព្រឹក ថ្ងៃទី១៩ ឧសភា ឆ្នាំ២០១១ នៅឯគេហដ្ឋានរបស់លោកឧកញ៉ា ស្ថិតនៅសង្កាត់ភ្នំពេញថ្មី ខណ្ឌសែនសុខ ។
លោកឧកញ៉ា អ៊ឹង ម៉េងជឺ បានមានប្រសាសន៍ថា ដោយមើលឃើញការខ្វះខាតរបស់អធិការដ្ឋាននគរបាលខណ្ឌសែនសុខ ដែលមានរថយន្តសម្រាប់ធ្វើសណ្តាប់ធ្នាប់ចាស់ទ្រុឌទ្រោមនោះ លោកឧកញ៉ា បានទិញរថយន្តប្រភេទខាងលើដែលមានតម្លៃ៥.០០០ដុល្លារ ប្រគល់ជូនអធិការដ្ឋាននគរបាល ដើម្បីទុកប្រើប្រាស់ក្នុងការងារ ។ លោកឧកញ៉ា បន្តថា លោកធ្លាប់ឧបត្ថម្ភប្រាក់ជាច្រើនក្នុងការសាងសង់អធិការដ្ឋាននគរបាល និងទីបញ្ជាការកងរាជអាវុធហត្ថថ្មី ដែលស្ថិតក្នុងសង្កាត់ភ្នំពេញថ្មីថែមទៀតផង ។
លោកម៉ក់ ហុង អធិការនគរបាលខណ្ឌសែនសុខ ដែលជាអ្នកទទួលយករថយន្តខាងលើបានថ្លែងអំណរគុណដល់លោកឧកញ៉ា អ៊ឹង ម៉េងជឺ ដែលមានសន្តានចិត្តល្អជួយឧបត្ថម្ភរថយន្តសម្រាប់សមត្ថកិច្ចបម្រើការងារជូនប្រជាពលរដ្ឋ។ លោកសូមជូនពរឱ្យលោកឧកញ៉ា និងក្រុមគ្រួសាររកស៊ីមានបានក្នុងមុខរបរសព្វថ្ងៃឱ្យកាន់តែរីកចម្រើនថែមទៀត៕
ចែករំលែកព័តមាននេះ