កម្មករសំណង់បុរីប៊ូយុង ស្ថិតនៅភូមិបន្លាស្អិត សង្កាត់ឃ្មួញ ប្រមាណ១២០នាក់ ក្នុងចំណោមជាង១០០០នាក់ បានលើកគ្នាមកស្នាក់ក្រុមហ៊ុន «ប៊ូយ៉ុង» ដើម្បិតវ៉ាសុំបើកប្រាក់ថ្លៃពលកម្ម បន្ទាប់ពីក្រុមហ៊ុនបានបញ្ចប់គម្រោងរយៈពេលប្រមាណជិត២ឆ្នាំមកហើយ ប៉ុន្តែមិនទាន់
រាជធានីភ្នំពេញ ៖ កម្មករសំណង់បុរីប៊ូយុង ស្ថិតនៅភូមិបន្លាស្អិត សង្កាត់ឃ្មួញ ប្រមាណ១២០នាក់ ក្នុងចំណោមជាង១០០០នាក់ បានលើកគ្នាមកស្នាក់ក្រុមហ៊ុន «ប៊ូយ៉ុង» ដើម្បិតវ៉ាសុំបើកប្រាក់ថ្លៃពលកម្ម បន្ទាប់ពីក្រុមហ៊ុនបានបញ្ចប់គម្រោងរយៈពេលប្រមាណជិត២ឆ្នាំមកហើយ ប៉ុន្តែមិនទាន់បានបើកប្រាក់អោយកម្មករនោះទេ។
ការតវ៉ាខាងលើនេះ បានផ្ទុះឡើងជាថ្មី កាលពីវេលាម៉ោងប្រមាណ២រសៀល ថ្ងៃទី៣០ ខែតុលា ឆ្នាំ២០២៣ ដោយក្រុមជាង និងកម្មករ បានមកជួបប្រមូលផ្តុំលើកបដា និងរូបថតសម្តេចតេជោ ហ៊ុន សែន និងសម្តេចបវរធិបតី ហ៊ុន ម៉ាណែត ដើម្បីអោយជួយអន្តរាគមន៍នៅមុខស្នាក់ការកណ្តាលក្រុមហ៊ុន «ប៊ូយ៉ុង» ដែលមានទីតាំងស្ថិតនៅតាមបណ្តោយមហាវិថីសហព័ន្ធរុស្ស៊ី ក្នុងភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។ នៅខណៈពេលនោះដែរ ក្រុមកម្មករក៏បាននាំគ្នាយកកង់រថយន្តមកគរ បម្រុងគំរា.មដុតទៀតផង។
តាមតំណាងកម្មករម្នាក់ដែលផ្ទុះការតវ៉ា បានប្រាប់អោយដឹងថា ពួកគាត់ជាកម្មករ និងជាងសំណង់គ្រប់ផ្នែក រួមមាន ៖ ផ្នែកឥដ្ឋ, ការ៉ូ, ទឹក, ភ្លើង និងពិដានរបស់បុរី «ប៊ូយ៉ុង» ដែលមានទីតាំងនៅក្រោយផ្សារឃ្លាំងរំសេវថ្មី ស្ថិតក្នុងសង្កាត់ឃ្មួញ បាននាំគ្នាមកទាមទារប្រាក់ថ្លៃពលកម្ម បន្ទាប់ពីបុរីនោះបានបញ្ចប់គម្រោងរយៈពេលជិត២ឆ្នាំមកហើយ តែមិនទាន់បានបើកប្រាក់អោយកម្មករនោះទេ ។
តាមតំណាងរូបនោះ ក៏បានបញ្ជាក់ឱ្យដឹងថា កម្មករបុរីទាំងអស់ ប្រមាណជាង១០០០នាក់ ដែលក្រុមហ៊ុនមិនទាន់បើកប្រាក់ថ្លៃពលកម្មរយៈពេល៣ខែចុងក្រោយ បន្ទាប់ពីបញ្ចប់គម្រោង។ ខណៈពេលនោះ កម្មករទាំងអស់បានផ្ទុះការតវ៉ាជាបន្តបន្ទាប់ ដើម្បីទាមទារប្រាក់ថ្លៃពលកម្ម តែក្រុមហ៊ុនចេះតែសន្យាខ្យល់ រហូតមកដល់ពេលនេះ គឺមានរយៈពេល២ឆ្នាំមកហើយ ក៏បានលើកគ្នាមកស្នាក់ការក្រុមហ៊ុនតែម្តង។
តាមអ្នកតវ៉ា បានប្រាប់អោយដឹងថា ប្រាក់ដែលក្រុមហ៊ុនជំពាក់កម្មករ ផ្នែកខ្លះ៥ម៉ឺនដុល្លារ និងខ្លះទៀតដូចជាផ្នែកពិដាន រហូតដល់២០ម៉ឺនដុល្លារ។ បន្ទាប់ពី មានការតវ៉ា អាជ្ញាធរខណ្ឌសែនសុខ ក៏បានចុះទៅសម្របសម្រួល និងហាមកម្មករកុំអោយដុតកង់រថយន្ត ព្រោះវានាំអោយប៉ះពាល់ដល់បរិស្ថាន និងបានសាកសួររដ្ឋបាល ដើម្បីរកដំណោះស្រាយ។
តាមរដ្ឋបាលក្រុមហ៊ុន «ប៊ូ យ៉ុង» បានប្រាប់អាជ្ញាធរឱ្យដឹងដែរថា ក្រុមហ៊ុនបានទម្លាក់ប្រាក់អោយក្រុមហ៊ុនជាអ្នកម៉ៅការអស់ហើយ ហេតុអ្វីក្រុមហ៊ុនមិនបានយកទៅបើកឱ្យតាមផ្នែកបន្តទៀត?។
ទោះបីជាយ៉ាងណា នៅរសៀលនោះដែរ តំណាងក្រុមហ៊ុន ក៏បានអោយតំណាងក្រុមកម្មករជួបស្រង់ឈ្មោះ និងប្រាក់ ដែលនៅសល់ ហើយសន្យាថា នឹងបើកអោយកម្មករ។
ព័ត៌មានបន្ថែមនឹងមានផ្សាយជូនបន្តនៅលើកាសែតកោះសន្តិភាព៕
ចែករំលែកព័តមាននេះ