រាជធានីភ្នំពេញ ៖ ថ្លែងពីទឹកដីខេត្តកំពង់ចាម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងបញ្ជាក់ថា ការបោះឆ្នោត…
រាជធានីភ្នំពេញ ៖ ថ្លែងពីទឹកដីខេត្តកំពង់ចាម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងបញ្ជាក់ថា ការបោះឆ្នោត គឺជាកុងត្រានៅក្នុងលទ្ធិប្រជាធិបតេយ្យ រវាងអ្នកដឹកនាំនយោបាយ ជាមួយនឹងប្រជាពលរដ្ឋ ខណៈរាជរដ្ឋាភិបាល ធ្វើមិនល្អ ប្រជាពលរដ្ឋនឹងផ្ដាច់កុងត្រា ហើយនឹងមិនបោះឆ្នោតឲ្យ ដើម្បីគាំទ្រការដឹកនាំនៅក្នុងអាណត្ដិក្រោយ បន្ដទៀតទេ ។
សម្តេចធិបតី ថ្លែងបែបនេះ នៅក្នុងពិធីសំណេះសំណាលជាមួយកម្មករ-និយោជិត ចំនួន១២,០៦០នាក់ នៅតាមបណ្តារោងចក្រ សហគ្រាស ដែលមានមូលដ្ឋានស្ថិតនៅក្នុងស្រុកព្រៃឈរ និងស្រុកកំពង់សៀម ខេត្តកំពង់ចាម នាព្រឹកថ្ងៃទី ២៥ ខែតុលា ឆ្នាំ២០២៣ ថា កុងត្រានេះ មានរយៈពេល៥ឆ្នាំម្ដង ហើយប្រសិនបើរាជរដ្ឋាភិបាល ធ្វើមិនល្អ ប្រជាពលរដ្ឋនឹងផ្ដាច់កុងត្រា ក្នុងពេលទៅបោះឆ្នោត។ ប៉ុន្ដែបើ អ្នកធ្វើការកាន់តែល្អ ប្រជាពលរដ្ឋគឺជាអ្នកផ្ដល់កុងត្រា ហើយផ្ដល់សំឡេងកាន់តែច្រើនថែមទៀត និងកាន់តែកើនឡើង ។
សម្ដេចនាយករដ្ឋមន្ត្រី បានលើកឡើងថា ជាក់ស្ដែងការបោះឆ្នោត ជ្រើសតាំងតំណាងរាស្ដ្រ ក្នុងអាណត្ដទី៧ ឆ្នាំ២០២៣នេះ គឺប្រមាណ ៨២,០៣ភាគរយ ដែលស្មើនឹងជាង ៦លាននាក់ និងជាង៤០ម៉ឺននាក់ ក្នុងចំណោមប្រជាជនសរុបជាង ៥៥ម៉ឺននាក់ នៅក្នុងខេត្ដកំពង់ចាម ដែលបានផ្ដល់កុងត្រាផ្ដល់នូវទំនុកចិត្ដជូនគណបក្សប្រជាជនកម្ពុជា ដើម្បីឲ្យកុងត្រានេះ កាន់តែរឹងមាំថែមទៀត ។
ជាមួយគ្នានោះដែរ សម្ដេចធិបតី បានថ្លែងទៀតថា នៅពេល ដែលអ្នកដឹកនាំ ឬក៏រាជរដ្ឋាភិបាល ធ្វើកាន់តែល្អ គឺប្រជាពលរដ្ឋ កាន់តែបោះឆ្នោតឲ្យ ហើយសំឡេងឆ្នោត ក៏កាន់តែកើតឡើង ផ្ដល់កុងត្រាឲ្យគណបក្សនយោបាយកាន់តែរឹងមាំថែមទៀត ។
នៅចំពោះមុខកម្មករ សម្ដេចធិបតី ហ៊ុន ម៉ាណែត បានអះអាងថា ៖ «កុងត្រាកាន់តែរឹងមាំ ការគាំទ្រ ក៏កាន់តែរឹងមាំ អ៊ីចឹង ដើម្បីបានបន្ដកុងត្រា នៅឆ្នាំ២០២៨ រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា បានប្ដេជ្ញាចិត្ដ និងដាក់ទិសដៅយ៉ាងច្បាស់លាស់ រៀបចំផែនការ និងគោលនយោបាយបាយច្បាស់លាស់ ដើម្បីបន្ដបម្រើប្រជាពលរដ្ឋ ឲ្យកាន់តែល្អ និងបន្ដបានផលច្រើនថែមជាងនេះតទៅទៀត» ៕
ចែករំលែកព័តមាននេះ