ខេត្តសៀមរាប ៖ ភ្ញៀវទេសចរបរទេសចំនួន៥នាក់ និងខ្មែរម្នាក់រងរបួសធ្ងន់ និងស្រាល នៅលើដងផ្លូវជាតិលេខ៦ ដោយសាររថយន្ដធុន៤៥កៅអីរបស់ក្រុមហ៊ុនដឹកអ្នកដំណើរ «វីរៈប៊ុន ថាំអេចប្រេស» ជ្រុលទៅបុករថយន្ដហ៊ីណូភ្លៅ៥ ដឹកស្រូវចំពីមុខពេញទំហឹង។ ប៉ូលិសជំនាញឱ្យដឹងថា ឧបទ្ទវហេតុនេះកើតឡើងកាលពីវេលាម៉ោង៦ និង១០នាទីព្រឹកថ្ងៃទី១៨ ឧសភា
ខេត្តសៀមរាប ៖ ភ្ញៀវទេសចរបរទេសចំនួន៥នាក់ និងខ្មែរម្នាក់រងរបួសធ្ងន់ និងស្រាល នៅលើដងផ្លូវជាតិលេខ៦ ដោយសាររថយន្ដធុន៤៥កៅអីរបស់ក្រុមហ៊ុនដឹកអ្នកដំណើរ «វីរៈប៊ុន ថាំអេចប្រេស» ជ្រុលទៅបុករថយន្ដហ៊ីណូភ្លៅ៥ ដឹកស្រូវចំពីមុខពេញទំហឹង។
ប៉ូលិសជំនាញឱ្យដឹងថា ឧបទ្ទវហេតុនេះកើតឡើងកាលពីវេលាម៉ោង៦ និង១០នាទីព្រឹកថ្ងៃទី១៨ ឧសភា ក្នុងភូមិថ្នល់ចែក ឃុំកៀនសង្កែ ស្រុកសូទ្រនិគមចំងាយប្រមាណ៣០គីឡូម៉ែត្រ ភាគខាងកើតក្រុងទេសចរណ៍សៀមរាប ។ រថយន្ដក្រុមហ៊ុនដឹកអ្នកដំណើរមានការអះអាងថាបើកក្នុងក្បឿនលឿនពីកើតទៅលិច ក្នុងទិសដៅភ្នំពេញ-សៀមរាប ហើយឡើងផ្លូវទួលមុខសាលារៀនបណ្ដាលឱ្យលោតធ្វើឱ្យអ្នកបើកបរមិនអាចគ្រប់គ្រងស្ថានការណ៍បានក៏ជ្រុលទៅប៉ះម៉ូតូដឹកត្រីមួយគ្រឿងដែលបើកស្របទិសគ្នា រួចរេចង្កូតទៅបុករថយន្ដហ៊ីណូដឹកស្រូវដែលកំពុងឈប់ប៉ះកង់នៅឯម្ខាងផ្លូវខាងស្តាំដៃចំពីមុខពេញទំហឹង ។ ការបុកនោះបណ្តាលឱ្យកាប៊ីនរថយន្តទាំង២ក្រពឹត និងអ្នកដំណើរស្រែកភ័យស្លន់ស្លោ។
អធិការរងប៉ូលិសស្រុកសូទ្រនិគម លោកអនុសេនីយ៍ឯកសួន សារ៉ាំ ទទួលបន្ទុកសណ្ដាប់ធ្នាប់ដែលទៅធ្វើកំណត់ហេតុបានប្រាប់ថា រថយន្ដរបស់ក្រុមហ៊ុនដឹកអ្នកដំណើរ «វីរៈប៊ុនថាំអេចប្រេស» នោះធុន៤៥កៅអី ពណ៌ក្រហម ពាក់ស្លាកលេខបាត់ដំបង 3A 0519 បើកបរដោយឈ្មោះសៀ វាសនា ភេទប្រុស អាយុ២៩ឆ្នាំ រស់នៅភូមិ៩ សង្កាត់មិត្ដភាព ខណ្ឌ៧មករា រាជធានីភ្នំពេញ ។ ចំណែករថយន្ដដឹកស្រូវម៉ាកហ៊ីណូភ្លៅ៥ ពណ៌ត្រួយចេក ពាក់ស្លាកលេខភ្នំពេញ3A 1069 ប៉ុន្ដែអ្នកបើកបរមិនទាន់ស្គាល់អត្ដសញ្ញាណទេ។
លោកអធិការរងឱ្យដឹងថា មនុស្សចំនួន៦នាក់ដែលរងរបួសរួមមាន១-ឈ្មោះអិត វិនម៉ុនរាល ភេទស្រី អាយុ២៦ឆ្នាំ ជនជាតិអាមេរិករបួសធ្ងន់ «បាក់ជើងស្ដាំ» ២-ឈ្មោះឡោវិន ស្ពីលមិន ភេទប្រុស ៣-ឈ្មោះតាន់ យ៉ាសាយហ្គល ភេទប្រុស អ្នកទាំងពីរជនជាតិអាល្លឺម៉ង់ ៤-ឈ្មោះឌិននីសូវ៉ា ស្កិនដា ភេទប្រុស ៥-ឈ្មោះហ្ស៊ីណូ រ៉ាវអាតិម ភេទប្រុស អ្នកទាំងនេះជាជនជាតិរុស្ស៊ី និងឈ្មោះអ៊ីង សុភក្ដ្រ័ ភេទប្រុស អាយុ២៧ឆ្នាំ ជនជាតិខ្មែរ នៅភូមិលលកស ឃុំលលកស ស្រុកសំពៅមាស ខេត្ដពោធិ៍សាត់ ។
ក្រុមអ្នកឃើញហេតុការណ៍បាននិយាយថារថយន្ដហ៊ីណូភ្លៅ៥ ដឹកស្រូវដែលបែកកង់នោះឈប់ខុសទិស ប៉ុន្ដែអ្នកបើកបរព្យាយាមចតផុតទ្រូងផ្លូវដើម្បីប៉ះកង់ ។ ហេតុការណ៍កើតឡើងដោយសារតែការធ្វេសប្រហែសរបស់អ្នកបើកបរ រថយន្ដក្រុងដឹកអ្នកដំណើររបស់ក្រុមហ៊ុន «វីរៈប៊ុន ថាំអេចប្រេស» ដែលបើកលឿនពេក ម្យ៉ាងទៀតទៅដល់សាលារៀនដែលមានទាំងស្លាកបង្ហាញឱ្យបន្ថយល្បឿនផង តែគេនៅតែមិនមើល ដូច្នេះហើយពេលឡើងទួលធ្វើឱ្យរថយន្តលោតកង់មុខជាន់ហ្វ្រាំងមិនជាប់ទើបបង្កគ្រោះថ្នាក់បែបនេះ។
កាលពីព្រឹកថ្ងៃទី១០ ឧសភា ឆ្នាំ២០១១ នៅលើផ្លូវជាតិលេខ៦ ក្នុងស្រុកសូទ្រនិគមក៏មានគ្រោះចរាចរណ៍កើតឡើងដែរ ដោយរថយន្ដហ៊ីយ៉ាន់ដាយបុកម៉ូតូ និងកង់ពីក្រោយបណ្តាលឱ្យមនុស្សចំនួន៣នាក់ស្លាប់៕
ចែករំលែកព័តមាននេះ