នៅតាមទីសក្តារៈល្បីៗនានានៅទូទាំងប្រទេស នៅប៉ុន្មានថ្ងៃនេះ ឃើញយុវជន និងយុវនារី រួមទាំងអាណាព្យាបាលរបស់ពួកគេ ខ្លះបាននាំគ្នាទៅគោរពបូជាច្រើនកុះករចម្លែក ករណីដូចជា នៅព្រះអង្គដងកើជាដើម ។ មូលហេតុចម្បង គឺសុំបួងសួងអោយពួកគេប្រឡងជាប់សញ្ញាប័ត្រ មធ្យមសិក្សាទុតិយភូមិ ឬបាក់ឌុបនេះឯង ។
តើការទៅបន់ស្រន់ទាំងនេះ ពិតជាអាចជួយអោយពួកគេប្រឡងជាប់សញ្ញាប័ត្រមែនឬយ៉ាងណា?
![](https://kohsantepheapdaily.com.kh/wp-content/uploads/2023/10/33e75ff09dd601bbe69f351039152189-24.jpg)
សម័យប្រឡងសញ្ញាប័ត្របញ្ចប់ការសិក្សាចំណេះដឹងទូទៅនេះ គ្រោងនឹងរៀបចំឡើងនៅថ្ងៃទី០៦ ដល់ថ្ងៃទី០៧ ខែវិច្ឆិកា ឆ្នាំ២០២៣ ខាងមុខនេះ។ ដូច្នេះហើយបានជាឃើញមានយុវជន និងយុវនារីជាច្រើនទៅតាមទីសក្ការៈនានា ដោយនៅភ្នំពេញអាចឃើញនៅព្រះអង្គដងកើ ដែលគេដឹងថា ទីនោះគឺជាកន្លែងដែលមហាជនតែងតែទៅបែបន់សុំលាភសក្ការៈ មានឲ្យ ប្រឡងជាប់ សុំកូន និងបួងសួងផ្សេងៗតាមជំនឿរបស់ខ្លួន ដោយមានលេងភ្លេងពិណពាទ្យនិងជាវផ្កាឈូក ស្លាធម៌ ដាក់ថ្វាយព្រះអង្គដងកើ។ អ្នកខ្លះទៀតក៏លែងសត្វ ដូចជាអណ្តើក បក្សី ឬត្រី នៅខាងមុខព្រះអង្គដងកើផងដែរ។
![](https://kohsantepheapdaily.com.kh/wp-content/uploads/2023/10/02e74f10e0327ad868d138f2b4fdd6f0-23.jpg)
មកដល់ពេលនេះ អ្នកដែលបានបែបន់នោះ អ្នកខ្លះក៏បានសម្រេច អ្នកខ្លះទៀតសុំមិនបានសម្រេច រហូតមកដល់សព្វថ្ងៃនេះ ។
តាមការពន្យល់របស់លោកព្រឹទ្ធាចារ្យ មៀច ប៉ុណ្ណ នៅពេលដែលលោកនៅមានជីវិត បានប្រាប់ឲ្យដឹងថា ព្រះអង្គដងកើ ត្រូវគេចាត់ទុកថា ជាអ្នកតាដ៏ធំជាងគេ បន្ទាប់ពីអ្នកតាឃ្លាំងមឿង។ ចំពោះប្រវត្តិព្រះអង្គដងកើនេះ មិនមានសៀវភៅណាសរសេររក្សាទុកទេ គ្រាន់តែជាសាច់រឿងដែលចាស់ៗនិយាយតៗគ្នាតែប៉ុណ្ណោះ ។
![](https://kohsantepheapdaily.com.kh/wp-content/uploads/2023/10/37693cfc748049e45d87b8c7d8b9aacd-26.jpg)
នេះគឺជាជំនឿអរូបិយ ហើយគ្រប់គ្នាមានសិទ្ធិជឿ ឬមិនជឿតាមសិទ្ធិសេរីភាពរៀងៗខ្លួន ហើយក៏មិនមែនជាកំហុសអ្វីនោះដែរ។ ប៉ុន្តែតាមហេតុផលតក្កវិទ្យា ប្រសិនបើយើងបន់ស្រន់ផង ហើយខិតខំផង គឺវាបានផល ជាជាងបានតែបន់ ហើយមិនខំ ។
មកដល់ពេលនេះ គ្មានការបកស្រាយណាមួយច្បាស់លាស់អំពីជំនឿរបស់មនុស្សឡើយ ប៉ុន្តែតាមតក្កវិទូ ការបន់ស្រន់ទាំងនេះ អាចនឹងជួយប្អូនៗដែលនឹងត្រូវប្រឡងដែលមានចំនួនសរុប ១៣៧.៤១២ នាក់ ដែលត្រូវប្រឡងនៅមណ្ឌលសរុបទូទាំងប្រទេសចំនួន ២២៧មណ្ឌល ត្រូវជា ៥.៥៤៣ បន្ទប់ បានខាងផ្លូវអារម្មណ៍ ។
![](https://kohsantepheapdaily.com.kh/wp-content/uploads/2023/10/1ff1de774005f8da13f42943881c655f-26.jpg)
នៅក្នុងករណីប្អូនៗបានរៀន បានសូត្រ ប្អូនៗមានជំនឿ ហើយនាំគ្នាទៅបន់ស្រន់ យ៉ាងហោចណាស់ ក៏អាចអោយប្អូនៗមានជំនឿ មានស្មារតី មានភាពភ្លឺស្វាងនៅក្នុងអារម្មណ៍ ជឿទុកចិត្តលើខ្លួនឯង ដែលជាកត្តាមួយអាចអោយប្អូនៗទទួលបានលទ្ធផល ជោគជ័យ ប៉ុន្តែនៅក្នុងករណីប្អូនៗមិនបានរៀនសូត្រអីសោះ ហើយទៅបន់ស្រន់ ប្រហែលជាលោកតា និងវត្ថុស័ក្ដិសិទ្ធិក៏ទំនងជាមិនអាចជួយប្អូនៗបានដែរ នៅក្នុងអំឡុងពេលប្រឡងនោះ។ ហើយលទ្ធផលដែលគ្រោងនឹងចេញនៅថ្ងៃទី២៨ ខែ វិច្ឆិកា ឆ្នាំដដែល ក៏ប្រហែលជាមិនអាចមានប្អូនៗដែរ ។
![](https://kohsantepheapdaily.com.kh/wp-content/uploads/2023/10/4e732ced3463d06de0ca9a15b6153677-24.jpg)
នៅពេលនេះ នៅសល់ប្រហែលជាមួយសប្តាហ៍ទៀតប៉ុណ្ណោះ ដូច្នេះសូមខំរំលឹកមេរៀន ខំរំលឹករូបមន្តសម្រាប់លំហាត់ ដោយគេដឹងថា ប្អូនៗនៅក្នុងម្នាក់ៗប្រឡងតែ៧មុខវិជ្ជាប៉ុណ្ណោះ ពោលគឺសម្រាប់ប្អូនៗរៀនថ្នាក់វិទ្យាសាស្ត្រ មានមុខវិជ្ជាជម្រើស ជីវវិទ្យា គីមីវិទ្យា ភាសាបរទេស អក្សរសាស្ត្រខ្មែរ រូបវិទ្យា និងគណិតវិទ្យា។ ចំណែកប្អូនៗរៀនថ្នាក់វិទ្យាសាស្ត្រសង្គម មានមុខវិជ្ជាជម្រើស ប្រវត្តិវិទ្យា ភូមិវិទ្យា ភាសាបរទេស គណិតវិទ្យា សីលធម៌-ពលរដ្ឋ និងអក្សរសាស្ត្រខ្មែរ។
![](https://kohsantepheapdaily.com.kh/wp-content/uploads/2023/10/8e296a067a37563370ded05f5a3bf3ec-26.jpg)
សរុបមកវិញ អបិយជំនឿមិនមែនថា អត់ប្រយោជន៍ គ្មានគុណសម្បត្តិនោះឡើយ ។ អបិយជំនឿ អាចជាកម្លាំងចិត្ត ដែលរក្សាផ្លូវចិត្តយើងអោយរឹងប៉ឹង និងមាំទាំ ពីព្រោះការប្រឡងនីមួយៗមិនមែនជារឿងធម្មតាទេ។ ហើយកន្លងមក សឹងតែរាល់ឆ្នាំ គឺមានករណីយុវជន និងយុវនារី ដែលជាបេក្ខជន និងបេក្ខនារីប្រឡងមានបញ្ហាសុខភាពជារឿយៗ ដូច្នេះក្រៅពីខំរៀនហើយ ក៏ត្រូវតាំងចិត្តតាំងកាយ ហើយពង្រឹងស្មារតី ដោយរួមទាំងការសម្រាកអោយបានគ្រប់គ្រាន់ ចៀសវាងដួលនៅថ្ងៃប្រឡង ។ សូមជូនពរប្អូនៗដែលជាបេក្ខជន និងបេក្ខនារីប្រឡងឆ្នាំនេះ អោយទទួលបានលទ្ធផលគាប់ប្រសើរទាំងអស់គ្នា។
ដោយ ៖ ហេង ចេស្តារ
![](https://kohsantepheapdaily.com.kh/wp-content/uploads/2023/10/182be0c5cdcd5072bb1864cdee4d3d6e-24.jpg)
![](https://kohsantepheapdaily.com.kh/wp-content/uploads/2023/10/6ea9ab1baa0efb9e19094440c317e21b-23.jpg)
![](https://kohsantepheapdaily.com.kh/wp-content/uploads/2023/10/34173cb38f07f89ddbebc2ac9128303f-23.jpg)
![](https://kohsantepheapdaily.com.kh/wp-content/uploads/2023/10/c16a5320fa475530d9583c34fd356ef5-23.jpg)
ចែករំលែកព័តមាននេះ