រាជធានីភ្នំពេញ ៖ ថ្លែងចេញពីទឹកដីខេត្តកំពងចាម សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងបែបចំអកឡកឡើយថា មានអ្នកខ្លះ បានចេញមុខរៃអង្គាសលុយ ដើម្បីទិញសំបុត្រយន្តហោះ ជួយពលរដ្ឋខ្មែរ នៅអ៊ីស្រាអ៊ែល ប៉ុន្តែ ១០ថ្ងៃជាងហើយ មិនឃើញលទ្ធផលអ្វីនោះទេ ។
សម្តេចធិបតី បានលើកឡើងក្នុងពិធីសំណេះសំណាល ជាមួយកម្មករកម្មការរិនី នៅខេត្តកំពង់ចាម នាព្រឹកថ្ងៃទី២៥ ខែតុលា ឆ្នាំ២០២៣ ថា លទ្ធផល ដែលសម្តេចសំដៅដល់នោះ គឺមិនឃើញមានសកម្មភាព ទិញសំបុត្រយន្តហោះ ទៅដឹកពលរដ្ឋខ្មែរ កំពុងធ្វើការ និងនិស្សិតខ្មែរ នៅអ៊ីស្រាអ៊ែល នោះទេ ។
សម្តេច ក៏ថ្លែងបានបែបឌឺដង ទៅកាន់អ្នកប្រកាសទៀតថា តែបើក្នុងករណី បុគ្គលម្នាក់នោះ ត្រូវការរៃអង្គាសទិញសំបុត្រយន្តហោះខ្លួនឯងទៅអាមេរិក ឬប្រទេសណាមួយនោះ គឺលឿនរហ័សណាស់ ដូច្នេះបុគ្គលរូបនោះ បានតែស្រែកចោលនោះទេ គឺគ្មានប្រយោជន៍អ្វីឡើយ ។
សម្តេចធិបតី ហ៊ុន ម៉ាណែត បានគូសបញ្ជាក់ថា ៖ «អ្នកខ្លះ អ្នកនយោបាយចាស់វស្សា ចេញមកវាយរដ្ឋាភិបាល ហើយមានអ្នកខ្លះ អួតណាស់ រករៃអង្គាសលុយ ដើម្បីទិញសំបុត្រយន្តហោះ ឲ្យនិស្សិតខ្មែរ ត្រឡប់មកវិញ តែមកដល់ម៉ោងនេះ ១០ថ្ងៃជាងហើយ អត់ឃើញប្រកាសរៃអង្គាសលុយ តែបើគាត់ជិះយន្តហោះទៅអាមេរិក បារាំង អូស្ត្រាលី អង្គាសលុយខ្លួនញឹក» ។
ក្នុងឱកាសនោះដែរ សម្តេចនាយករដ្ឋមន្ត្រី បានរៀបរាប់អំពីពលរដ្ឋខ្មែរ នៅអ៊ីស្រាអ៊ែល អោយដឹងថា ក្នុងមួយថ្ងៃសម្តេចបានទទួលព័ត៌មានពីគ្រប់ស្ថាប័នពាក់ព័ន្ធពីពលរដ្ឋខ្មែរ នៅអ៊ីស្រាអ៊ែល ចំនួន៤ដង គឺពួកគេមានសុវត្ថិភាពគ្រប់គ្រាន់ ដោយសាររាជរដ្ឋាភិបាលបានយកចិត្តទុកដាក់ គ្រប់ពេលមិនដែលព្រងើយកន្តើយឡើយ ។
សម្តេច ក៏បានត្រៀមលក្ខណៈមធ្យោបាយ ជាយថាហេតុគ្រប់ពេលផងដែរ បើមានករណីណាមួយកើតឡើង នឹងជួយឲ្យទាន់ពេលវេលា ។
សម្តេចនាយករដ្ឋមន្ត្រី ក៏បានផ្តាំទៅអ្នកចោទប្រកាន់ និងវាយប្រហារមកលើរាជរដ្ឋាភិបាលកម្ពុជា អំពីពលរដ្ឋខ្មែរ នៅអ៊ីស្រាអ៊ែល ថា ពូកែយកមុខមាត់នោះ សូមបន្តយកមុខទៀតចុះ តែសម្តេច ក៏បញ្ជាក់បកត្រឡប់ទៅវិញ សម្រាប់ពលរដ្ឋខ្មែរ នៅអ៊ីស្រាអ៊ែល គឺមិនទុកពួកគាត់ចោលទេ ដោយរួមសហការជាមួយគ្នាជានិច្ច។ សម្តេចថា នេះហើយ ភាពខ្លាំងរបស់កម្ពុជា ទោះបីជាមានការវាយប្រហារយ៉ាងណា ក៏ដោយ ។
សម្តេចធិបតី ហ៊ុន ម៉ាណែត គូសបញ្ជាក់ថា “អ្នកក្រៅប្រទេស ពូកែយកគុណសម្បត្តិណាស់ ប៉ុន្តែយកទៀតចុះ ចង់អ្នកយកយ៉ាងម៉េច យកទៀតទៅ ខ្ញុំមិនឈឺក្បាលទេ អ្វីសំខាន់ប្រជាពលរដ្ឋខ្ញុំនៅគ្រប់កន្លែង យើងអាចក្តាប់បាន យើងអាចជួយបាន តាមលទ្ធភាពយើងជួយបានដោយត្រៀមលក្ខណៈទាំងអស់។ នេះជាការពិត” ។
សូមជម្រាបថា ការលើកឡើងរបស់សម្តេចធិបតី ហ៊ុន ម៉ាណែត នេះក្រោយមានករណីសង្គ្រាមនៅអ៊ីស្រាអ៊ែល ភ្លាមៗរវាងក្រុមហាម៉ាស់របស់ប៉ាឡេស្ទីននោះ លោក សម រង្ស៊ី នៅកំពុងរស់នៅក្រៅប្រទេស និងគូកនខ្លួន បាននាំគ្នាលើកឡើង ក្នុងបណ្តាញសង្គម និងបណ្តាញព័ត៌មានប្រឆាំងរាជរដ្ឋាភិបាល បានចេញផ្សាយព្រោងព្រាតថា នឹងចេញមុខ រៃអង្គាសប្រាក់ជួយពលរដ្ឋខ្មែរនៅអ៊ីស្រាអ៊ែល ដូចជាការទិញសំបុត្រយន្តហោះ ដើម្បីជួយពលរដ្ឋខ្មែរ ឲ្យមកស្រុកកំណើតវិញ ៕
ចែករំលែកព័តមាននេះ