រាជធានីភ្នំពេញ ៖ ផ្សារបឹងត្របែកផ្លាហ្សាដែលជាផ្សារដ៏ទំនើបមួយទើបនឹងសាងសង់រួចនាពេលថ្មីៗកន្លងមកនេះបានរៀបចំពិធីសម្ពោធបើកដំណើរការជាផ្លូវការកាលពីថ្ងៃទី១៩ ឧសភា ក្រោមអធិបតីភាពលោកចម ប្រសិទ្ធ រដ្ឋមន្ត្រីក្រសួងពាណិជ្ជកម្ម។ ផ្សារបឹងត្របែកផ្លាហ្សាគឺជាផ្សារដ៏ទំនើបមួយដែលសង់ឡើងមានកំពស់ខ្ពស់ មានជណ្តើរយន្ត
រាជធានីភ្នំពេញ ៖ ផ្សារបឹងត្របែកផ្លាហ្សាដែលជាផ្សារដ៏ទំនើបមួយទើបនឹងសាងសង់រួចនាពេលថ្មីៗកន្លងមកនេះបានរៀបចំពិធីសម្ពោធបើកដំណើរការជាផ្លូវការកាលពីថ្ងៃទី១៩ ឧសភា ក្រោមអធិបតីភាពលោកចម ប្រសិទ្ធ រដ្ឋមន្ត្រីក្រសួងពាណិជ្ជកម្ម។
ផ្សារបឹងត្របែកផ្លាហ្សាគឺជាផ្សារដ៏ទំនើបមួយដែលសង់ឡើងមានកំពស់ខ្ពស់ មានជណ្តើរយន្ត ម៉ាស៊ីនត្រជាក់ សន្តិសុខ និងចំណតយានយន្តត្រឹមត្រូវទៅតាមស្តង់ដាអន្តរជាតិ។ ផ្សារនេះមានអាជីវករលក់ដូរជាច្រើននាក់កំពុងបើកតូបលក់ដូរ ដូចជាខោអាវបុរសស្ត្រី កាបូបបុរសស្ត្រី ស្បែកជើងបុរសស្ត្រី គ្រឿងអលង្ការ គ្រឿងអគ្គិសនី សំភារតាំងលំអ និងទំនិញជាច្រើនមុខទៀតក្នុងចំណោមតូបទាំងអស់ដែលមានច្រើនជាង៣០០តូបឯណោះ។ មានអាហារដ្ឋានបំពាក់ទៅដោយម៉ាស៊ីនត្រជាក់ ទីតាំងក្មេងលេង ចំណតរថយន្តក្រុង។
អ្នកតំណាងទីផ្សារបានឡើងថ្លែងសុន្ទរកថា ឱ្យដឹងថា ផ្សារបឹងត្របែកផ្លាហ្សាមានកំពស់៦ជាន់ មានជាន់ក្រោមដី ជាន់ផ្ទាល់ដី និងជាន់ទី១ ទី២ ទី៣ និងមានគម្រោងក្លឹបរាត្រីនៅជាន់ទី៤ មានជណ្តើរយន្តទំនើបគ្រប់ជាន់ធ្វើឱ្យមានភាពងាយស្រួលដល់អតិថិជនដែលចេញចូលទិញទំនិញនៅក្នុងផ្សារនេះ ។ ផ្សារនេះមានគំរោងអភិវឌ្ឍបន្ថែមនៅជាន់ខាងលើជាបន្តទៀតដើម្បីបំពេញតំរូវការរបស់ប្រជាជនកម្ពុជា។
លោកចម ប្រសិទ្ធ បានកោតសរសើរដល់ការបង្កើតឱ្យមានផ្សារបឹងត្របែកផ្លាហ្សានេះ ហើយលោកសង្ឃឹមថា ផ្សារបឹងត្របែកផ្លាហ្សានឹងទាក់ទាញអតិថិជនក្នុងទីក្រុងបានកាន់តែច្រើនជាងផ្សារទំនើបដទៃទៀត ពីព្រោះតំបន់ជុំវិញផ្សារបឹងត្របែកផ្លាហ្សានេះមិនទាន់មានផ្សារទំនើបទេ គឺមានតែ ផ្សារបឹងត្របែកផ្លាហ្សានេះហើយដែលនៅជិតផ្ទះរបស់ប្រជាពលរដ្ឋជាងផ្សារទំនើបដទៃទៀត។
លោកចម ប្រសិទ្ធ បញ្ជាក់ថា បច្ចុប្បន្នរាជធានីភ្នំពេញមានផ្សារទំនើបៗចំនួន១៨ហើយ នេះបង្ហាញឱ្យឃើញថា ជាមួយនឹងភាពរីកចំរើនរបស់ប្រទេសជាតិ ជីវភាពប្រជាជនក៏ធូរធារកាន់តែច្រើនណាស់ដែរ ៕
ចែករំលែកព័តមាននេះ