ខេត្តកំពង់ឆ្នាំង ៖ រយៈពេល៣ថ្ងៃ ក្នុងពិធីបុណ្យភ្ជុំបិណ្ឌ ប្រពៃណីជាតិ ភ្ញៀវទេសចរណ៍បានទៅលេងកម្សាន្តតាមរមណីយដ្ឋាននានាក្នុងខេត្តកំពង់ឆ្នាំង មានជាង១៦ម៉ឺននាក់ នេះបើតាមការបញ្ជាក់របស់លោកប្រធានមន្ទីរទេសចរណ៍ខេត្តកំពង់ឆ្នាំង ។ ប្រធានមន្ទីរទេសចរណ៍ខេត្តកំពង់ឆ្នាំង…
ខេត្តកំពង់ឆ្នាំង ៖ រយៈពេល៣ថ្ងៃ ក្នុងពិធីបុណ្យភ្ជុំបិណ្ឌ ប្រពៃណីជាតិ ភ្ញៀវទេសចរណ៍បានទៅលេងកម្សាន្តតាមរមណីយដ្ឋាននានាក្នុងខេត្តកំពង់ឆ្នាំង មានជាង១៦ម៉ឺននាក់ នេះបើតាមការបញ្ជាក់របស់លោកប្រធានមន្ទីរទេសចរណ៍ខេត្តកំពង់ឆ្នាំង ។
ប្រធានមន្ទីរទេសចរណ៍ខេត្តកំពង់ឆ្នាំង លោក សេង សាលី បានបញ្ជាក់ថា រយៈពេល៣ថ្ងៃ គឺនៅថ្ងៃទី១៣, ១៤ និង១៥ ខែតុលា ភ្ញៀវទេសចរណ៍ជាតិ និងអន្តរជាតិ បានទៅលេងកម្សាន្តតាមរមណីយដ្ឋាននានា ទូទាំងខេត្តកំពង់ឆ្នាំង មានចំនួន១៦៨, ០៦១នាក់ ក្នុងនោះភ្ញៀវអន្តរជាតិ ២៨២នាក់។ ភ្ញៀវទេសចរណ៍ទាំងនោះ បានទៅលេងតាមទីរមណីយដ្ឋាននានា មានរមណីយដ្ឋានទឹកធ្លាក់ រមណីយដ្ឋានប្រវត្តិសាស្ត្រ ទីអារាមបុរាណ និងតាមទីកំសាន្តផ្សេង ដែលមានចំនួន ២១កន្លែង ក្នុងខេត្តកំពង់ឆ្នាំង ។
អ្វីដែលជាការចាប់អារម្មណ៍ជាងគេ គឺភ្ញៀវទេសចរណ៍ ដែលបានទៅពីអារាមថ្មី ហើយល្បីល្បាញទូទាំងប្រទេស រឿងព្រះសង្ឃធុដុង្គ វត្តចន្ទប្បជោត្តនារាម សិ្ថតក្នុងភូមិប៉ាតឡាង ឃុំក្រាំងលាវស្រុករលាប្អៀរ រយពេល៣ថ្ងៃ មានភ្ញៀវចំនួន ១៦,៥២៣នាក់។ នៅតំបន់ទឹកធ្លាក់អូដាសិលាទូកមាស ស្ថិតនៅក្នុងភូមិដាឃាត់ ស្រុកកំពង់លែង មានភ្ញៀវទៅលេងកំសាន្ត ១៥,២០០នាក់ ។ដោយឡែករមណីយដ្ឋានទេសចរណ៍ប្រវត្តិសាស្ត្រ គឺវត្តត្រឡែងកែង ស្រុកកំពុងធ្វើឡាច មានភ្ញៀវទេសចរណ៍រហូតទៅដល់ ១៩,៧០០នាក់ ។
អ្វីដែលគួរចាប់អារម្មណ៍ នៅរមណៅយដ្ឋាន មានទឹកធ្លាក់ ចំនួន៣កន្លែង ក្នុងស្រុកទឹកផុស គឺទឹកធ្លាក់ថ្មក្រាល ស្ថិតនៅក្នុងភូមិកោះខ្ទុម ឃុំជៀប មានភ្ញៀវទៅលេងកម្សាន្ត រយៈពេល៣ថ្ងៃ ចំនួន ៨,៥២៩នាក់ ទឹកធ្លាក់ស្រែអំពិល ៦,៥០៣នាក់ និងទឹកធ្លាក់អន្លង់ស្វាយ មានចំនួន ២,៩៥០នាក់ ។
លោក សេង សាលី បានបញ្ជាក់ដែរថា ភ្ញៀវទេសចរបានទៅលេងកំសាន្ត តាមរមណីយដ្ឋានក្នុងឆ្នាំនេះ មានចំនួនកើនឡើង នេះក៏ដោយសារតែប្រជាពលរដ្ឋមានជីវភាព សមរម្យទើបពួកគាត់ ឆ្លៀតឱកាស ក្នុងពិធីបុណ្យភ្ជុំ នាំគ្រួសារ និងកូនចៅដើរលេងកំសាន្ត ហើយរយៈពេល៣ថ្ងៃនេះ មិនមានបាតុភាពអ្វីកើតឡើងនៅតាមរមណីយដ្ឋានណាមួយនោះឡើយ ៕
ចែករំលែកព័តមាននេះ