ខេត្តពោធិ៍សាត់ ៖ ប្រជាពលរដ្ឋ ដែលរងផលប៉ះពាល់ដោយជំនន់ទឹកភ្លៀង ក្នុងក្រុងពោធិ៍សាត់ ចំនួន២,៣០៥គ្រួសារ បានទទួលអំណោយសង្គ្រោះបន្ទាន់របស់គណៈកម្មាធិការគ្រប់គ្រងប្រព័ន្ធស្បៀងបម្រុងកម្ពុជា នារសៀលថ្ងៃទី២១ ខែតុលា ឆ្នាំ២០២៣…
ខេត្តពោធិ៍សាត់ ៖ ប្រជាពលរដ្ឋ ដែលរងផលប៉ះពាល់ដោយជំនន់ទឹកភ្លៀង ក្នុងក្រុងពោធិ៍សាត់ ចំនួន២,៣០៥គ្រួសារ បានទទួលអំណោយសង្គ្រោះបន្ទាន់របស់គណៈកម្មាធិការគ្រប់គ្រងប្រព័ន្ធស្បៀងបម្រុងកម្ពុជា នារសៀលថ្ងៃទី២១ ខែតុលា ឆ្នាំ២០២៣ ដែលបានប្រារព្ធធ្វើនៅពហុកីឡដ្ឋានខេត្តពោធិ៍សាត់ ដោយក្នុងមួយគ្រួសារទទួលបានអង្ករ ២៥គីឡូក្រាម មី១កេស ត្រីខ១យួរ ទឹកត្រី១យួរ ទឹកស៊ីអ៊ីវ១យួរ និងទឹកសុទ្ធ ១កេស ។
លោក ខូយ រីដា អភិបាល នៃគណៈអភិបាលខេត្តពោធិ៍សាត់ និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានបញ្ជាក់ថា នេះជាការឆ្លើយតបទៅនឹងសំណូមពររបស់បងប្អូនប្រជាកសិករ ខណៈពេលដែលលោក និងលោកទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំក្រុមការងារពិនិត្យលើស្ថានភាព នៃទំហំផលប៉ះពាល់ខូចខាតជាក់ស្ដែង នាពេលកន្លងទៅ ។
លោកបានបញ្ជាក់ថា រាជរដ្ឋាភិបាលកម្ពុជា តាមរយៈគណៈកម្មាធិការគ្រប់គ្រងប្រព័ន្ធស្បៀងបម្រុងកម្ពុជា បានចែកជូនបងប្អូនប្រជាពលរដ្ឋ ក្រោយពីប៉ះពាល់ដោយសារជំនន់ទឹកភ្លៀង កាលពីថ្ងៃទី២៩ ខែកញ្ញា ឆ្នាំ២០២៣ ចំនួន២,៣០៥គ្រួសារ មកពីសង្កាត់លលកស សង្កាត់ព្រៃញី សង្កាត់រលាប សង្កាត់បន្ទាយដី សង្កាត់ផ្ទះព្រៃ និងសង្កាត់ស្វាយអាត់ ក្រុងពោធិ៍សាត់ គ្រាន់តែជួយសម្រាល និងដោះស្រាយជីវភាពបានមួយរយៈពេលប៉ុណ្ណោះ មិនអាចទទួលទានយូរអង្វែងនោះទេ កត្តាសំខាន់សូមបន្តការដាំដុះ ចិញ្ចឹមសត្វ និងប្រកបមុខរបរផ្សេងៗទៀតទើបប្រសើរ ។
លោក ខូយ រីដា សូមឱ្យប្រជាពលរដ្ឋត្រៀមលក្ខណៈធ្វើស្រែបន្ត ក្នុងគោលបំណងស្តារឡើងវិញ បើខ្វះពូជសូមទំនាក់ទំនងជាមួយអាជ្ញាធរមូលដ្ឋាន និងក្រុមការងារ ដើម្បីដោះស្រាយជូន។ អាជ្ញាធរមូលដ្ឋាន ត្រូវមានការទំនាក់ទំនង ផ្សារភ្ជាប់ជាមួយប្រជាពលរដ្ឋ ស្គាល់អំពីសុខទុក្ខជាប់ជានិច្ច ព្រោះថា បងប្អូនប្រជាពលរដ្ឋយើងនេះហើយ ជាអ្នកកំណត់បាននូវជោគវាសនាប្រទេសជាតិ ក៏ដូចជាអ្នកជម្រុញចលករ កម្លាំងសេដ្ឋកិច្ចឲ្យដើរទៅមុខ។ ដូចគ្នានោះដែរ កិច្ចការបន្ទាប់ ប្រសិនបើបងប្អូនមានបញ្ហាទាក់ទងទៅនឹងការងារបង្កបង្កើនផល សូមទំនាក់ទំនង ទៅអាជ្ញាឃុំ ដើម្បីជំនាញកសិកម្មយើង បានចុះជួយអន្តរាគមន៍ ទាន់ពេលវេលា។ ការអនុវត្តប្រព័ន្ធស្បៀងបម្រុងនេះ គឺជាទស្សនៈវិស័យដ៏វែងឆ្ងាយ របស់រាជរដ្ឋាភិបាលកម្ពុជា ដល់ការលើកទឹកចិត្ត និងជម្រុញចលនាបង្កបង្កើនផល ជាពិសេស គឺផ្តោតទៅលើប្រជាពលរដ្ឋគោលដៅអាទិភាព ដែលកំពុងជួបបញ្ហាប្រឈមជីវភាព បណ្តាលមកពីគ្រោះធម្មជាតិ ។
លោក ចាប នាង អភិបាលក្រុងពោធិ៍សាត់ ឲ្យដឹងថា ក្រុងពោធិ៍សាត់ប៉ះពាល់ជំនន់ទឹកភ្លៀង កាលពីថ្ងៃទី២៩-៣០ ខែកញ្ញា ឆ្នាំ២០២៣ ធ្វើឲ្យលិចលង់ហេដ្ឋារចនាសម្ព័ន្ធ ភូមិដ្ឋាន និងផលដំណាំ ចំនួន៧សង្កាត់ ស្មើ៧៣ភូមិ ប្រជាពលរដ្ឋ ៦,៤៥៨គ្រួសារ ស្មើនឹង ៥,៨៥៦ខ្នងផ្ទះ ជម្លៀសមនុស្ស ៨៧៩គ្រួសារ។ ដំណាំកសិកម្មស្រូវជាង ៣,០០០ហិកតា ខូចអស់ជាង ១,០០០ហិកតា ខូចខាតហេដ្ឋាចនាសម្ពន្ធ័ផ្លូវថ្នល់ជាច្រើនខ្សែ ហើយបានចែកជូនស្បៀងរួចចំនួន ៣,០៣៨គ្រួសារ ។
គួររំលឹកថា កាលពីថ្ងៃទី០៨ខែតុលាឆ្នាំ២០២៣កន្លងទៅ លោក ខូយ រីដា បានចែកស្បៀងសង្គ្រោះបន្ទាន់ របស់រាជរដ្ឋាភិបាល តាមរយៈគណៈកម្មាធិការប្រព័ន្ធស្បៀងបម្រុងកម្ពុជា ដល់ប្រជាពលរដ្ឋរងគ្រោះដោយជំនន់ទឹកភ្លៀង មកពីឃុំអន្លង់វិល ឃុំស្យា ឃុំកញ្ជរ ឃុំកណ្តៀង ឃុំស្រែស្តុក ឃុំកោះជុំ ឃុំវាល និងឃុំស្វាយលួង ក្នុងស្រុកកណ្តៀង ខេត្តពោធិ៍សាត់ សរុបចំនួន១០៩៣គ្រួសារ ហើយគ្រោងបន្តចែក នៅស្រុកបាកាន និងស្រុកកណ្តៀងបន្ថែមទៀត៕
ចែករំលែកព័តមាននេះ