- ភ្នំពេញ
កសិកម្មជាសសរស្តម្ភសេដ្ឋកិច្ចកម្ពុជាមួយដ៏សំខាន់។ ទោះពេលទទួលរងព្យុះភ្លៀងពីវិបត្តិសកលនានា ដូចជាជំងឺកូវីដ១៩ យ៉ាងណាក្តី កសិកម្មនៅតែឈរយ៉ាងរឹងមាំទ្រងទ្រង់សេដ្ឋកិច្ចកម្ពុជា ជាពិសេសបានរួមចំណែកលើកកម្ពស់
កសិកម្មជាសសរស្តម្ភសេដ្ឋកិច្ចកម្ពុជាមួយដ៏សំខាន់។ ទោះពេលទទួលរងព្យុះភ្លៀងពីវិបត្តិសកលនានា ដូចជាជំងឺកូវីដ១៩ យ៉ាងណាក្តី កសិកម្មនៅតែឈរយ៉ាងរឹងមាំទ្រងទ្រង់សេដ្ឋកិច្ចកម្ពុជា ជាពិសេសបានរួមចំណែកលើកកម្ពស់ ទ្រទ្រង់ជីវភាពប្រចាំថ្ងៃរបស់កសិករខ្មែរ។
ប្រជាពលរដ្ឋនៅលើពិភពលោក មានការព្រួយបារម្ភពីសន្តិសុខស្បៀង តែកម្ពុជាគ្មានការព្រួយបារម្ភពីករណីនេះឡើយ។ ផ្ទុយទៅវិញ ផលពីវិស័យកសិកម្ម បានចូលរួមចំណែកដល់សេដ្ឋកិច្ចជាតិទៀតផង។ ការអភិវឌ្ឍន៍វិស័យកសិកម្ម នឹងធ្វើឱ្យសេដ្ឋកិច្ចកសិករ ក៏ដូចជា ប្រទេសជាតិរីកចម្រើន ជាពិសេសនឹងផ្តល់ការងារដល់ពលរដ្ឋបានមួយផ្នែកផង។
ផ្អែកលើទីតាំងភូមិសាស្ត្រ និងប្រវត្តិសាស្ត្រ ពលរដ្ឋកម្ពុជាទំនងមិនអាចប្រឈមនឹងការខ្វះស្បៀងអាហារទទួលទាននោះឡើយ។ ដីកម្ពុជា សម្បូរជីវជាតិ អាចដាដុះដំណាំច្រើនប្រភេទ។ គេបានដឹង កម្ពុជានៅមិនទាន់ប្រើប្រាស់ធនធានដែលមានឱ្យអស់ក្នុងវិស័យកសិកម្មនោះឡើយ។ បច្ចុប្បន្ន គេបានសង្កេតឃើញថា ដីនៅជនបទជាច្រើន នៅទុកទំនេរចោល។
កាលពីពេលថ្មីៗនេះ នៅក្នុងពេលសកលលោកជួបវិបត្តិស្បៀងអាហារដោយសារជំងឺកូវីដ១៩ កម្ពុជា មិនត្រឹមមិនខ្វះស្បៀងនោះទេ តែវិស័យកសិកម្ម បានចូលរួមទ្រង់ទ្រកំណើនសេដ្ឋកិច្ចជាតិបានទៀងផង។ មេរៀននេះ បានបញ្ជាក់ថា នៅក្នុងកាលៈទេសៈណាក៏ដោយ ឱ្យតែពលរដ្ឋកម្ពុជា ឧស្សាហ៍ដាំដុះ ឧស្សាហ៍ចិញ្ចឹមសត្វ ហើយមានការគាំទ្រពីរាជរដ្ឋាភិបាលទៀតនោះ ការចិញ្ចឹមជីវិតនៅកម្ពុជា មិនមានការលំបាកឡើយ។
ឆ្នាំ២០២២ វិស័យកសិកម្ម ត្រូវគេដឹងថា បានរួមចំណែកជាង ២២ភាគរយ នៃផលិតផលសរុបក្នុងស្រុក (GDP) កម្ពុជា។ ផលិតផលកសិកម្មចំនួន ៨,៦លានតោន ដែលស្មើនឹងតម្លៃសរុបជិត ៥ពាន់លានដុល្លារ ត្រូវបានកម្ពុជានាំចេញជាផ្លូវការទៅទីផ្សារអន្តរជាតិ។ កាលពីឆ្នាំ២០២២ ការនាំចេញអង្ករសម្រេចបាន ៦៣៧ពាន់តោន កើន ៣,២៣ភាគរយ ធៀបឆ្នាំ២០២១ និងកសិផលក្រៅពីស្រូវអង្ករចំនួន ៥,៧៨លានតោន កើនពីចំនួន ៥,០១លានតោន។
ប៉ុន្តែមានការមើលឃើញថា ចំនួនប្រជាជនកម្ពុជា ដែលធ្វើការក្នុងវិស័យកសិកម្មបានថយចុះគួរឲ្យកត់សម្គាល់នៅក្នុងរយៈពេលប៉ុន្មានឆ្នាំចុងក្រោយ ដោយសារចរន្តនៃការធ្វើចំណាកស្រុក។ នៅក្នុងចំណោមពលរដ្ឋខ្មែរ ដែលបានធ្វើចំណាកស្រុកទៅធ្វើការនៅប្រទេសថៃ គឺមួយចំនួនបានទៅលក់កម្លាំងពលកម្ម នៅតាមចម្ការដំឡូង ចម្ការពោត និងចម្ការផ្លែរបស់គេប៉ុណ្ណោះ។ ក្រៅពីថៃ ពលរដ្ឋខ្មែរទៅលក់កម្លាំងពលកម្មក្នុងវិស័យកសិកម្ម នៅប្រទេសកូរ៉េខាងត្បូង និងជប៉ុនទៀតផង។ ក្នុងចំណោមពលករដែលបានចំណាកស្រុកបានលើកឡើងថា «ប្រសិនជានៅកម្ពុជាមានការងារធ្វើ ហើយកម្រៃពលកម្មសមរម្យនោះ ពួកគេនឹងមិនធ្វើចំណាកស្រុកឡើយ»។
រាជរដ្ឋាភិបាលអាណត្តិទី៧ បានដាក់ចេញនូវវិធានការលើកកម្ពស់វិស័យកសិកម្ម។ ការពង្រាយមន្ត្រីជំនាញកសិកម្ម ចុះតាមឃុំនៅទូទាំងប្រទេសជាការងារអាទិភាព មួយដែលរដ្ឋបានប្រកាស ដើម្បីជួយគាំទ្រលើកការងារបច្ចេកទេស ទាំងបច្ចេកកសិកម្ម និងបច្ចេកទេសគ្រប់គ្រងហិរញ្ញវត្ថុ ជាពិសេសការណែនាំពីរបៀបប្រើប្រាស់ទឹក ដើម្បីឱ្យសមស្របនឹងប្រភេទដំណាំដែលកសិករបានដាំដុះ។
ក្រៅពីនេះ ការពង្រឹងគុណភាព និងបច្ចេកទេសដាំដុះ ទីផ្សារលក់កសិផល ថ្លៃដើមនៃការដាំដុះ ដូចជា ៖ តម្លៃជីកសិកម្ម តម្លៃពូជ តម្លៃអគ្គិសនី ការផ្តល់ប្រភពទឹកក្នុងការដាំដុះតាមរយៈការកសាងប្រព័ន្ធធារាស្ត្រ ប្រឡាយបន្ថែម សុទ្ធសឹងជាការងារដែលគេមិនត្រូវមើលរំលងបាននោះទេ។ ការអភិវឌ្ឍន៍ និងលើកកម្ពស់វិស័យកសិកម្ម ជាការចាំបាច់ដោយសារតែកសិកម្មជាផ្នែកសំខាន់នៅក្នុងការទ្រទ្រង់សេដ្ឋកិច្ចជាតិ និងពលរដ្ឋនៅគ្រប់កាលៈទេសៈ និងជាប្រវត្តិសាស្ត្រមកហើយ ដែលពលរដ្ឋខ្មែរបានរស់នៅដោយពឹងកសិកម្ម។
ទោះកម្ពុជា ឆ្ពោះទៅការអភិវឌ្ឍន៍សេដ្ឋកិច្ច បែបឧស្សាហកម្មយ៉ាងណាក្តី តែវិស័យកសិកម្ម នៅតែដើរតួនាទីសំខាន់នៅក្នុងជីវភាពពលរដ្ឋ និងសេដ្ឋកិច្ចជាតិ ។ អតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន ធ្លាប់បានលើកឡើងថា វិស័យកសិកម្មនៅតែបន្តតួនាទីជាមូលដ្ឋានដ៏សំខាន់នៃកំណើនសេដ្ឋកិច្ច និងការអភិវឌ្ឍសង្គមកម្ពុជាក្នុងទសវត្សរ៍ខាងមុខ ទោះបីជាកម្ពុជា បានធ្វើពិពិធកម្មសេដ្ឋកិច្ចរបស់ខ្លួនក៏ដោយ៕
ដោយ ប្រេវីន
ចែករំលែកព័តមាននេះ