ខេត្តបាត់ដំបង ៖ ទូកងដែលមានប្រវែងគ្រប់ខ្នាតប្រមាណ៤៥ទូក និងកីឡាករ-កីឡាការិនីប្រមាណជិត១៦០០នាក់ ដែលមកពីតាមបណ្ដាខេត្តចំនួន០៤ ត្រូវចូលរួមប្រណាំងប្រជែង ក្នុងពិធីបុណ្យអុំទូក បណ្ដែតប្រទីប ដែលនឹងចាប់ផ្ដើមនៅម៉ោង១រសៀលថ្ងៃទី២៨ តុលានេះ…
ខេត្តបាត់ដំបង ៖ ទូកងដែលមានប្រវែងគ្រប់ខ្នាតប្រមាណ៤៥ទូក និងកីឡាករ-កីឡាការិនីប្រមាណជិត១៦០០នាក់ ដែលមកពីតាមបណ្ដាខេត្តចំនួន០៤ ត្រូវចូលរួមប្រណាំងប្រជែង ក្នុងពិធីបុណ្យអុំទូក បណ្ដែតប្រទីប ដែលនឹងចាប់ផ្ដើមនៅម៉ោង១រសៀលថ្ងៃទី២៨ តុលានេះ នៅក្នុងដងស្ទឹងសង្កែ ស្ថិតនៅចំកណ្ដាលបេះដូងនៃទីក្រុងបាត់ដំបង។
យោងតាមរបាយការណ៍សង្ខេបរបស់លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្ត បានឲ្យដឹងថា ចំនួនទូកដែលនឹងត្រូវចូលប្រកូតក្នុងពិធីបុណ្យអុំទូកក្នុងឆ្នាំនេះ មានសរុបចំនួន៤៥ទូក និង មានកីឡាករ កីឡាការិនីចំនួន១៥៩៦នាក់ ។ លោកបានសរសេរនៅក្នុងរបាយការណ៍ដដែលថា ទូកផ្កាចា ដែលមានចំណុះពី០៦ទៅ១០នាក់មានចំនួន០៨ទូក។ ទូកខ្នាតអន្តរជាតិ បុរស នារី ចំណុះ២២នាក់មានចំនួន០៨ទូក ។ ទូកខ្លីប្រពៃណីជាតិចំណុះ២៣នាក់ មានចំនួន២៣ទូក ក្នុងនោះ មាន០៣ទូកជាទូកមិត្តភាព និង ទូកងវែងប្រពៃណីជាតិចំណុះ៦៨នាក់ មានចំនួន០៦ទូក ។
បើតាមគណៈកម្មការរៀបចំពិធីបុណ្យអុំទូក បណ្ដែតប្រទីបនេះ បានឲ្យដឹងថា ចំនួនទូក និង កីឡាករ កីឡារិនី ដែលបានមកចូលរួមប្រកូតប្រជែងក្នុងពិធីបុណ្យប្រពៃណីខ្មែរដ៏ពេញនិយម មានមកពីខេត្តប៉ៃលិន ខេត្តបន្ទាយមានជ័យ ខេត្តពោធិ៍សាត់ និងខេត្តបាត់ដំបង ។
ពិធីប្រណាំងទូកនេះនឹងត្រូវចាប់ផ្ដើមនៅវេលាម៉ោង០១រសៀលថ្ងៃទី២៨ តុលានេះ ក្រោមអធិបតីភាព លោក សុខ លូ អភិបាលខេត្តបាត់ដំបង ថ្នាក់ដឹកនាំតាមខេត្តនានាផង ដែលបានចូលរួម និងថ្នាក់ដឹកនាំតាមអង្គភាពរដ្ឋនានានៅក្នុង ហើយនឹងបញ្ចប់នៅល្ងាចថ្ងៃទី២៩ តុលា ក្រោមអធិបតិភាពសម្ដេចក្រឡាហោម ស ខេង ឧត្តមក្រុមប្រឹក្សា ព្រះមហាក្សត្រ អញ្ជើញប្រកាស និង ប្រគល់ពានរង្វាន់ដល់ទូកដែលទទូលជ័យលាភី ។
សូមបញ្ជាក់ផងដែរថា នៅក្នុងពិធីបុណ្យអុំទូក បណ្ដែតប្រទីប ដែលជាទំនៀមទំលាប់ដ៏ធំដុំពីដូនតាខ្មែរនេះ ការប្រណាំងទូកបានធ្វើឡើងនៅពេលថ្ងៃ លុះនៅពេលរាត្រីក៏មានការរៀបចំបណ្ដែតប្រទីប បង្ហោះគោម ប្រគុំតន្ត្រី បាញ់កាំជ្រូច និងការចូលរួមសម្ដែងសិល្បៈពីអង្គការហ្វាពន្លឺសិល្បៈដ៏ល្បីល្បាញ ដើម្បីទស្សនាកម្សាន្ត ហើយក៏មានស្ដង់ ឬតូបលក់ទំនិញគ្រប់ប្រភេទ និងលក់អាហាររាប់រយកន្លែង សម្រាប់តម្រូវការដល់មហាជនដែលធ្វើដំណើរកំម្សាន្តទៀតផង។ នេះបើតាមការជូនដំណឹងរបស់មន្ទីរទេសចរណ៏ខេត្ត ៕
ចែករំលែកព័តមាននេះ