ADផ្ទាំងផ្សព្វផ្សាយពាណិជ្ជកម្ម

វៀតណាមចា.ប់.ខ្លួ.នក្មេងអាយុ១៤ឆ្នាំដាក់ថ្នាំ.ពុ.លក្នុងម្សៅទឹកដោះគោស.ម្លា.ប់ឪពុក និងជីដូន

1 ឆ្នាំ មុន

២២ ខែ តុលា ឆ្នាំ ២០២៣ ម៉ោង ០៣:៥៦

វៀតណាមខាងត្បូង៖ ក្លាយជាឃាតករទាំងវ័យក្មេង និងខូចអនាគតអស់មួយជីវិត, កុមារាជនជាតិវៀតណាមម្នាក់អាយុ១៤ឆ្នាំ រស់នៅខេត្តទៀងយ៉ាង ប្រទេសវៀតណាមខាងត្បូង បានឆ្លើយសារភាពថាខ្លួនជាអ្នកដាក់ថ្នាំពុលនៅក្នុងម្សៅទឹកដោះគោ គោលបំណងធំដើម្បីបំពុលសម្លាប់ឪពុករបស់ខ្លួនតែប៉ុណ្ណោះ។ ប៉ុន្តែចៃដន្យ ជីដូនរបស់ក្មេងនេះក៏បានផឹកទឹកដោះគោនោះដែរ…

វៀតណាមខាងត្បូង៖ ក្លាយជាឃាតករទាំងវ័យក្មេង និងខូចអនាគតអស់មួយជីវិត, កុមារាជនជាតិវៀតណាមម្នាក់អាយុ១៤ឆ្នាំ រស់នៅខេត្តទៀងយ៉ាង ប្រទេសវៀតណាមខាងត្បូង បានឆ្លើយសារភាពថាខ្លួនជាអ្នកដាក់ថ្នាំពុលនៅក្នុងម្សៅទឹកដោះគោ គោលបំណងធំដើម្បីបំពុលសម្លាប់ឪពុករបស់ខ្លួនតែប៉ុណ្ណោះ។ ប៉ុន្តែចៃដន្យ ជីដូនរបស់ក្មេងនេះក៏បានផឹកទឹកដោះគោនោះដែរ បណ្ដាលឱ្យស្លាប់ទាំងឪពុក និងជីដូន។

ក្មេងប្រុសឈ្មោះឈ្មោះផាំមិញគុក (Pham Minh Quac) ត្រូវសមត្ថកិច្ចចាប់ខ្លួនកាលពីយប់ថ្ងៃសុក្រ។ ពោលគឺ៥ថ្ងៃបន្ទាប់ពីឪពុករបស់គេឈ្មោះផាំវ៉ាន់យេន (Pham Van Yen) អាយុ៤៥ឆ្នាំ និងជីដូនឈ្មោះផាំធីផាន់ (Pham Thi Phan) អាយុ៨៣ឆ្នាំបានទទួលមរភាពក្រោយពេលផឹកទឹកដោះគោម្សៅ។ សូមរម្លឹកអំពីប្រវត្តិសាវតាររបស់ក្មេងនេះបន្តិច។ ប៉ាម៉ាក់របស់គេមានកូន៣នាក់គឺក្មេងប្រុសនេះ និងប្អូនៗរបស់គេ២នាក់ទៀត។ នៅពេលក្មេងនេះអាយុ៦ឆ្នាំ ប៉ាម៉ាក់លែងគ្នា។ ម្ដាយរបស់ក្មេងនេះក៏វិលទៅរស់នៅជាមួយឪពុកម្ដាយរបស់ខ្លួនវិញ។ កាលពី២ឆ្នាំមុន ក្មេងនេះឈប់រៀន និងជួយធ្វើការម្ដាយរបស់គេ។

មួយរយៈចុងក្រោយនេះ រូបគេទៅរស់នៅជាមួយឪពុក និងជីដូន។ ឪពុករបស់គេជាមនុស្សផឹកស្រាច្រើនហួសកម្រិត។ ក្មេងនេះព្យាយាមនិយាយប្រដែប្រដៅឪពុកឱ្យឈប់ផឹកស្រាបែបនេះតទៅទៀត។ ប៉ុន្តែឪពុកមិនយកត្រចៀកស្ដាប់ទេ ហើយថែមទាំងមានកំហឹង និងជេរប្រទេចក្មេងនេះយ៉ាងខ្លាំង។ ដូច្នេះ អារម្មណ៍អាក់អន់ចិត្តជាមួយឪពុកដែលមានតាំងពីមុនមកគួបផ្សំជាមួយរឿងរ៉ាវថ្មីៗនេះទៀតរឹតតែធ្វើឱ្យក្មេងនេះផ្ទុះកំហឹងខ្លាំងដល់ដំណាក់កាលដែលត្រូវតែកម្ចាត់ឪពុករបស់ខ្លួនចោល។ នេះបើតាមចម្លើយសារភាពរបស់ក្មេងជំទង់ប្រាប់សមត្ថកិច្ចក្រោយពេលចាប់ខ្លួនកាលពីថ្ងៃទី២០ ខែតុលា។

ក្មេងនេះស្គាល់បុរសម្នាក់កាលពីពីរខែមុន ហើយគាត់ដឹងថាបុរសម្នាក់នោះមានថ្នាំបំពុលឆ្កែ។ ថ្ងៃទី១៣ ខែតុលា ក្មេងនោះក៏ទៅសុំថ្នាំពុលពីបុរសខាងលើដោយនិយាយកុហកគាត់ថាមានឆ្កែព្រៃចូលរាតត្បាតជិតៗផ្ទះរបស់គាត់ ដូចនេះ គាត់ចង់កម្ចាត់ឆ្កែទាំងនោះចោល។ តែតាមពិត គាត់យកថ្នាំពុលទៅដាក់នៅក្នុងម្សៅទឹកដោះគោដែលឪពុក និងជីដូនរបស់គាត់ប្រើសម្រាប់ឆុងផឹក។ នៅព្រឹកបន្ទាប់ គេប្រទះឃើញឪពុករូបនោះដេកស្លាប់។ កាលនោះ គ្មាននរណាទាន់សង្ស័យក្មេងនេះទេ។

គេស្មានថាឪពុករូបនោះស្លាប់ដោយសារជំងឺ។ ដូច្នេះ គេក៏រៀបចំធ្វើបុណ្យឱ្យគាត់។ នៅក្បាលព្រលប់ថ្ងៃដដែលនោះ នៅពេលកំពុងធ្វើបុណ្យសុខៗ កូនស្រីរបស់ជីដូនក្មេងនេះក៏យកម្សៅទឹកដោះគោទៅឆុងឱ្យម្ដាយពិសាដើម្បីមានកម្លាំង។ គ្រាន់តែពិសាទឹកដោះគោមិនបាន៥នាទីផង ស្ត្រីចំណាស់ចាប់ផ្ដើមដកដង្ហើមផុតៗ និងដួលស្លាប់តែម្ដង។ សូម្បីតែលើកនេះទៀត ក៏ក្រុមគ្រួសារមិនទាន់សង្ស័យថាគាត់ស្លាប់ដោយសារគេដាក់ថ្នាំបំពុលទេ ហើយក៏មិនទាន់សង្ស័យទៅលើក្មេងម្នាក់នេះទេ។ គេស្មានថាគាត់ស្លាប់ដោយសារវ័យចាស់ជរា ឬដោយសារជំងឺ ព្រោះគាត់ទើបតែកើតជំងឺផ្ដាសាយកាលពីប៉ុន្មានថ្ងៃមុន។

អ្វីៗត្រូវបែកការណ៍នៅថ្ងៃទី១៥ ខែតុលា នៅពេលកូនប្រុសរបស់លោកយាយដែលស្លាប់នោះយកម្សៅទឹកដោះគោទៅឆុងផឹក។ ផឹកមិនទាន់បានប៉ុន្មានផង បុរសវ័យ៥៥ឆ្នាំ ឈ្មោះផាំមិញតាន់ (Pham Minh Tan) ចាប់ផ្ដើមឈឺក្បាល, វិលមុខ និងដួលព្រូសតែម្ដង។ គាត់ត្រូវគេដឹកទៅសង្គ្រោះបន្ទាន់នៅមន្ទីរពេទ្យ និងធ្លាក់ខ្លួនឈឺធ្ងន់ជាច្រើនថ្ងៃទម្រាំរួចផុតពីគ្រោះថ្នាក់។

ដល់ពេលស្លាប់១ភ្លែត២នាក់ និងស្ទើរស្លាប់ម្នាក់ទៀតបែបនេះ ក្រុមគ្រួសារក៏សម្រេចចិត្តប្ដឹងសមត្ថកិច្ចដើម្បីចុះស៊ើបអង្កេតនៅក្នុងផ្ទះ និងប្រមូលកំប៉ុងម្សៅទឹកដោះគោ ដបទឹក និងកែវទាំងអស់យកទៅធ្វើកោសល្យវិច័យ។ សមត្ថកិច្ចមិនទាន់ចេញលទ្ធផលស៊ើបអង្កេតផង ក្មេងប្រុសរូបនោះក៏ឆ្លើយសារភាពតែម្ដង៕

ប្រភព៖ Vietnam Express និងប្រភពដទៃទៀត
https://e.vnexpress.net/news/news/teenager-poisons-father-grandmother-in-southern-vietnam-4667464.html
https://en.vgt.vn/tien-giang-chau-trai-ra-tay-ha-doc-ca-nha-vi-ly-do-khong-ngo-danh-tinh-dong-pham-gay-rung-dong-ihyes-20231021t7008980/
https://vietnam.postsen.com/local/528520/Forcing-a-teenager-to-put-dog-bait-in-milk-his-grandmother-and-biological-father-died.html