ខេត្តព្រៃវែង ៖ ក្រុមចោរចំនួន៤នាក់ ដែលសកម្មក្នុងការលួចម៉ូតូ និងកាច់កម៉ូតូ ត្រូវបានកម្លាំងកងរាជអាវុធហត្ថខេត្តព្រៃវែង តាមទៅក្របួចដល់រាជធានីភ្នំពេញ ក្រោយពីពួកគេធ្វើសកម្មភាពលួចកាច់កម៉ូតូ មួយគ្រឿង នៅទីប្រជុំជនអ្នកលឿង…
ខេត្តព្រៃវែង ៖ ក្រុមចោរចំនួន៤នាក់ ដែលសកម្មក្នុងការលួចម៉ូតូ និងកាច់កម៉ូតូ ត្រូវបានកម្លាំងកងរាជអាវុធហត្ថខេត្តព្រៃវែង តាមទៅក្របួចដល់រាជធានីភ្នំពេញ ក្រោយពីពួកគេធ្វើសកម្មភាពលួចកាច់កម៉ូតូ មួយគ្រឿង នៅទីប្រជុំជនអ្នកលឿង ហើយជិះយកទៅលាក់ទុកនៅសំបុករបស់ពួកគេឯរាជធានីភ្នំពេញ។
ករណីលួចកាច់កម៉ូតូនេះ បានកើតឡើងកាលពីយប់ថ្ងៃទី២៦ ខែមេសា ឆ្នាំ២០២៥ នៅចំណុចសណ្ឋាគារ ហង្សទន្លេមាស ដែលស្ថិតក្នុងភូមិជ័យឧត្តម ឃុំព្រែកខ្សាយ(ក) ស្រុកពាមរក៍ ខេត្តព្រៃវែង។ ម៉ូតូដែលត្រូវក្រុមចោរខាងលើលួច ម៉ាកហុងដា C125 ពណ៌ខ្មៅ ពាក់ស្លាកលេខ ភ្នំពេញ 1LI 0666 ជាកម្មសិទ្ធិរបស់ជនរងគ្រោះឈ្មោះ ម៉ៅ រ៉ាយុទ្ធ ភេទ ប្រុស អាយុ ២០ឆ្នាំ ធ្វើការនៅក្នុងសណ្ឋាគារកើតហេតុ ។
លោកវរសេនីយ៍ទោ ផាត់ សុជោត ប្រធានមន្ទីរស្រាវជ្រាវ និងបង្ក្រាបទល្មើសកងរាជអាវុធហត្ថខេត្តព្រៃវែង បានឲ្យដឹងថា ក្រុមចោរធ្វើសកម្មភាពលួចយកម៉ូតូជនរងគ្រោះបានសម្រេចហើយ ប៉ុន្តែសំណាងអាក្រក់ ដោយពួកគេលួចចំម៉ូតូជនរង គ្រោះដែលមានភ្ជាប់GPS ទើបក្រោយពីទទួលបានពាក្យបណ្ដឹងរបស់ជនរងគ្រោះ លោកឧត្តមសេនីយ៍ត្រី ឈួន គឹមសាន្ត មេបញ្ជាការកងរាជអាវុធខេត្ត បានស្នើសុំទៅលោកព្រះរាជអាជ្ញា ធ្វើការពន្លៀតដែនដី ដោយសហការជាមួយកម្លាំងកងរាជអាវុធហត្ថលើផ្ទៃប្រទេស និងអាវុធហត្ថរាជធានីភ្នំពេញ តាមទៅដល់សំបុករបស់ពួកគេ ដែលស្ថិតនៅភូមិ៧ សង្កាត់ស្រះចក ខណ្ឌដូនពេញ រាជធានីភ្នំពេញ និងធ្វើការចាប់ឃាត់ខ្លួនជនសង្ស័យបានជាបន្តបន្ទាប់ ចំនួន៤នាក់ នៅវេលាម៉ោង១ និង ៣០នាទីរសៀល ថ្ងៃទី២៧ មេសា ដោយដកយកបានម៉ូតូជនរងគ្រោះ ត្រឡប់មកវិញ រួមជាមួយនឹងម៉ូតូ២គ្រឿងផ្សេងទៀត សង្ស័យជាម៉ូតូលួចបានដូចគ្នា ។
បច្ចុប្បន្ន ជនសង្ស័យទាំង៤នាក់ រួមទាំងវត្ថុតាង ត្រូវបានឃាត់នៅបញ្ជាការដ្ឋានកងរាជអាវុធហត្ថខេត្តព្រៃវែង កសាងសំណុំរឿងចាត់ការបន្តទៅតាមនីតិវិធី៕
ចែករំលែកព័តមាននេះ