ខេត្តកោះកុង ៖ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានប្រកាសផ្ដល់ថវិកាចំនួន ៤លានរៀល និងរក្សាទុកជាការសម្ងាត់ជូនចំពោះនរណា…
ខេត្តកោះកុង ៖ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានប្រកាសផ្ដល់ថវិកាចំនួន ៤លានរៀល និងរក្សាទុកជាការសម្ងាត់ជូនចំពោះនរណា ដែលបានផ្តល់ព័ត៌មាន ពីអត្តសញ្ញាណរបស់ជន ដែលបានវាយសំពងកូនឈ្លូស១ក្បាល កំពុងហែលទឹកសមុទ្រ បណ្តាលឲ្យងា.ប់នៅហ្នឹងកន្លែង នៅឆ្នេរកុកហាវ ស្រុកគិរីសាគរ កាលពីថ្ងៃទី២៥ ខែតុលា ឆ្នាំ២០២៣ ។
យោងតាមទំព័រហ្វេសប៊ុករបស់លោកជំទាវ មិថុនា ភូថង បានសរសេរនៅព្រឹកថ្ងៃទី៣១ តុលានេះថា ៖ «ពាក់ព័ន្ធករណីជន ដែលបានប្រព្រឹត្តអំពើមិនគម្បី ខ្វះសីលធម៌ អគតិ ធ្វើឲ្យប៉ះពាល់ធ្ងន់ធ្ងរដល់សង្គម គួរឲ្យស្អប់ខ្ពើមបំផុត បានយកដំបងឈើជ្រុង វាយសំពងក្បាលកូនឈ្លូស ដែលកំពុងហែលទឹក ទៅរកដីគោក បណ្តាលឲ្យស្លា.ប់បាត់បង់ជីវិត នៅហ្នឹងកន្លែង» ។
លោកជំទាវ មិថុនា ភូថង ក៏បានប្រកាសយ៉ាងដូច្នេះថា ៖ «ពាក់ព័ន្ធករណីខាងលើ ខ្ញុំសូមលើកទឹកចិត្តជាថវិកាចំនួន ៤,០០០,០០០រៀល (បួនលានរៀល) ដល់អ្នក ដែលបានផ្តល់ព័ត៌មាន អត្តសញ្ញាណ របស់ជន ដែលបានប្រព្រឹត្តអំពើអមនុស្សធម៌ នូវភិនភាគ រូបរាង ដូចដែលមាននៅក្នុងវីដេអូនេះ។ ចំពោះអ្នក ដែលបានផ្តល់ព័ត៌មាននេះ យើងខ្ញុំ នឹងរក្សាទុកជាការសម្ងាត់» ។
ជាមួយគ្នានេះដែរ លោកជំទាវអភិបាលខេត្តកោះកុង ក៏បានស្នើសុំឲ្យសាធារណជន ជាពិសេសអ្នក ដែលបាននៅក្នុងហេតុការណ៍នោះ មេត្តាចូលរួមជាមួយអាជ្ញាធរមានសមត្ថកិច្ច ដើម្បីឈានទៅរកចាប់ឃាត់ខ្លួនជននោះ យកមកផ្តន្ទាទោសតាមច្បាប់ ដោយគ្មានការលើកលែងឡើយ ។
សូមជម្រាបថា កាលពីរសៀលថ្ងៃទី៣០ ខែតុលា ឆ្នាំ២០២៣ ម្សិលមិញនេះ លោក ចេង មុនីរិទ្ធ អភិបាល នៃគណៈអភិបាលស្រុកគិរីសាគរ បានចាត់តាំងលោក ទួន ឪទី អភិបាលរងស្រុក និងជាអនុប្រធានគណៈបញ្ជាការឯកភាពរដ្ឋបាលស្រុកគិរីសាគរ ឲ្យដឹកនាំកម្លាំង និងសហការជាមួយមន្ត្រីឧទ្យានុរក្ស នៃមន្ទីរបរិស្ថានខេត្ត ចុះធ្វើការស្រាវជ្រាវរកជនសង្ស័យមួយក្រុម ដែលបានវាយសម្លា.ប់សត្វឈ្លូស ដែលកំពុងហែលទឹកសមុទ្រ នៅចំណុចឆ្នេរកុកហាវ ស្ថិតក្នុងភូមិពាមកាយ ឃុំកោះស្ដេច ស្រុកគិរីសាគរ ខេត្តកោះកុង ។
យោងតាមវីដេអូ ដែលគេបង្ហោះនៅលើបណ្ដាញសង្គមហ្វេសប៊ុក កាលពីថ្ងៃទី២៥ តុលានេះ បានបង្ហាញអោយឃើញថា សត្វឈ្លូសមួយក្បាល មិនដឹងវង្វេងមកពីទីណាទេ វាបានហែលទឹកសមុទ្រ មកដល់ឆ្នេរកុកហាវ ត្រូវបានមនុស្សមួយក្រុម យកកំណាត់ឈើ មកវាយសំពងក្បាលឈ្លូសនោះទាល់តែងា.ប់ រួចហើយនាំគ្នា លើកយកទៅបាត់ ៕
ចែករំលែកព័តមាននេះ