ចំណាប់ខ្មាំ.ងជាស្ត្រីវ័យចំណាស់អ៊ីស្រាអែល២នាក់ ត្រូវក្រុមហាម៉ាស់ដោះលែងហើយ
សង្គ្រាមអ៊ីស្រាអែល-ប៉ាឡេស្ទីន ៖ ក្រុមហាម៉ាស់ប៉ាឡេស្ទីនកាលពីថ្ងៃទី២៣ តុលា បានដោះលែង
សង្គ្រាមអ៊ីស្រាអែល-ប៉ាឡេស្ទីន ៖ ក្រុមហាម៉ាស់ប៉ាឡេស្ទីនកាលពីថ្ងៃទី២៣ តុលា បានដោះលែងចំណាប់ខ្មាំងជាស្ត្រីវ័យចំណាស់អ៊ីស្រាអែលចំនួន២នាក់ តែប្តីពួកគាត់មិនត្រូវបានដោះលែងឡើយ។
លោកយាយទាំង២នាក់ និងស្វាមីរបស់ពួកគាត់ត្រូវក្រុមហាម៉ាស់ប៉ាឡេស្ទីនចាប់ជាចំណាប់ខ្មាំង រួមជាមួយមនុស្សឯទៀតៗ ពេលវាយលុកមិនឲ្យដឹងខ្លួនកាលពីថ្ងៃទី៧ តុលា ចូលដែនដីអ៊ីស្រាអែល។
ចំណាប់ខ្មាំងទាំងនេះកំពុងស្ថិតនៅជ្រោយហ្គាហ្សាដែលកំពុងទទួលរងការវាយប្រហារខ្លាំងក្លាបំផុត ពីសំណាក់កងយន្តហោះនិងកងកាំភ្លើងធំអ៊ីស្រាអែល។
ខុន្ទកាល័យនាយករដ្ឋមន្ត្រីអ៊ីស្រាអែល បានប្រាប់អត្តសញ្ញាណនារីទាំង២រូបថា មានសញ្ជាតិអ៊ីស្រាអែលនិងមានដើមកំណើតនៅKIBBOUTZ NIR OZ ដោយលោកយាយម្នាក់ឈ្មោះYOCHEVED LIFSCHITZ អាយុ៨៥ឆ្នាំ និងលោកយាយម្នាក់ទៀតឈ្មោះNOURIT KUPER អាយុ៧៩ឆ្នាំ។ អ្នកទាំង២ត្រូវចាប់ពង្រត់រួមនឹងស្វាមី ក្នុងការវាយប្រហារដ៏បង្ហូររឈាមរបស់ពួកហាម៉ាស់។ ស្វាមីពួកគាត់នៅជាប់ឃុំនៅឡើយក្នុងជ្រោយហ្គាហ្សា។
តាមAFPថា លោកយាយទាំង២នាក់ត្រូវបានដឹកតាមឧទ្ធម្ភាគចក្រយោធា១គ្រឿង មកកាន់មជ្ឈមណ្ឌលសុខាភិបាលក្រុងតែលអាវីវមួយ។ រដ្ឋាភិបាលអ៊ីស្រាអែលបញ្ជាក់ថា សាច់ញាតិគ្រួសាររបស់អ្នកទាំង២ បានមករង់ចាំទទួលពួកគាត់នៅមជ្ឈមណ្ឌលសុខាភិបាលនោះ។ លោកយាយYOCHEVED LIFSCHITZរៀបរាប់ថា ពេលពួកហាម៉ាស់ចាប់គាត់ ពួកគេបានដឹករូបគាត់តាមម៉ូតូមួយ ឌុបគាត់ដោយមានគ្នាគេម្នាក់អង្គុយពីក្រោយទប់កុំឲ្យធ្លាក់។ ពួកគេបានបើកម៉ូតូឆ្លងកាត់បារ៉ាស់ព្រំដែនចូលមកជ្រោយហ្គាហ្សា។
មុននេះ ចំណាប់ខ្មាំងជាស្ត្រីអាមេរិក២នាក់ម្ដាយនិងកូនត្រូវបានក្រុមហាម៉ាស់ដោះលែងរួចហើយ ៕
ចែករំលែកព័តមាននេះ