លួចឡានពីស្រុកឱរ៉ាល់ មកជាប់អន្ទា.ក់នៅក្រុងច្បារមន
- កំពង់ស្ពឺ
ខេត្តកំពង់ស្ពឺ ៖ យុវជនជាជនសង្ស័យម្នាក់បានធ្វើសកម្មភាពលួចរថយន្ត ត្រូវកម្លាំងនគរបាលក្រុង
ខេត្តកំពង់ស្ពឺ ៖ យុវជនជាជនសង្ស័យម្នាក់បានធ្វើសកម្មភាពលួចរថយន្ត ត្រូវកម្លាំងនគរបាលក្រុងច្បារមន សហការជាមួយនគរបាលស្រុកឱរ៉ាល់ធ្វើការឃាត់ខ្លួនកសាងសំណុំរឿងចាត់ការបន្តតាមផ្លូវច្បាប់ ខណៈដែលជនសង្ស័យរូបនោះធ្វើសកម្មភាពលួចរថយន្តបែនដឹកដីពីស្រុកឱរ៉ាល់ពេលមេឃភ្លៀង ម្ចាស់ចតមុខផ្ទះ ហើយព្យាយាមបើកគេចខ្លួនមកដល់ក្រុងច្បារមន ត្រូវនគរបាលឃាត់ខ្លួនបានតែម្តង។
ការឃាត់ខ្លួនយុវជនសង្ស័យលួចរថយន្តខាងលើនេះបានធ្វើឡើងកាលពីល្ងាចថ្ងៃទី១៧ ខែតុលា ឆ្នាំ២០២៣ នៅមុខវិទ្យាល័យឆាយឆុប ស្ថិតនៅក្នុងភូមិព្រៃស្លឹក សង្កាត់ច្បារមន ខេត្តកំពង់ស្ពឺ។
នគរបាលស្រុកឱរ៉ាល់បាននិយាយឱ្យដឹងថា នៅចន្លោះបង្គោលគីឡូម៉ែត្រលេខ៤០ទៅលេខ៤១ ចំណុចក្នុងភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ មានករណីចោរកម្ម(លួចរថយន្ត) មួយកើតឡើង ដែលមានជនសង្ស័យឈ្មោះ ភន រ៉ែក ភេទប្រុស អាយុ១៩ឆ្នាំ មុខរបរមិនពិតប្រាកដ រស់នៅភូមិព្រែក ឃុំអមលាំង ស្រុកថ្ពង ខេត្តកំពង់ស្ពឺ បានមកធ្វើសកម្មភាពលួចរថយន្ត១គ្រឿង ម៉ាកនីសាន់ (ជាប្រភេទរថយន្តបែនដឹកដី)ចង្កូតស្ដាំ ក្បាលរថយន្ត ពណ៌ស្វាយ តួរពណ៌ខៀវ គ្មានផ្លាកលេខ ស៊េរីឆ្នាំ១៩៩៩ ដែលជាកម្មសិទ្ធិរបស់ឈ្មោះ ជឿង ផល្លា ភេទប្រុស អាយុ៤១ឆ្នាំ រស់នៅក្នុងភូមិឃុំកើតហេតុខាងលើ ។
នគរបាលស្រុកឱរ៉ាល់បានបញ្ជាក់ថា នៅមុនពេលកើតហេតុ ជនសង្ស័យលួចរថយន្តខាងលើនេះ គឺម្ចាស់ទុករថយន្តនៅមុខផ្ទះរបស់ខ្លួន ហើយមេឃកំពុងភ្លៀងខ្លាំងពេលនោះម្ចាស់បានចេញមកមើលក៏បាត់រថយន្តហើយម្ចាស់បានប្ដឹងរាយការណ៍មកសមត្ថកិច្ចឱ្យជួយអន្តរាគមន៍ភ្លាមៗ។ ក្រោយទទួលបានព័ត៌មាន ភ្លាមៗកម្លាំងសមត្ថកិច្ចនគរបាលស្រុកឱរ៉ាល់បានសហការជាមួយសមត្ថកិច្ចនគរបាលក្រុងច្បារមន បានឃាត់ខ្លួន ជនសង្ស័យខាងលើ និងរថយន្តបាននៅលើផ្លូវជាតិលេខ៤ ចន្លោះគីឡូម៉ែត្រ លេខ៤៩ទៅលេខ៥០ ទល់មុខអនុវិទ្យាល័យឆាយឆុប ស្ថិតនៅភូមិព្រៃស្លឹក សង្កាត់ច្បារមន ក្រុងច្បារមន ខេត្តកំពង់ស្ពឺ។
បច្ចុប្បន្នយុវជន ដែលជាជនសង្ស័យលួចរថយន្តរួមជាមួយ និងវត្ថុតាងរថយន្តខាងលើ កសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺជាបណ្ដោះអាសន្នដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ