ខេត្តកណ្តាល ៖ ថ្លែងចំពោះមុខបងប្អូនកម្មករ នៅក្នុងខេត្តកណ្តាល សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានគូសបញ្ជាក់ថា ប្រទេសមួយខ្លាំង ទាល់តែប្រជាជនរស់វើក និងមានសមត្ថភាព សុខភាពរឹងមាំ ហើយចេះឆក់យកឱកាសក្នុងការ ពង្រឹងសមត្ថភាពខ្លួន ទើបប្រទេសរឹងមាំ ។
ក្នុងជំនួបសំណេះសំណាលជាមួយកម្មករ និយោជិត២ម៉ឺននាក់ មកពីបណ្តារោងចក្រ សហគ្រាស ចំនួន២៩ ក្នុងខេត្តកណ្តាល នាព្រឹកថ្ងៃទី២ ខែវិច្ឆិកា ឆ្នាំ២០២៣ សម្ដេចធិបតី ហ៊ុន ម៉ាណែត បានឲ្យដឹងថា រាជរដ្ឋាភិបាល បានកំណត់គោលដៅឆ្នាំ២០៥០ កម្ពុជាក្លាយជា ប្រទេសរីកចម្រើន ។
សម្ដេចធិបតីបានបន្តថា គោលដៅរបស់រាជរដ្ឋាភិបាល គឺដើម្បីជាតិ និងប្រជាជនកម្ពុជា ដែលជាអ្នកកំណត់ជោគវាសនាប្រទេស។
ជាមួយគ្នានោះដែរ សម្ដេចធិបតីគូសបញ្ជាក់ថា ៖ «ប្រទេសយើងខ្លាំង ទាល់តែប្រជាជនរស់វើក ទាល់តែប្រជាជនមានសមត្ថភាព មានសុខភាពរឹងមាំ ហើយសំខាន់ចេះ ឆក់យកឱកាស ពង្រឹងសមត្ថភាពខ្លួន ពង្រឹងជីវភាពរស់នៅរបស់ខ្លួន ទើបប្រទេសរបស់យើងរឹងមាំ»។
សម្ដេចធិបតីនាយករដ្ឋមន្ត្រី បានបន្ថែមថា ប្រទេសជាតិប្រៀបដូចភោជនីយដ្ឋាន ឬហាងមួយដែរ ជោគជ័យ ត្រូវមានអតិថិជនច្រើន មានចំណូលច្រើន និងពង្រីកសាខាទៅកាន់តំបន់ផ្សេងៗ ដើម្បីជោគជ័យទាំងនេះ គឺត្រូវមានសុខសុវត្ថិភាព មានផាសុខភាព ការធ្វើដំណើរងាយស្រួល បរិស្ថានរស់នៅ និងការបំពេញការងារស្រួល ព្រមទាំងមានភាព រួសរាយរាក់ទាក់ មានសុខភាពល្អ មានជំនាញវិជ្ជាជីវៈ មានសមត្ថភា ពគ្រប់គ្រាន់បំពេញ គ្រប់តម្រូវការ ។
ក្នុងឱកាសនោះ សម្តេចធិបតីបានអំពាវនាវដល់បងប្អូនប្រជាពលរដ្ឋចូលរួមថែរក្សាសុខសន្តិភាព ស្ថេរភាព និងចូលរួមពង្រឹងភូមិ ឃុំ ស្រុក ខេត្តរបស់ខ្លួន និងពង្រឹងស្ថាប័នរបស់ខ្លួន ដើម្បីឲ្យជាតិរឹងមាំ ។ សម្តេចធិបតី ក៏បានស្នើឲ្យប្រជាពលរដ្ឋត្រូវតែចេញក្តាប់ឲ្យបាននូវឱកាសដែលផ្តល់ឲ្យផងដែរ៕
ចែករំលែកព័តមាននេះ