ខេត្តកំពង់ឆ្នាំង ៖ បន្ទាប់ពីចិញ្ចឹមបង្កងអូស្ត្រាលីទទួលបានជោគជ័យ កសិកររស់ក្នុងភូមិចំការឃ្លៃ ឃុំស្វាយជ្រុំ ស្រុករលាប្អៀរ បានបន្ថែមមុខរបរមួយទៀត គឺការចិញ្ចឹមខ្យងប័រ ឬខ្យងធុរេន ដែលបច្ចុប្បន្ន…
ខេត្តកំពង់ឆ្នាំង ៖ បន្ទាប់ពីចិញ្ចឹមបង្កងអូស្ត្រាលីទទួលបានជោគជ័យ កសិកររស់ក្នុងភូមិចំការឃ្លៃ ឃុំស្វាយជ្រុំ ស្រុករលាប្អៀរ បានបន្ថែមមុខរបរមួយទៀត គឺការចិញ្ចឹមខ្យងប័រ ឬខ្យងធុរេន ដែលបច្ចុប្បន្ន កំពុងតែមានអតិថិជនគាំទ្រជាច្រើនក្នុងការកុម្ម៉ង់ទិញកូនខ្យងយកទៅបន្ត ។
យ៉ាងនេះក្តី ការលក់មិនទាន់ឈានដល់ការលក់ខ្យងសាច់ ឬភ្លក់រសជាតិវានៅឡើយទេ ខណៈដែលប្រភពព័ត៌មានពីខាងក្រៅថា ខ្យងប្រភេទនេះមានរសជាតិឆ្ងាញ់ និងមានតម្លៃថ្លៃ រហូតពី៣០ទៅ៧០ដុល្លារក្នុង១គីឡូក្រាម ប៉ុន្តែម្ចាស់កសិដ្ឋានរូបនោះថា មិនបានថ្លៃដល់ម្លឹងទេ ត្រឹមតែ១ម៉ឺនរៀលក្នុង១គីឡូក្រាមក៏បានដែរ ។
លោក នង ណារិទ្ធ ម្ចាស់កសិដ្ឋានចិញ្ចឹមបង្កងអូស្ត្រាលី ចិត្តស្រីអូន នៅព្រឹកថ្ងៃទី៣០ ខែតុលា ឆ្នាំ២០២៣ បានបញ្ជាក់ប្រាប់ថា លោកបានទទួលពូជខ្យងពីមិត្តភក្កិរបស់លោកនៅខេត្តរតនគិរី ចំនួន១០០ក្បាល កាលពីជាងខែមុន ។ ដែលកាលនោះ ជាកូនខ្យងនៅតូចៗទំហំប៉ុនៗម្រាមដៃ។
លោកចិញ្ចឹមបានប្រមាណជាងមួយខែ ខ្យងទាំងនោះចាប់ផ្ដើមពង ហើយក៏ចាប់ផ្ដើមញាស់កូន រហូតដល់បច្ចុប្បន្ន បើគិតទៅប្រមាណជា២ខែកន្លះ លោកមានកូនខ្យងសម្រាប់លក់ចេញប្រមាណ ៤ម៉ឺនកូន និងកំពុងតែញាស់ដណ្ដើរៗដោយសារតែខ្យងនេះពងច្រើននិងញឹកញាប់ណាស់ ហើយក៏មានអតិថិជនកុម្ម៉ង់ទិញរាល់ថ្ងៃ ដែលកសិកដ្ឋានរបស់លោក បានផ្ញើទៅឱ្យតាមបណ្តាខេត្ត និង អ្នកខេត្តកំពង់ឆ្នាំងក៏មានមកទិញដល់កន្លែងដែរ ។
លោក នង ណារិទ្ឋ បានបន្ថែមថា ខ្យងប្រភេទនេះនៅស្រុកខ្មែរ គេហៅខ្យងប័រ ឬខ្យងធុរេន ដែលមានប្រភពនាំចូលពីប្រទេសជប៉ុន ។ ខ្យងនេះ មានលក្ខណៈប្លែកពីខ្យងខ្មែរ និងខ្យងថៃ ដោយសារតែវាមានពណ៌សម្បុរដូចសាច់ធុរេន ហើយវាមិនស៊ីស្រូវដូរខ្យងថៃទេ ។ សម្រាប់សាច់វា តាមលោកទទួលព័ត៌មាន វាមានតម្លៃចាប់ពី៣០ដុល្លារ ទៅ៧០ដុល្លារក្នុង១គីឡូក្រាម ។
លោកថា បើបានប៉ុណ្ណឹងមែន មិនដឹងចំណេញយ៉ាងណាទេ? តែលោកថា ពេលកើតច្រើនត្រឹមតែ១ម៉ឺនរៀល ក្នុង១គីឡូក្រាមក៏ចំណេញដែរ ។ សម្រាប់ការចិញ្ចឹម គឺមិនលំបាកដល់ថ្នាក់ប្រើអុកស៊ីសែននោះទេ សំខាន់ទឹករាកស្អាតមិនក្តៅ មិនស្អុយ ចំណីរបស់វាគឺបន្លែ ។ យ៉ាងនេះក្តី ម្ចាស់កសិដ្ឋានបានបញ្ជាក់ថា មកទល់ពេលនេះ លោកមិនទាន់បានភ្លក់រសជាតិវានៅឡើយទេ ព្រោះកំពុងតែយកបាបង្កាត់ពូជ ប៉ុន្តែឮថា មានរស់ជាតិឆ្ងាញ់ណាស់ ។
គួររំលឹកដែរថា លោក នង ណារិទ្ធ ដែលជាម្ចាស់កសិដ្ឋានចិញ្ចឹមបង្កងចិត្តស្រីអូនបានទទួលជោគជ័យលើមុខរបរចិញ្ចឹមបង្កង ហើយបច្ចុប្បន្នកំពុងតែពង្រីកមុខរបរចិញ្ចឹមខ្យងប័រ ឬខ្យងធុរេន ។
ចែករំលែកព័តមាននេះ