អ្នកទិញផ្ទះ «បុរីទ្រីគីមចំការដូងគម្រោងទី១០» ផ្ទុះការតវ៉ាជាលើកទី២
- ភ្នំពេញ
រាជធានីភ្នំពេញ ៖ ក្រុមអ្នកទិញផ្ទះ«បុរីទ្រីគីមចំការដូងគម្រោងទី១០» ចំនួនជាង៥០គ្រួសារបាន
រាជធានីភ្នំពេញ ៖ ក្រុមអ្នកទិញផ្ទះ«បុរីទ្រីគីមចំការដូងគម្រោងទី១០» ចំនួនជាង៥០គ្រួសារបានលើកគ្នាបន្តធ្វើការតវ៉ាជាលើកទី២ទៀតនាព្រឹកថ្ងៃទី២ ខែវិច្ឆិកាឆ្នាំ ២០២៣ នៅមុខបុរីខាងលើ ដែលមានទីតាំងស្ថិតនៅក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ។
ការផ្ទុះការតវ៉ាជាលើកទី២នេះក្រោយពេលទទួលដំណឹងថា ម្ចាស់បុរីត្រូវម្ចាស់ដីប្ដឹងសមត្ថកិច្ចចាប់ខ្លួនដាក់ពន្ធនាគារ ហើយម្ចាស់ដីចង់លុបបំបាត់កិច្ចសន្យាទិញនិងលក់រវាងពួកគាត់និងម្ចាស់បុរីចោលថែមទៀត ហើយការតវ៉ាកាលពីលើកមុនក៏មិនទាន់មានដំណោះស្រាយនៅឡើយ។
ក្រុមអ្នកតវ៉ាខាងលើបាននិយាយថា ការប្រមូលផ្ដុំគ្នាធ្វើការតវ៉ានាពេលនេះ ពួកគាត់មានបំណងចង់ពន្លឿនឲ្យអាជ្ញាធរជួយដោះស្រាយជូនពួកគាត់ឲ្យបានឆាប់ និងធ្វើការស្នើឱ្យភាគីម្ចាស់ដីឈ្មោះស៊ួនគឹមស្រ៊ុន ចូលខ្លួនមកដោះស្រាយជូនពួកគាត់ដែលជាជនរងគ្រោះចំនួន៥២គ្រួសារនេះផង។ ហើយអ្វីដែលពួកគាត់ដឹងនោះគឺលោកស៊ួន គឹមស្រ៊ុន បានទទួលលុយថ្លៃលក់ដីពីម្ចាស់បុរីឈ្មោះហេង ទ្រី សរុបចំនួន១,១៨០,០០០ដុល្លាររួចទៅហើយ និងបានចចារគ្នាដើម្បីទារលុយដែលនៅសល់ពីម្ចាស់បុរីបន្ថែម ប៉ុន្តែអត់ត្រូវគ្នា ម្ចាស់ដីរូបនោះក៏បានប្ដឹងឲ្យសមត្ថកិច្ចចាប់ខ្លួនម្ចាស់បុរីរូបនោះដាក់ពន្ធនាគារបាត់ទៅហើយ។
ប្រភពដដែលបានប្រាប់ឲ្យដឹងបន្តទៀតថា ចំណែកឯម្ចាស់បុរី ឈ្មោះហេង ទ្រី ក៏បានទទួលលុយពីពួកគាត់ទាំង៥២គ្រួសារសរុបចំនួនជាង១,៥០០,០០០ដុល្លាររួចទៅហើយដែរ ប៉ុន្តែអត់មានផ្ទះប្រគល់ឲ្យពួកគាត់ដើម្បីរស់នៅឡើយ ហើយពេលនេះត្រូវជាប់គុកថែមទៀតតើឲ្យពួកគាត់ត្រូវទៅរំពឹងអ្វី?។ ស្របពេលនេះដែរមិនត្រឹមតែពុំទាន់មានដំណោះស្រាយជាមួយម្ចាស់បុរីប៉ុណ្ណោះទេ ម្ចាស់ដីក៏ចង់រលាយកិច្ចសន្យាទិញនិងលក់ផ្ទះរវាងពួកគាត់ និងម្ចាស់បុរីទៀត ទើបធ្វើឲ្យពួកគាត់រឹតតែកើតទុក្ខមិនសុខចិត្តថែមមួយកម្រិតទៀត ហើយប្រមូលផ្ដុំតវ៉ាជាលើកទី២នេះ។
សូមរម្លឹកថា កាលពីវេលាព្រឹកថ្ងៃទី០៣ ខែតុលា ឆ្នាំ២០២៣ ក្រុមអ្នកទិញបុរីខាងលើបានលើកគ្នាទៅកាន់សាលាខណ្ឌដង្កោ ធ្វើការតវ៉ាសុំអន្តរាគមន៍ពីអាជ្ញាធរក្រោយទិញផ្ទះយូរហើយ អ្នកខ្លះបង់ប្រាក់បានចំនួន៣០ភាគរយ ទៅ៨០ភាគរយ និងអ្នកខ្លះទៀតបង់គ្រប់១០០ភាគរយទៅហើយប៉ុន្តែនៅពុំទាន់ទទួលបានផ្ទះនៅឡើយ។
មិនតែប៉ុណ្ណោះស្រាប់តែបែកធ្លាយរឿងទំនាស់រវាងម្ចាស់បុរីនិងម្ចាស់ដីយ៉ាងរញ៉េរញ៉ៃបំផុតរហូតដល់ការផ្អាកការសាងសង់ផ្ទះ ហើយពេលនេះម្ចាស់បុរីខាងលើក៏បានគេចខ្លួនលែងទទួលខុសត្រូវថែមទៀតផង ។ ជាហេតុធ្វើឲ្យពួកគាត់មានការព្រួយបារម្ភខ្លាំងនិងអស់ទំនុកចិត្តលើម្ចាស់បុរី ទើបពួកគាត់កាន់រូបថតសម្ដេចអគ្គមហាសេនាបតីតេជាហ៊ុន សែននិងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ។ ព្រមទាំងរូបថតសម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី និងលោកជំទាវ និងរូបថតលោកអភិសន្តិបណ្ឌិតស សុខា រដ្ឋមន្ត្រីក្រសួងមហាផ្ទៃលើកគ្នាទៅរកអាជ្ញាធរខណ្ឌដង្កោឲ្យជួយដោះស្រាយ ប៉ុន្តែរហូតមកទល់និងពេលនេះនៅពុំទាន់មានដំណោះស្រាយទើបបន្តធ្វើការតវ៉ាជាលើកទី២បែបនេះទៀត។
ពេលនោះក្រុមអ្នកតវ៉ាខាងលើបាននិយាយថា ផ្ទះនៅក្នុងបុរីនោះចែកចេញជា២ប្រភេទគឺទី១,ប្រភេទផ្ទះអាជីវកម្មក្នុង១ខ្នងតម្លៃចាប់ពីជាង១០ម៉ឺនដុល្លារឡើងទៅ និងទី២,ប្រភេទវីឡាកូនកាត់តម្លៃចាប់ពីជាង៥ម៉ឺនដុល្លារឡើងទៅ ។ ពួកគាត់បានចូលទៅទិញផ្ទះនៅទីនោះតាំងពីក្រុមហ៊ុនបុរីនេះនៅពេលចាប់ផ្ដើមបុកគ្រឹះសាងសង់ដំបូង ហើយបានធ្វើកុងត្រាជាមួយគ្នាដោយម្ចាស់បុរីធានាត្រឹមរយៈពេល២ឆ្នាំនិងបានផ្ទះនៅ ដោយពួកគាត់តាមរយៈការបង់រំលោះ ហើយបើគិតមកដល់និងពេលនេះអ្នកខ្លះបង់បាន៣០ទៅ៥០ឬ៨០ភាគរយ រីឯអ្នកខ្លះទៀតបានបង់គ្រប់ចំនួន១០០ភាគរយទៅហើយ ប៉ុន្តែពុំទទួលបានផ្ទះសម្រាប់រស់នៅឡើយ ៕
ចែករំលែកព័តមាននេះ