អគ្គិភ័យឆាបឆេះផ្ទះ១ខ្នងនៅសង្កាត់ព្រែកកំពឹសទាំងព្រឹក
- ភ្នំពេញ
រាជធានីភ្នំពេញ ៖ ព្រះអគ្គីបានឆាបឆេះផ្ទះ១ខ្នងដែលសង់អំពីឈើខាងលើ និងបន្ទប់ថ្មខាងក្រោម
រាជធានីភ្នំពេញ ៖ ព្រះអគ្គីបានឆាបឆេះផ្ទះ១ខ្នងដែលសង់អំពីឈើខាងលើ និងបន្ទប់ថ្មខាងក្រោមទាំងស្រុង ដោយពុំដឹងពីមូលហេតុ ហើយបានបង្កឲ្យមានការភ្ញាក់ផ្អើលដល់អាជ្ញាធរនិងសមត្ថកិច្ចចេញអន្តរាគមន៍ ព្រមទាំងមានរថយន្តពន្លត់អគ្គិភ័យប្រមាណជាង១០គ្រឿងទៅបាញ់ទឹកពន្លត់រហូតរលត់ទៅវិញទាំងស្រុង ពុំបានបណ្ដាលឲ្យឆេះរាលដាលដល់លំនៅដ្ឋានផ្សេងដែលស្ថិតនៅក្បែរនោះឡើយ។
ហេតុការណ៍ខាងលើនោះបានបង្កការភ្ញាក់ផ្អើលកើតឡើងកាលពីវេលាម៉ោង៩និង១០នាទីព្រឹកថ្ងៃទី៣១ ខែតុលា ឆ្នាំ២០២៣ នៅក្នុងភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ។
តាមប្រភពព័ត៌មានបានឲ្យដឹងថា នៅពុំទាន់ដឹងពីមូលហេតុនៃការឆាបឆេះនោះផ្ដើមចេញពីអ្វីនៅឡើយទេ ហើយខណៈពេលភ្លើងចាប់ផ្ដើមឆេះតិចៗពីដំបូងពុំត្រូវបានដឹងភ្លាមៗនោះទេ រហូតដល់ពេលភ្លើងឆេះខ្លាំងទើបដឹង ហើយអ្នកភូមិបាននាំគ្នាជួយពន្លត់ដែរ ប៉ុន្តែពុំអាចពន្លត់ឈ្នះឡើយ ។ ពេលនោះការឆេះលឿនខ្លាំងណាស់ ចេញជាអណ្ដាតភ្លើងយ៉ាងសន្ធោរសន្ធៅនិងមានផ្សែងហុយឃ្មួលខ្មាញ់ឡើងលើអាកាស បង្កឲ្យមានការភ្ញាក់ផ្អើលដល់អាជ្ញាធរនិងសមត្ថកិច្ចចេញអន្តរាគមន៍ភ្លាមៗផងដែរ។
ប្រភពដដែលបានប្រាប់ឲ្យដឹងបន្តទៀតថា អាជ្ញាធរបានហៅរថយន្តពន្លត់អគ្គិភ័យពីបណ្ដាអង្គភាពនានាទៅកាន់ទីនោះជាបន្តបន្ទាប់ជាង១០គ្រឿងដើម្បីពន្លត់ភ្លើង ព្រោះមានការព្រួយបារម្ភខ្លាចឆេះរាលដល់ផ្ទះដែលស្ថិតនៅជាប់គ្នានោះទៀត ។ ប៉ុន្តែក្រោយពីការព្យាយាមបាញ់ទឹកពន្លត់ភ្លើងបានរលត់ទៅវិញទាំងស្រុង ពុំបានឆេះរាលដល់លំនៅដ្ឋានផ្សេងទៀតដែលស្ថិតនៅជាប់គ្នានោះឡើយ តែផ្ទះនោះរួមទាំងទ្រព្យសម្បត្តិនៅក្នុងនោះមួយចំនួនត្រូវបានភ្លើងឆេះទាំងស្រុង ហើយនៅពុំទាន់ដឹងថាទំហំនៃការខូចខាតគិតជាប្រាក់ប៉ុន្មាននៅឡើយ៕
ចែករំលែកព័តមាននេះ