អត្រាពន្ធដែលកម្មសិទ្ធិករត្រូវដឹង៖ ពន្ធលើថ្លៃឈ្នួល ផ្ទះ និងដីធ្លី គឺជាប់តាមអត្រាកំណត់១០%
រាជធានីភ្នំពេញ៖ កន្លងមកយើងបានឃើញបងប្អូនមួយចំនួនបានដាក់ ផ្ទះ ដីធ្លី សម្រាប់ «ជួល»
រាជធានីភ្នំពេញ៖ កន្លងមកយើងបានឃើញបងប្អូនមួយចំនួនបានដាក់ ផ្ទះ ដីធ្លី សម្រាប់ «ជួល» ប៉ុន្តែមិនធ្លាប់បានដឹងច្បាស់នោះទេ ថាតើម្ចាស់អចលទ្រព្យ ដែលយើងហៅថា «កម្មសិទ្ធិករ» មានកាតព្វកិច្ចអ្វីខ្លះចំពោះអត្រាពន្ធលើថ្លៃឈ្នួលអចលទ្រព្យនោះទេ។
ថ្មីៗនេះ អគ្គនាយកដ្ឋានពន្ធដាបានប្រកាសឱ្យដឹងអំពី កាតព្វកិច្ចរបស់កម្មសិទ្ធិករ ឬសិទ្ធិវន្ត ចំពោះពន្ធលើថ្លៃឈ្នួលអចនទ្រព្យ ក៏ដូចជារយៈពេលនៃការចុះបញ្ជីនៅតាមបណ្តាសាខាពន្ធដាខេត្ត-ខណ្ឌផ្សេងៗ។
អគ្គនាយកដ្ឋានពន្ធដា បានឱ្យដឹងថា ពន្ធលើថ្លៃឈ្នួលអចលនទ្រព្យ ត្រូវអនុវត្តលើការជួលអចនទ្រព្យនៅក្នុងព្រះរាជាណាចក្រកម្ពុជា ដែលមានវិសាលភាពអនុវត្តលើកម្មសិទ្ធិករ ឬសិទ្ធិវន្តរបស់កម្មសិទ្ធិករនៃអចលទ្រព្យដែលមិនមែនជាអ្នកជាប់ពន្ធតាមរបបស្វ័យប្រកាស នឹងជាប់តាមអត្រាកំណត់ ១០% នៃថ្លៃឈ្នួលអចនទ្រព្យ។
ដើម្បីបំពេញកាតព្វកិច្ចសារពើពន្ធឱ្យបានត្រឹមត្រូវកម្មសិទ្ធិករ ឬសិទ្ធិវន្តរបស់កម្មសិទ្ធិករមានកាតព្វកិច្ច ដូចជា៖ ១- ចុះបញ្ជីនៅសាខាពន្ធដារខេត្ត-ខណ្ឌដែលអចលនទ្រព្យស្ថិតនៅក្នុងរយៈពេល ១៥ថ្ងៃ បន្ទាប់ពីចុះកិច្ចសន្យាជួល, ២- ជូនដំណឹងជាលាយលក្ខណ៍អក្សរមករដ្ឋបាលសារពើពន្ធក្នុងរយៈពេល ១៥ថ្ងៃ ក្រោយពេលឈប់ជួល, ៣- ត្រូវចេញបង្កាន់ដៃទទួលប្រាក់នៅពេលទទួលបានប្រាក់ឈ្នួល, ៤- ត្រូវដាក់លិខិតប្រកាសនិងបង់ប្រាក់ពន្ធជារៀងរាល់ខែយ៉ាងយឺតបំផុតត្រឹមថ្ងៃទី២០ នៃខែបន្ទាប់ ប្រសិនបើកិច្ចសន្យាតម្រូវឱ្យមានការ។
«បង់ប្រាក់សរុបសម្រាប់រយៈពេលច្រើនខែ ត្រូវប្រកាសនិងបង់ប្រាក់ពន្ធសរុបយ៉ាងយឺតបំផុតត្រឹមថ្ងៃទី២០ នៃខែបន្ទាប់ ក្រោយពេលទទួលបានថ្លៃឈ្នួល»។ នេះជាការបញ្ជាក់របស់អគ្គនាយកដ្ឋានពន្ធដា។ ទន្ទឹមនឹងនេះពន្ធលើថ្លៃឈ្នួលអចលនទ្រព្យត្រូវបានលើកលែងផងដែរ លើករណីដូចជា៖ ១- ថ្លៃឈ្នួលពីការជួលអចលនទ្រព្យរបស់រាជរដ្ឋាភិបាល ឬក្រសួង-ស្ថាប័នរាជរដ្ឋាភិបាល, ២- ថ្លៃឈ្នួលពីការជួលអចលនទ្រព្យរបស់បេសកកម្មការទូត ឬកុងស៊ុលបរទេស ឬអង្គការអន្តរជាតិ និងទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាលនានា។
ពន្ធលើថ្លៃឈ្នួលអចលនទ្រព្យត្រូវបានលើកលែងផ្សេងទៀត គឺ ៣- ថ្លៃឈ្នួលពីការជួលអចលនទ្រព្យរបស់អង្គការ ឬសមាគមណាមួយដែលត្រូវបានរៀបចំឡើងនិងដំណើរការសម្រាប់គោលដៅសុទ្ធសាធ ខាងសាសនា សប្បុរសធម៌ វិទ្យាសាស្ត្រ អក្សរសាស្ត្រ ឬអប់រំ និងគ្មានចំណែកណាមួយត្រូវបានប្រើប្រាស់ជាប្រយោជន៍ឯកជន, ៤- ប្រាក់ដែលអ្នកជួលបានតម្កល់ទុកជាប្រាក់ធានា និងប្រគល់ជូនអ្នកជួលវិញនៅពេលចប់កិច្ចសន្យា, ៥-ថ្លៃឈ្នួលដែលបានកាត់ទុកប្រាក់ពន្ធរួចហើយដោយសហគ្រាសជាអ្នកជាប់ពន្ធតាមរបបស្វ័យប្រកាស និង ៦-ថ្លៃឈ្នួលពីការជួលអចលនទ្រព្យរបស់សហគ្រាសជាអ្នកជាប់ពន្ធតាមរបបស្វ័យប្រកាសដែលបានគិតចូលក្នុងប្រាក់ចំណូលជាប់ពន្ធរបស់សហគ្រាសរួចហើយ៕
ចែករំលែកព័តមាននេះ