លោក ពូទីន ហៅ IOC ថា «ស្ថាប័នរើសអើ.ងជា.តិសាសន៍ប្រឆាំ.ងអត្តពលិករុស្ស៊ី»
រុស្ស៊ី ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានចោទប្រកាន់គណៈកម្មាធិការអូ
រុស្ស៊ី ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានចោទប្រកាន់គណៈកម្មាធិការអូ
រុស្ស៊ី ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានចោទប្រកាន់គណៈកម្មាធិការអូឡាំពិកអន្តរជាតិដែរហៅកាត់ថា IOC គឺជាស្ថាប័នរើសអើងជាតិសាសន៍ប្រឆាំងនឹងអត្តពលិកមកពីប្រទេសរុស្ស៊ី និងបានប្រើប្រាស់កីឡាអូឡាំពិកជាឧបករណ៍នយោបាយ។
ការអត្ថាធិប្បាយរបស់បុរសខ្លាំងរុស្ស៊ីវ័យ៧១ឆ្នាំរូបនេះ បានធ្វើឡើងនៅក្នុងសុន្ទរកថានៅឯវេទិកា «Russia is a Sports Power» ស្ថិតនៅទីក្រុង Perm កាលពីថ្ងៃទី១៩ ខែតុលា កន្លងទៅ ដែលត្រូវបានចេញផ្សាយដោយទីភ្នាក់ងារព័ត៌មានរដ្ឋរបស់រុស្ស៊ី TASS ។
អត្តពលិករុស្ស៊ី និងបេឡារុស ត្រូវបានហាមឃាត់ភាគច្រើនចេញពីកីឡាថ្នាក់អន្តរជាតិ បន្ទាប់ពីអនុសាសន៍របស់ IOC ក្នុងការឆ្លើយតបទៅនឹងសង្គ្រាមឈ្លានពានរបស់រុស្ស៊ីលើប្រទេសអ៊ុយក្រែន។ ប៉ុន្តែទោះយ៉ាងណាក៏ដោយ ក្រោយមកជាបន្តបន្ទាប់ ជំហរមួយនេះ ត្រូវបានបន្ធូរបន្ថយជាមួយ IOC ដែលផ្តល់ដំបូន្មានដល់ស្ថាប័នកីឡា ដើម្បីអនុញ្ញាតឱ្យអត្តពលិកប្រទេសទាំងពីរ អាចចូលរួមប្រកួតប្រជែងក្នុងនាមជាអត្តពលិកអព្យាក្រឹតបុគ្គល បើពួកគេមិនគាំទ្រសង្គ្រាម និងគ្មានទំនាក់ទំនងជាមួយយោធា។ ក្រោមលក្ខខណ្ឌរបស់ IOC ទង់ជាតិ និងភ្លេងជាតិរបស់ប្រទេសទាំងពីរ នៅតែត្រូវបានហាមឃាត់ ខណៈដែលក្រុមរុស្ស៊ី និងបេឡារុស នៅតែបន្តត្រូវបានរារាំងពីការប្រកួតអន្តរជាតិដដែល។ សហព័ន្ធអន្តរជាតិភាគច្រើនបានប្រកាន់ខ្ជាប់អនុសាសន៍ IOC ដែលនាំឱ្យអត្តពលិករុស្ស៊ី និងបេឡារុស ចូលរួមជាអព្យាក្រឹតបុគ្គលក្នុងការប្រកួតជើងឯកពិភពលោក។
យ៉ាងណាមិញ IOC មិនទាន់ធ្វើការសម្រេចចិត្តលើសិទ្ធិចូលរួមប្រកួតរបស់ក្រុមរុស្ស៊ី និងបេឡារុស សម្រាប់ព្រឹត្តិការណ៍កីឡាអូឡាំពិកទីក្រុងប៉ារីស ឆ្នាំ ២០២៤ នៅឡើយនោះទេ។ លោក Thomas Bach ប្រធាន IOC បានអះអាងថា តួនាទីរបស់ស្ថាប័នរបស់លោកទទួលបានការគាំទ្រកាន់តែខ្លាំងឡើង ប៉ុន្តែក្រឡែកមកកាន់លោក ពូទីន ឯណេះវិញ បានអះអាងថា លក្ខខណ្ឌនេះ គឺជាការរើសអើងជាតិសាសន៍។
លោក ពូទីន បានថ្លែងថា «ការប្រកួតអាចត្រូវបានគេប្រើប្រាស់ជាឧបករណ៍នៃសម្ពាធនយោបាយប្រឆាំងនឹងមនុស្ស ដែលមិនមានអ្វីដែលត្រូវធ្វើជាមួយនយោបាយ ដែលនេះគឺជាការរើសអើងជាតិសាសន៍សុទ្ធសាធ។ សូមអរគុណដល់ថ្នាក់ដឹកនាំមួយចំនួននៃគណៈកម្មាធិការអូឡាំពិកអន្តរជាតិសម័យទំនើប យើងបានដឹងថា ការអញ្ជើញឱ្យចូលរួមការប្រកួតកីឡាមិនមែនជាសិទ្ធិដោយគ្មានលក្ខខណ្ឌរបស់អត្តពលិកឆ្នើមនោះទេ ប៉ុន្តែជាប្រភេទនៃឯកសិទ្ធិ ហើយអាចទទួលបានមិនមែនដោយលទ្ធផលកីឡានោះទេ ប៉ុន្តែតាមរយៈកាយវិការនយោបាយមួយចំនួន ដែលមិនទាក់ទងនឹងកីឡាទាល់តែសោះ»។
លោកបានបន្ថែមទៀតថា «យើងក៏បានរៀន និងបានឮថា ធម្មនុញ្ញអូឡាំពិកត្រូវបានសន្មត់ថា ហួសសម័យ ហើយលែងមានលក្ខណៈជាសកលទៀតហើយ។ មន្ត្រីកីឡាមួយចំនួនបានអួតអាងចំពោះខ្លួនឯងនូវសិទ្ធិក្នុងការកំណត់ថា តើវាត្រូវបានអនុវត្តចំពោះនរណា? វិធីសាស្ត្របែបនេះ គឺផ្ទុយពីធម្មជាតិនៃកីឡា តាមពិតទៅ នេះគឺជាចំណុចទាំងមូលនៃចលនាកីឡាអន្តរជាតិ»។
លោក ពូទីន បានណែនាំដល់ស្ថាប័ន BRICS Games ដែលកំពុងត្រូវបានចាត់ទុកថា ជាគូប្រជែងដ៏មានសក្តានុពលចំពោះកីឡាអូឡាំពិក។ BRICS គឺជាសម្ព័ន្ធនយោបាយ ដែលរួមមានប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។ ព្រឹត្តិការណ៍ពហុកីឡាដ៏ចម្រូងចម្រាសមួយនេះ គ្រោងនឹងប្រព្រឹត្តទៅចាប់ពីថ្ងៃទី១២ ដល់ថ្ងៃទី២៣ ខែមិថុនា ឆ្នាំក្រោយ នៅទីក្រុងកាហ្សាន (Kazan) ប្រទេសរុស្ស៊ី ពោលត្រឹមតែជាងមួយខែប៉ុណ្ណោះ មុនពេលចាប់ផ្តើមព្រឹត្តិការណ៍កីឡាអូឡាំពិកទីក្រុងប៉ារីស នៅថ្ងៃទី២៦ ខែកក្កដា ដល់ថ្ងៃទី១១ ខែសីហា ឆ្នាំ២០២៤។
រុស្ស៊ីបានសង្កត់ធ្ងន់ថា ព្រឹត្តិការណ៍ BRICS Games មិនមែនជាជម្រើសសម្រាប់កីឡាអូឡាំពិកទេ ហើយលោក ពូទីន បានទទូចថា រុស្ស៊ីនៅតែប្តេជ្ញាចិត្តចំពោះគោលការណ៍អូឡាំពិក៕ (ប្រភពពី Inside The Games)
ចែករំលែកព័តមាននេះ