ខេត្តពោធិ៍សាត់ ៖ មន្ត្រីអធិការដ្ឋានរដ្ឋបាលព្រៃឈើខាងត្បូងបឹងទន្លេសាបសហការជាមួយផ្នែករដ្ឋបាលព្រៃឈើភ្នំក្រវាញ និងកងរាជអាវុធហត្ថលើផ្ទៃប្រទេសកាលពីរសៀលថ្ងៃទី១៧ ឧសភា ២០១១ បានព័ទ្ធផ្ទះឈ្មោះហួន ហាំង មេប៉េអឹម ស្រុកភ្នំក្រវាញ ដើម្បីឆែកឆេររកបទល្មើសព្រៃឈើ ។ លោកមាស សម្បត្តិ មន្ត្រីព្រៃឈើខាងត្បូងបឹងទន្លេសាបឱ្យដឹងថា
ខេត្តពោធិ៍សាត់ ៖ មន្ត្រីអធិការដ្ឋានរដ្ឋបាលព្រៃឈើខាងត្បូងបឹងទន្លេសាបសហការជាមួយផ្នែករដ្ឋបាលព្រៃឈើភ្នំក្រវាញ និងកងរាជអាវុធហត្ថលើផ្ទៃប្រទេសកាលពីរសៀលថ្ងៃទី១៧ ឧសភា ២០១១ បានព័ទ្ធផ្ទះឈ្មោះហួន ហាំង មេប៉េអឹម ស្រុកភ្នំក្រវាញ ដើម្បីឆែកឆេររកបទល្មើសព្រៃឈើ ។
លោកមាស សម្បត្តិ មន្ត្រីព្រៃឈើខាងត្បូងបឹងទន្លេសាបឱ្យដឹងថា នៅថ្ងៃទី១៧ ឧសភាវេលាម៉ោង ៤រសៀលភ្នាក់ងារផ្តល់ព័ត៌មានថា ផ្ទះលោកហួន ហាំង នៅឃុំលាច កំពុងលើកឈើគ្រញូងរៀបដាក់ក្នុងរថយន្តកាមរីភ្លាម ។ ភ្លាមៗនោះលោកបានសហការជាមួយមេព្រៃភ្នំក្រវាញ និងកងរាជអាវុធហត្ថលើផ្ទៃប្រទេសទៅបង្ក្រាបជាបន្ទាន់ ។ ពេលទៅដល់ផ្ទះមានរថយន្តកាមរីពណ៌សមួយគ្រឿងបើកពាំងផ្លូវសមត្ថកិច្ចបង្កឱកាសឱ្យរថយន្តកាមរីឆ្លាមបើកគេចទៅបាត់ ។ សមត្ថកិច្ចបានព័ទ្ធផ្ទះលោកហួន ហាំង រកឃើញឈើគ្រញូងនៅសល់១០៨ដុំ ស្មើនឹង០,៣៦២ម៉ែត្រគូប និងបានដកហូតម៉ាស៊ីនច្រៀកឈើមួយគ្រឿង ។ ពេលព័ទ្ធផ្ទះឆែកឆេររកបទល្មើសនោះក្រុមគ្រួសាររបស់លោកហួន ហាំង ប្រើពាក្យសំដីអសុរោះមកលើសមត្ថកិច្ច ។
មន្ត្រីរាជការ និងប្រជាពលរដ្ឋនៅទីនោះនិយាយថា លោកហួន ហាំង មេប៉េអឹមរងស្រុកភ្នំក្រវាញដើរតួជាសមត្ថកិច្ចផង រកស៊ីបទល្មើសខ្លួនឯងផង ។ ឈើដែលលាក់ទុកក្នុងផ្ទះបើកសិប្បកម្មកែច្នៃនោះភាគច្រើនគឺឈើចាប់ពីឈ្មួញចាប់ពីអ្នកដឹកតាមរទេះ អ្នកដឹកតាមម៉ូតូជាដើម គ្មានការយោគយល់ចំពោះប្រជាជនក្រីក្រឡើយ សូម្បីតែប្ញសឈើគាស់ពីដីចំការក៏ដោយ ។ លោកហួន ហាំង មិនអាចទាក់ទងបានដើម្បី សុំការបំភ្លឺជុំវិញការចោទប្រកាន់នេះ ។ ចំណែកមន្ត្រីប៉េអឹមស្រុកភ្នំក្រវាញម្នាក់និយាយ ថា បញ្ហានេះក្បាលអ្នកណាសក់អ្នកហ្នឹង ។
ដោយឡែកនៅថ្ងៃទី១៧ និង១៨ ឧសភា ឆ្នាំ ២០១១ សមត្ថកិច្ចដដែលបានឃាត់រថយន្តដឹកឈើចំនួន៤គ្រឿងទៀតនៅស្រុកភ្នំក្រវាញ ក្នុងនោះមានកាមរីបាឡែន ស៊េរី២០០២មួយគ្រឿង កាមរីស៊េរី៩៣ពីរគ្រឿង និងស៊េរី៩១មួយគ្រឿង ។ រថយន្តទាំង៤គ្រឿងផ្ទុកឈើគ្រញូងសរុប៣៥១ដុំ ស្មើនិង ២,២៣៩ម៉ែត្រគូប ។
លោកជា ហួត នាយផ្នែករដ្ឋបាលព្រៃឈើ ស្រុកភ្នំក្រវាញមានប្រសាសន៍ថា «យើងស្គាល់មុខសញ្ញាអស់ហើយ សូមម្ចាស់រថយន្តនីមួយៗចូលខ្លួនមកបង់ពិន័យ ដើម្បីយករថយន្តទៅវិញតាមច្បាប់រដ្ឋបាលព្រៃឈើ ។ បើក្នុងរយៈពេលមួយខែមិនចូលខ្លួនមកទេនឹងរឹបអូសទុកជា សម្បត្តិរដ្ឋ ហើយម្ចាស់នឹងបំពេញសំណុំបែបបទតាមនីតិវិធីបញ្ជូនទៅតុលាការ» ។ អ្នករកស៊ីឈើទីបំផុតខ្លះត្រូវសមត្ថកិច្ចរឹបអូសនៅសល់តែខោខ្លី ខ្លះជាប់គុក ខ្លះរត់ចោលស្រុក ខ្លះជួបគ្រោះថ្នាក់ចរាចរណ៍ស្លាប់ ឬស្លាប់ដោយប្រការផ្សេងៗជាយថាហេតុដែលគេមានជំនឿថា «ត្រូវទំនាយព្រៃឈើ»៕
ចែករំលែកព័តមាននេះ