ទីក្រុងវ៉ាស៊ីនតោន៖ ថ្ងៃនេះលោកត្រាំចេញសេចក្ដីព្រមានធ្ងន់ៗថាក្រុមហាម៉ាស់ត្រូវតែទម្លាក់អាវុធចុះទោះបីដោយវិធីណាក៏ដោយ។ បើពួកគេមិនព្រមទម្លាក់អាវុធតាមសម្រួលទេ លោកគំរាមប្រើប្រាស់កម្លាំង។ ទន្ទឹមនឹងនោះ លោកក៏សូមអំពាវនាវឱ្យពួកគេប្រគល់សាកសពចំណាប់ខ្មាំងបន្ថែមទៀតដើម្បីអនុវត្តទៅតាមស្មារតីនៃបទឈប់បាញ់។ លោកថ្លែងដូច្នេះបន្ទាប់ពីវិលត្រឡប់ពីចូលរួមកិច្ចប្រជុំកំពូលស្ដីពីការស្វែងរកដំណោះស្រាយសម្រាប់តំបន់មជ្ឈិមបូព៌ា។
សម្រាប់ពេលនេះ អ្វីដែលគេអាចដឹងច្បាស់គឺការដូរចំណាប់ខ្មាំង និងសាកសពចំណាប់ខ្មាំងជាមួយអ្នកជាប់ឃុំ និងទណ្ឌិតជនជាតិប៉ាឡេស្ទីន។ ចំពោះលក្ខខណ្ឌដទៃទៀតដូចដែលមានចែងនៅក្នុងផែនការសន្តិភាពរបស់លោកត្រាំនោះគេនៅមិនទាន់ដឹងថានឹងអនុវត្តបានជោគជ័យកម្រិតណាទេ។ ក្រុមហាម៉ាស់ធ្លាប់បានប្រកាសម្ដងជាពីរដងហើយថាខ្លួនមិនទាន់ទទួលយកផែនការសន្តិភាពនោះ១០០%ទេ ហើយចាំពិគ្រោះគ្នាសិន។
មិនទាន់អីផងមានសញ្ញាថាហាម៉ាស់មិនត្រឹមតែមិនទម្លាក់អាវុធចុះទេ ប៉ុន្តែពួកគេចាប់ផ្ដើមពង្រឹងកម្លាំងប្រដាប់អាវុធរបស់ខ្លួនសាជាថ្មី។ គេឃើញយុទ្ធជនរបស់ហាម៉ាស់បង្ហាញវត្តមាននៅតាមផ្លូវ និងដើរប្រមូលក្រុមបងធំដែលធ្លាប់អាងយ៉ាងនៅតំបន់ហ្កាហ្សាយកទៅបាញ់ចោលឆៅៗ និងបង្ហោះនៅតាមបណ្ដាញសង្គមថែមទៀត។ មានសេចក្ដីរាយការណ៍ថាកាលម្ហឹកអ៊ីស្រាអែល និងហាម៉ាស់កំពុងជាប់ដៃប្រយុទ្ធគ្នា ក្រុមបងធំទាំងនោះជាអ្នកប្រឆាំងនឹងហាម៉ាស់ ហើយមានអ៊ីស្រាអែលនៅពីក្រោយខ្នង។ ម៉្លោះហើយបងធំបានធ្វើព្យុះធ្វើភ្លៀងនៅហ្កាហ្សា និងឆក់ប្លន់ជំនួយមនុស្សធម៌ដើម្បីទុកលក់។ ដូច្នេះដល់ពេលដែលហាម៉ាស់បើកយុទ្ធនាការសងសឹកវិញម្ដង។
ពីទីក្រុងវ៉ាស៊ីនតោន លោកត្រាំបញ្ជាក់ជំហររបស់លោកដែលចង់ឃើញហាម៉ាស់ទម្លាក់អាវុធចុះព្រោះពួកគេធ្លាប់បានសន្យាថានឹងធ្វើដូច្នេះ។ លោកត្រាំថាការកាត់រំសាយអាវុធត្រូវតែធ្វើឡើងជាការប្រញាប់។ ទោះបីធ្វើឡើងដោយសុទ្ធចិត្ត ឬដោយការប្រើកម្លាំងយ៉ាងណាក្ដី ដាច់ខាតត្រូវតែកាត់រំសាយអាវុធ។ លោកមិនបានបញ្ជាក់ឱ្យច្បាស់ថាបើសិនហាម៉ាស់មិនព្រមទម្លាក់អាវុធទេ តើក្រុមណា ឬប្រទេសណានឹងទៅដកហូតអាវុធពីពួកគេ ឬក៏ថាតើអាមេរិកនឹងបញ្ជូនកងទ័ពទៅធ្វើអន្តរាគមន៍ដែរឬទេ។
ទោះបីហាម៉ាស់ប្រគល់ចំណាប់ខ្មាំងដែលនៅរស់ចុងក្រោយម្ភៃនាក់ទៅឱ្យអ៊ីស្រាអែលក៏ពិតមែន ក៏ប៉ុន្តែនៅសល់សាកសពចំណាប់ខ្មាំងមួយចំនួនទៀតដែលពួកគេនៅរក្សាទុក។ កាលពីថ្ងៃចន្ទពួកគេប្រគល់សាកសព៤នាក់។ ដោយសារមើលឃើញពីភាពយឺតយ៉ាវដូច្នេះ អ៊ីស្រាអែលព្រមានបិទខ្ទប់ជំនួយមនុស្សធម៌មិនឱ្យដឹកចូលតំបន់ហ្កាហ្សា។ លោកត្រាំបង្ហោះនៅលើបណ្ដាញសង្គមថាថ្វីដ្បិតចំណាប់ខ្មាំងម្ភៃនាក់វិលមកវិញទាំងរស់ ប៉ុន្តែនៅមានកិច្ចការជាច្រើនទៀតដែលត្រូវធ្វើ។ សាកសពចំណាប់ខ្មាំងមិនទាន់បញ្ជូនមកអស់ទេ។ ក្រោយមកលោកប្រាប់អ្នកសារព័ត៌មានថាតាមមើលទៅ ហាម៉ាស់ចេះតែនិយាយកុហកថាពួកគេមានសាកសពចំណាប់ខ្មាំង។ លោកយល់ថាពួកគេគ្មានសាកសពទាំងនោះទេ៕
ចែករំលែកព័តមាននេះ