អត្តពលិក៣នាក់ ត្រូវបានសម្លា.ប់អំឡុងសង្គ្រាមអ៊ីស្រាអែល-ហាម៉ាសប៉ាឡេស្ទីន
អ៊ីស្រាអែល-ប៉ាឡេស្ទីន ៖ យោងតាមប្រភពពីគេហទំព័រ Inside The Games ដែលចេញផ្សាយកាលពី
អ៊ីស្រាអែល-ប៉ាឡេស្ទីន ៖ យោងតាមប្រភពពីគេហទំព័រ Inside The Games ដែលចេញផ្សាយកាលពីពេលថ្មីៗនេះ បានឱ្យដឹងថា គិតរហូតមកទល់ពេលនេះ អត្តពលិកអ៊ីស្រាអែលចំនួន៣រូបត្រូវបានសម្លាប់ ចាប់តាំងពីសង្គ្រាមរវាងក្រុមសកម្មប្រយុទ្ធហាម៉ាសប៉ាឡេស្ទីន នឹងប្រទេសអ៊ីស្រាអែលបានចាប់ផ្តើម កាលពីថ្ងៃទី៧ ខែតុលា កន្លងទៅ។ ដោយក្នុងនោះរួមមាន កីឡាការិនីហែលទឹក Eden Nimri, អតីតកីឡាករបាល់ទាត់ Lior Asulin និងកីឡាករ Mor Cohen អត្តពលិកកីឡា Lacrosse ។
កីឡាការិនីហែលទឹក Eden Nimri ដែលមានឋានៈជាអនុសេនីយ៍ឯក នៅក្នុងកងកម្លាំងការពារអ៊ីស្រាអែល និងជាមេបញ្ជាការនៃអង្គភាពយន្តហោះគ្មានមនុស្សបើក ឬ ដ្រូន ត្រូវបានសម្លាប់ខណៈពេលដែលកំពុងប្រយុទ្ធជាមួយនឹងក្រុមសកម្មប្រយុទ្ធហាម៉ាស នៅតំបន់ Nahal Oz ។
កីឡាការិនីរូបនេះ ធ្លាប់បានចូលរួមប្រកួតក្នុងព្រឹត្តិការណ៍ European Junior Open Water Swimming Championships ឆ្នាំ ២០១៨ ដោយបញ្ចប់នៅក្នុងចំណាត់ថ្នាក់ទី៣០។ នាងក៏ធ្លាប់ប្រកួតពានរង្វាន់មេឌីទែរ៉ាណេឆ្នាំ២០១៤ និងពានរង្វាន់កីឡាសាលាអន្តរជាតិឆ្នាំ២០១៧ ផងដែរ។ សមាគមកីឡាហែលទឹកប្រទេសអ៊ីស្រាអ៊ែល បានបង្ហោះសារសោកស្ដាយជាខ្លាំង និងចូលរួមកាន់ទុក្ខដ៏ក្រៀមក្រំចំពោះគ្រួសារកីឡាការិនី Nimri ដែលបាត់បង់ជីវិតនៅក្នុងអាយុ២២ឆ្នាំ។
អត្តពលិកអ៊ីស្រាអែលម្នាក់ទៀត គឺអតីតកីឡាករបាល់ទាត់ Lior Asulin ដែលត្រូវបានសម្លាប់ អំឡុងពេលប្រារព្ធពិធីខួបកំណើតគម្រប់៤៣ឆ្នាំរបស់ខ្លួន នៅឯពិធីបុណ្យតន្ត្រី Supernova ដែលជាកន្លែងមនុស្សរាប់រយនាក់ត្រូវបានសម្លាប់ និងជាច្រើននាក់ត្រូវបានចាប់ធ្វើជាចំណាប់ខ្មាំង។ អតីតខ្សែប្រយុទ្ធរូបនេះ ធ្លាប់លេងឱ្យក្លិបជាច្រើននៅក្នុងស្រុកចាប់ពីឆ្នាំ ១៩៩៧ ដល់ឆ្នាំ ២០១៧ និងស៊ុតបញ្ចូលទីបានរហូតដល់ ១៧៦គ្រាប់ ព្រមទាំងឈ្នះពានរង្វាន់ Israeli Cup ឆ្នាំ ២០០៤ ជាមួយក្រុម Bnei Sakhnin ផងដែរ។ ពាក់ព័ន្ធនៅក្នុងវិស័យបាល់ទាត់នេះ ក្លិប Hapoel Tel Aviv ក៏បានប្រកាសថា គ្រូបង្វឹកក្រុមយុវជនរបស់ខ្លួន គឺលោក Alon Shamli ក៏ត្រូវបានសម្លាប់នៅក្នុងការវាយប្រហាររបស់ក្រុមហាម៉ាសផងដែរ។
ដោយឡែក ការស្លាប់របស់កីឡាករ Mor Cohen ដែលជាផ្នែកមួយ នៃក្រុមកីឡា Lacrosse ជម្រើសជាតិប្រទេសអ៊ីស្រាអែល ក៏ត្រូវបានប្រកាសដោយសមាគមកីឡា Lacrosse របស់ប្រទេសនេះផ្ទាល់តែម្តង។ កីឡាករវ័យ២៤ឆ្នាំរូបនេះ បានតំណាងប្រទេសអ៊ីស្រាអែល នៅក្នុងការប្រកួតជើងឯកពិភពលោក U-19 ឆ្នាំ ២០១៦ ដែលមានមូលដ្ឋាននៅទីក្រុង Ashkelon ដែលជាទីក្រុងមួយក្នុងចំណោមទីក្រុងរបស់អ៊ីស្រាអែល ដែលនៅជិតបំផុតនឹងតំបន់ហ្គាស្សា ។
សមាគមកីឡា Lacrosse របស់អ៊ីស្រាអែលបានពណ៌នា Cohen ថា កីឡាករវ័យក្មេងដ៏អស្ចារ្យ។ ស្របពេលដែលសមាគមកីឡា Lacrosse សហរដ្ឋអាមេរិក ក៏បានបង្ហោះសារលើកសរសើរដល់កីឡាករ Cohen នៅលើបណ្តាញទំនាក់ទំនងសង្គម X ផងដែរ។
បើទោះជាយ៉ាងណាក៏ដោយ គេជឿថា ចំនួនអត្តពលិកស្លាប់អាចមានច្រើនជាងនេះ ដោយក្នុងនោះរួមទាំងនៅប៉ាឡេស្ទីនផងដែរ ដែលមិនទាន់មានរបាយការណ៍ច្បាស់ការណ៍ណាមួយនៅឡើយ ត្បិតសង្គ្រាមកំពុងតែបន្តរវាងភាគីទាំង២ឥតស្រាកស្រាន្ត ដែលបណ្តាលមានមនុស្សស្លាប់ និងរបួសជាច្រើនពាន់នាក់ គិតចាប់តាំងពីក្រុមហាម៉ាសប៉ាឡេស្ទីន បើកការវាយប្រហារលើអ៊ីស្រាអែល កាលពីថ្ងៃទី៧ ខែតុលា កន្លងទៅ។
ជម្លោះដ៏យូរអង្វែងនេះ នាំឱ្យព្រឹត្តិការណ៍កីឡាជាច្រើនត្រូវបានលុបចោល ឬពន្យារពេល និងបានបែងចែកមតិនៅជុំវិញពិភពលោក ជាពិសេសបន្ទាប់ពីអ៊ីស្រាអែលបានដាច់ស្បៀងអាហារ ប្រេងឥន្ធនៈ អគ្គិសនី និងទឹក នៅតំបន់ហ្គាហ្សាស្ទ្រីប៕
ចែករំលែកព័តមាននេះ