ខេត្តកណ្ដាល ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នឹងអញ្ជើញប្រកាសអំពីគោលនយោបាយបណ្ដុះបណ្ដាលជំនាញវិជ្ជាជីវៈ ដល់យុវជន នាថ្ងៃទី១៤ ខែវិច្ឆិកា ឆ្នាំ២០២៣ ខាងមុខនេះ ។
ថ្លែងក្នុងពិធីជួបសំណេះសំណាលជាមួយកម្មករ និយោជិតប្រមាណ ១៨,១៩០នាក់ មកពីបណ្តារោងចក្រ សហគ្រាស ចំនួន២៩ ក្នុងខេត្តកណ្តាល នាព្រឹកថ្ងៃទី២ ខែវិច្ឆិកា ឆ្នាំ២០២៣ សម្ដេចធិបតី ហ៊ុន ម៉ាណែត បានឲ្យដឹងថា គោលនយោបាយបណ្ដុះបណ្ដាល ជំនាញវិជ្ជាជីវៈ ដល់យុវជននេះ ចំនួន ១លាន ៥សែននាក់ ។
សម្ដេចធិបតី បានគូសបញ្ជាក់ថា ៖ «យើងត្រៀមអស់ហើយ យើងបានកំពុងបណ្ដុះបណ្ដាល គ្រូជិតចប់ហើយ វិក្រឹត្យការ ប្រព័ន្ធវិក្រឹត្យការបន្ថែម យើងរៀបចំផែនការ យើងមិនមែនទើបប្រកាសថ្ងៃនេះ ហើយឲ្យចេញនោះទេ យើងបានរៀបចំហើយ ថ្ងៃទី១៤ (១៥វិច្ឆិកា) នៅសល់ប្រហែលជា១០ថ្ងៃទៀត ខ្ញុំត្រូវទៅប្រកាសចេញជាផ្លូវការតែម្ដង ឥឡូវលក្ខណៈ ត្រៀមដល់ពេលខ្ញុំប្រកាស គឺចាប់ផ្ដើមចេញដំណើរតែម្ដង បានន័យថា ត្រៀមទាំងគ្រូ ត្រៀមទាំងប្រព័ន្ធការងារ យើងធ្វើជាជំហានៗ» ។
សម្ដេចនាយករដ្ឋមន្ត្រី បានបន្ដថា គោលនយោបាយរបស់រាជរដ្ឋាភិបាល គឺបានដាក់ចេញច្បាស់លាស់ ដើម្បីផលប្រយោជន៍របស់ប្រជាជន និងប្រទេសជាតិទាំងមូល មិនចេះតែនឹកឃើញ និងឆក់កណ្ដៀត ដូចអ្នកអង្គុយចាំរិះគន់នោះទេ ។
សម្ដេចបន្ថែមថា ប្រជាពលរដ្ឋ គឺជាជោគវាសនារបស់ប្រទេសជាតិ ដូច្នេះរាជរដ្ឋាភិបាលគ្មានអ្វីក្រៅពីធ្វើឲ្យប្រជាពលរដ្ឋរីកចម្រើន និងមានបានកាន់តែច្រើន ។
ជាមួយគ្នានោះដែរ សម្តេចធិបតី ក៏បានលើកទឹកចិត្ត ឲ្យវិស័យឯកជន ចូលរួមជាមួយរដ្ឋតែម្ដង ក្នុងនាមជាដៃគូ ហើយផ្ដល់ឱកាសបើកច្រក ឲ្យវិស័យឯកជនដើរតួនាទីសំ ខាន់ក្នុងការចាត់តាំងពិនិត្យយន្តការ នៃការតម្រង់ទិស ដើម្បីត្រៀមលក្ខណៈសម្រាប់ពេលអនាគត ។
សម្តេចធិបតី ហ៊ុន ម៉ាណែត បានថ្លែងថា រាជដ្ឋាភិបាល បើកច្រកឲ្យវិស័យឯកជនដើរតួនាទីសំខាន់ក្នុងការចាត់តាំងពិនិត្យយន្តការនៃការតម្រង់ទិស ដើម្បីត្រៀមលក្ខណៈ នៅពេលអនាគត។ ទន្ទឹមនេះ ត្រូវបែងចែកភារកិច្ចគ្នា ឲ្យដាច់ក្នុងការបណ្ដុះបណ្ដាល ក្រសួងអប់រំ យុវជន និងកីឡា បណ្តុះបណ្តាលអ្វី ក្រសួងការងារ និងបណ្ដុះបណ្ដាលវិជ្ជាជីវៈ បណ្ដុះបណ្ដាលអ្វី និងក្រសួងផ្សេងៗទៀតត្រូវធ្វើ ។
សម្តេចធិបតីនាយករដ្ឋមន្ដ្រី ថ្លែងបញ្ជាក់ថា ៖ «ខ្ញុំចង់លើកទឹក ចិត្តឲ្យវិស័យឯកជនចូលរួមជាមួយរដ្ឋតែម្ដង ក្នុងនាមជាដៃគូ ជួយគិតជួយធ្វើតែម្ដង។ ជួយគិតបានន័យថា ជួយផ្ដល់យោបល់ ជាមួយក្រសួងការងារ ក្រសួងអប់រំ ថាតើជំនាញអ្វី ដែលខ្លួនត្រូវការ ហើយជួយបណ្ដុះបណ្ដាលឲ្យខ្ញុំផង។ ជួយធ្វើ គឺអាចបញ្ជូនគ្រូបច្ចេកទេសមកជួយតែ ម្ដងហើយបណ្ដុះបណ្ដាល ដោយខ្លួនឯងក៏បាន» ។
សម្តេចធិបតី បានលើកឡើងថា វិស័យឯកជន មិនមែនជាសត្រូវរបស់រដ្ឋទេ គឺជាដៃគូដ៏ល្អរបស់រដ្ឋ គឺទាំងអស់គ្នា រួមគ្នា ដើម្បីបង្កើតការងារ បង្កើតផលប្រយោជន៍ជូនប្រជាពលរដ្ឋរបស់យើង ។
ជាមួយគ្នានោះដែរ សម្ដេចធិបតី បានឲ្យដឹងទៀតថា រួមគ្នាគិត រួមទាំងការគិតគូរអំពីអត្ថប្រយោជន៍ ជីវភាពរស់នៅសុខភាព និងការបណ្ដុះបណ្ដាលធនធានមនុស្សនេះ ជាអ្វីដែលយើងត្រូវ ត្រូវមានការបត់បែន យើងមិនអាចរឹងកំព្រឹសនោះទេ ។
សម្តេចធិបតី ហ៊ុន ម៉ាណែត បានស្នើសុំឲ្យវិស័យឯកជន ក្រុមហ៊ុនរួមគ្នាជាមួយរដ្ឋ រួមគ្នាធ្វើ រួមគ្នាគិត ដើម្បីផលប្រយោជន៍ប្រជាពលរដ្ឋយើងទាំងអស់គ្នា ក្នុងការបណ្ដុះបណ្ដាលវិជ្ជាជីវៈ ហើយកិច្ចការងារនេះ ជាកិច្ចការងារជាក់ស្ដែង បើយើងមិនបានជួយប្រជាពលរដ្ឋមិនបានជួយលើកកម្ពស់សមត្ថភាពរបស់គាត់គឺមិនអាចទៅរួចទេ ៕
ចែករំលែកព័តមាននេះ