រាជធានីភ្នំពេញ ៖ រថយន្តហ្ស៊ីប (JEEP) ស៊េរីចាស់មួយគ្រឿងពាក់ស្លាកលេខ 2M-6730 បានបើកទៅបុកម៉ូតូកង់បីពីក្រោយ បណ្តាលឱ្យក្រឡាប់បះកង់និងធ្វើឱ្យអ្នកបើកម៉ូតូរបួសធ្ងន់ ក៏ប៉ុន្តែបន្ទាប់ពីបុកម៉ូតូហើយរថយន្តនោះបានជ្រុលឡើងលើចិញ្ចើមទៅបុកចូលហាងជួសជុលម៉ូតូទើបឈប់។ ហេតុការណ៍គ្រោះថ្នាក់ចរាចរណ៍
រាជធានីភ្នំពេញ ៖ រថយន្តហ្ស៊ីប (JEEP) ស៊េរីចាស់មួយគ្រឿងពាក់ស្លាកលេខ 2M-6730 បានបើកទៅបុកម៉ូតូកង់បីពីក្រោយ បណ្តាលឱ្យក្រឡាប់បះកង់និងធ្វើឱ្យអ្នកបើកម៉ូតូរបួសធ្ងន់ ក៏ប៉ុន្តែបន្ទាប់ពីបុកម៉ូតូហើយរថយន្តនោះបានជ្រុលឡើងលើចិញ្ចើមទៅបុកចូលហាងជួសជុលម៉ូតូទើបឈប់។ ហេតុការណ៍គ្រោះថ្នាក់ចរាចរណ៍ដែលបង្កឡើងដោយរថយន្តហ្ស៊ីបនេះ បានកើតនៅចំណុចហាងជួសជុលម៉ូតូយីហោលីដា (LIDA) ផ្ទះលេខ៩A វិថីព្រះស៊ីសុវត្ថិ សង្កាត់ស្រះចក ខណ្ឌដូនពេញ កាលពីវេលាម៉ោង៣ទៀបភ្លឺ ថ្ងៃទី១៩ ឧសភា ២០១១ ។
អ្នករត់ម៉ូតូឌុបម្នាក់បាននិយាយឱ្យសមត្ថកិច្ចដឹងថា មុនពេលកើតហេតុគាត់បានឃើញរថយន្តមួយគ្រឿងម៉ាកហ្ស៊ីបស៊េរីចាស់បើកបរដោយបុរសជនបរទេសម្នាក់តាមវិថីព្រះស៊ីសុវត្ថិ ឆ្ពោះទៅទិសខាងជើងក្នុងល្បឿងលឿនក្រោយពីពួកគេចេញពីក្លឹបកំសាន្តមួយនៅម្តុំផ្សារកណ្តាលហើយម្នាក់ៗស្រវឹងធ្លាក់ភ្នែក។ លុះបើករថយន្តមកដល់ម្តុំកំពង់ផែថ្ម ស្រាប់តែទៅបុកម៉ូតូកង់បីមួយគ្រឿងពីក្រោយដែលបើកស្របទិសគ្នា បណ្តាលឱ្យម៉ូតូក្រឡាប់បះកង់ពីរ និងធ្វើឱ្យអ្នកបើកបររងរបួសធ្ងន់ដេកសន្លប់នៅលើថ្នល់់។ បន្ទាប់ពីបុកម៉ូតូកង់បីហើយ រថយន្តបង្កមិនបានឈប់នោះទេ ព្យាយាមបើកចាក់កួរត្រឡប់ក្រោយទៅទិសខាងត្បូង ដើម្បីគេចខ្លួន ក៏ប៉ុន្តែអ្នកបើកបរស្រវឹងធ្លាក់ភ្នែកខ្លាំងពេក មិនអាចម្ចាស់ការបាន ក៏ជ្រុលចង្កូតឡើងលើចិញ្ចើមផ្លូវខាងលិចរួចបោលទៅបុកទ្វារដែកហាងជួសជុលម៉ូតូយីហោលីដាបណ្តាលឱ្យទ្វាររលំ និងរថយន្តចូលក្នុងហាង ។
ម្ចាស់ហាងខាងលើបានឱ្យសមត្ថកិច្ចដឹងថា បើសិនជារថយន្តបើកចូលប្រហែលជាងមួយម៉ែត្រទៀតនោះ ប្រាកដមានអ្នកស្លាប់ ឬរបួស ជាមិនខាន ព្រោះមានមនុស្សដេកនៅលើប៉ៅអ៊ីក្នុងផ្ទះ។ បន្ទាប់ពីបុកទ្វារដែករលំនិងចូលដល់ក្នុងផ្ទះហើយនោះ រថយន្តមិនឈប់ទេ គឺអ្នកបើកបានដាក់លេខថយក្រោយបំរុងបើករត់ ប៉ុន្តែជ្រុលទៅបុកដើមអំពិលទៅមុខលែងរួច ស្របពេលនោះសាច់ញាតិម្ចាស់ហាងជួសជុលម៉ូតូនាំគ្នាបើកទ្វាររថយន្តកាច់សោកុងតាក់ពន្លត់ម៉ាស៊ីនទើបរថយន្តទៅណាលែងរួច៕
ចែករំលែកព័តមាននេះ