រាជធានីភ្នំពេញ ៖ តំណាងអចិន្ដ្រៃយ៍កម្ពុជា ប្រចាំអង្គការសហប្រជាជាតិ បានអំពាវនាវដល់សហគមន៍អន្ដរជាតិ រួបរួមគ្នាក្នុងស្មារតីនៃសាមគ្គីភាព ដើម្បីជំរុញឲ្យមានកិច្ចសន្ទនា និងចរចាប្រកបដោយអត្ថន័យរវាងប៉ាឡេស្ទីន និងអ៊ីស្រាអែល នាំទៅរកសន្ដិភាពដ៏ត្រឹមត្រូវ និងយូរអង្វែង ។
យោងតាមសេចក្តីថ្លែងការណ៍របស់លោកស្រី អ៊ាត សោភា តំណាងអចិន្ត្រៃយ៍កម្ពុជា ប្រចាំអង្គការសហប្រជាជាតិក្នុងកិច្ចប្រជុំពិសេសបន្ទាន់នៃមហាសន្និបាតអង្គការសហប្រជាជាតិ ស្តីពីជម្លោះប៉ាឡេស្ទីន និងអ្វីស្រាអែល នៅថ្ងៃទី២៧ ខែតុលា ឆ្នាំ២០២៣ លោកស្រីបានសម្តែងនូវមរណទុក្ខចំពោះការបាត់បង់ជីវិតប្រជាជនស្លូតត្រង់ជាច្រើន រួមទាំងជនជាតិខ្មែរម្នាក់ ចាប់តាំងពីថ្ងៃទី៧ខែតុលា រហូតមកដល់បច្ចុប្បន្ន និងមុនពេលនេះផងដែរ ទាំងនៅក្នុងរដ្ឋប៉ាឡេស្ទីន និងរដ្ឋអ៊ីស្រា
អែល ។ ជម្លោះប៉ាឡេស្ទីន-អ៊ីស្រាអែល គឺជាបញ្ហាដ៏ស្មុគស្មាញ និងផុយស្រួយបំផុត ។
លោកស្រីអ៊ាត សោភាបាន បញ្ជាក់ថា៖« កម្ពុជាថ្កោលទោសរាល់អំពើភេរវកម្ម និងអំពើហឹង្សាលើជនស៊ីវិលស្លូតត្រង់ ដោយមិនគិតពីពូជសាសន៍ វប្បធម៌ ឬសាសនាអ្វីឡើយ»។ ជាមួយគ្នានោះដែរលោកស្រីថា «យើងមានការព្រួយបារម្ភយ៉ាងខ្លាំង ចំពោះការកើនឡើងនៃអំពើហិង្សា ទុក្ខវេទនា និងការបាត់បង់ជីវិតមនុស្សស្លូតត្រង់-ស្ត្រី កុមារ ទារក និងចាស់ជរា នៅលើទឹកដីនៃជម្លោះ បច្ចុប្បន្ន» ។
លោកស្រីបន្ថែមថា ការស្អប់ខ្ពើម និងការសងសឹក នឹងនាំទៅរកវដ្តថ្មីមួយទៀតនៃការស្អប់ខ្ពើម និងការសងសឹក។ សង្គ្រាម មិនអាចបញ្ចប់សង្គ្រាម និងនាំមកនូវសន្តិភាព យូរអង្វែង ក៏ដូចជាការរួមរស់ជាមួយគ្នាប្រកបដោយភាពសុខដុមបាននោះទេ។ លើសពីនេះ ជំរុញឲ្យមានការដោះលែងជនស៊ីវិលទាំងអស់ ដែលត្រូវបានចាប់ជា ចំណាប់ខ្មាំង។
អំពាវនាវឲ្យភាគីទាំងអស់ ចៀសវាងការវាយប្រហារតម្រង់ទៅលើជនស៊ីវិល និងហេដ្ឋារចនា សម្ព័ន្ធស៊ីវិល ព្រមទាំងអនុញ្ញាតការបើកច្រកដោយគ្មានឧបសគ្គសម្រាប់ផ្ដល់ជំនួយ មនុស្សធម៌សំខាន់ៗដូចជា អាហារ ទឹក និងថ្នាំពេទ្យ ដល់ប្រជាជនដែលត្រូវការជំនួយ ស្របតាមច្បាប់ មនុស្សធម៌អន្តរជាតិ។
លោកស្រីតំណាងអចិន្ដ្រៃយ៍កម្ពុជា បញ្ជាក់ថា «យើងខ្ញុំសូមអំពាវនាវដល់សហគមន៍អន្តរជាតិ ឲ្យរួបរួមគ្នាក្នុងស្មារតីនៃសាមគ្គីភាព និងស្មោះស្ម័គ ពិតប្រាកដ ដើម្បីជំរុញឲ្យមានកិច្ចសន្ទនា និងការចរចាប្រកបដោយអត្ថន័យ នាំទៅរកសន្តិភាពដ៏ត្រឹម ត្រូវ និងយូរអង្វែង»៕
ចែករំលែកព័តមាននេះ