ស្ត្រីគ្រូទាយម្នាក់ស្លៀកស្បង់ចីវរអង្គុយក្នុងចានផ្កាឈូក ត្រូវអាជ្ញាធរចុះអប់រំ
- ក្រចេះ
ខេត្តក្រចេះ ៖ ស្ត្រីជាគ្រូទាយម្នាក់ដែលយកស្បង់ចីវររបស់ព្រះសង្ឃ មកស្លៀកអង្គុយក្នុងចានផ្កាឈូក
ខេត្តក្រចេះ ៖ ស្ត្រីជាគ្រូទាយម្នាក់ដែលយកស្បង់ចីវររបស់ព្រះសង្ឃមកស្លៀក និងអង្គុយក្នុងចានផ្កាឈូក ថតបង្ហោះតាមបណ្តាញសង្គមហ្វេសប៊ុក បង្កការភ្ញាក់ផ្អើល និងមានការរិះគន់ជាខ្លាំងនោះ ត្រូវបានអាជ្ញាធរក្រុងក្រចេះ រួមនឹងមន្ទីរធម្មការ និងសាសនាខេត្ត ព្រមទាំងព្រះមេគុណខេត្ត បានចុះអប់រំ និងធ្វើកិច្ចសន្យាអោយបញ្ឈប់សកម្មភាព កាលពីថ្ងៃទី៣១ ខែតុលា ឆ្នាំ២០២៣ នៅភូមិអូរឬស្សី សង្កាត់ អូរឬស្សី ក្រុងក្រចេះ ខេត្តក្រចេះ ។
ក្រោយពីផ្ទុះការរិះគន់ អាជ្ញាធរ និងមន្ទីរធម្មការ និងសាសនាខេត្តបានចុះទៅអប់រំស្ត្រីគ្រូទាយមួយរូបនោះឲ្យបញ្ឈប់សកម្មភាពជាបន្ទាន់ ។
ប្រធានមន្ទីធម្មការ និងសាសនាខេត្តក្រចេះ លោក ស៊ូ សែ បានប្រាប់អ្នកសារព័ត៌មាននៅរសៀលថ្ងៃទី១ ខែវិច្ឆកា ឆ្នាំ២០២៣នេះថា លោកបានចុះទៅដល់កន្លែង ហើយអ្វីដែលក្រុមការងារបានឲ្យគ្រូទាយស្រីរូបនោះអនុវត្តតាមលក្ខខណ្ឌចំនួន៣ចំនុច រួមមាន ៖
១-សូមឲ្យលុបចេញនូវវីដេអូឃ្លីបដែលខ្លួនបានបង្ហោះ ការស្លៀកពាក់ស្បង់ចីវរព្រះសង្ឃនោះឲ្យលុបចេញពីបណ្ដាញសង្គមវិញ។
២-សុំដកយកស្បង់ចីវរព្រះសង្ឃមករក្សាទុកនៅព្រះចៅអធិការវត្តអូរឬស្សី ។
៣-មិនអនុញ្ញាតឱ្យស្លៀកពាក់ស្បង់ចីវរព្រះសង្ឃបែបនេះទៀតនៅពេលក្រោយទេ។ បើសិនជាមិនអនុវត្តតាមកិច្ចសន្យាទាំង៣ចំណុចនេះទេ លោកនឹងមានវិធានការច្បាប់ផ្សេងទៀត។
លោកបន្ថែមថា លក្ខខណ្ឌទាំង៣ចំនុចខាងលើ ដែលក្រុមការងារបានដាក់ឲ្យគ្រូទាយរូបនោះ គាត់បានយល់ព្រមអនុវត្តតាមទាំង៣ចំនុច មិនមានការរឹងរូសនោះទេ។
ស្ត្រីជាគ្រូទាយមើលជោគវាសនា និងព្យាបាលជំងឺខាងលើឈ្មោះ សុខ នី បានធ្វើកិច្ចសន្យា ដូចតទៅ ៖ ថ្ងៃក្រោយ នាងខ្ញុំឈប់យកស្បង់ចីវរព្រះសង្ឃមកស្លៀកពាក់ និងឈប់ធ្វើសកម្មភាពមិនសមរម្យ ដែលនាំឲ្យប៉ះពាល់ដល់សេចក្ដីថ្លៃថ្នូរព្រះពុទ្ធសាសនាទៀតហើយ ។ បើពេលក្រោយនាងខ្ញុំ នៅហ៊ានធ្វើដូច្នេះទៀត នាងខ្ញុំសូមទទួលខុសត្រូវចំពោះមុខច្បាប់ជាធរមាន ៕
ចែករំលែកព័តមាននេះ