- ភ្នំពេញ
ប្រជាជនកម្ពុជា បាននាំគ្នាទៅស្រុកកំណើត ដើម្បីចូលរួមពិធីភ្ជុំបិណ្ឌដែលជាពិធី ដើម្បីរំលឹកដល់ជីដូនជីតា សាច់ញាតិសន្តាន ដែលបានចែកឋានទៅ និងដើម្បីជាកុសលផលបុណ្យផងដែរ។
ប្រជាជនកម្ពុជា បាននាំគ្នាទៅស្រុកកំណើត ដើម្បីចូលរួមពិធីភ្ជុំបិណ្ឌដែលជាពិធី ដើម្បីរំលឹកដល់ជីដូនជីតា សាច់ញាតិសន្តាន ដែលបានចែកឋានទៅ និងដើម្បីជាកុសលផលបុណ្យផងដែរ។
ក្នុងន័យនេះ ពិធីបុណ្យភ្ជុំបិណ្ឌ ក៏ជាឱកាសមួយសម្រាប់ដាស់តឿនមនុស្សអោយធ្វើអំពើល្អ ចេះធ្វើបុណ្យ ហើយកុំធ្វើអំពើបាបដល់អ្នកដទៃ ក្នុងជីវិតរស់នៅក្នុងសង្គមខ្មែរយើង។ ធ្វើអំពើល្អមិនត្រឹមតែជាប្រយោជន៍ផ្ទាល់ខ្លួនទេ វាថែមទាំងជាការរួមចំណែកដ៏សំខាន់សម្រាប់បង្កើតសង្គមមួយកាន់តែល្អប្រសើរ។
នៅពេលដែលមនុស្សម្នាក់ធ្វើអំពើល្អ បុគ្គលនោះនឹងទទួលបានការស្រឡាញ់រាប់អាន និងការគោរពពីមនុស្សគ្រប់គ្នា មិនថាក្នុងគ្រួសារ កន្លែងការងារ និងសង្គមទេ។ ជាមួយនឹងការបង្ហាញខ្លួនជាមនុស្ស ប្រព្រឹត្តិតែអំពើល្អ មនុស្សល្អនឹងក្លាយជាបុគ្គលិកល្អ ជាអ្នកជំនួញល្អ ជាមេដឹកនាំល្អជាដើម។ ដូច្នេះ បុគ្គលនោះ នឹងមានការចម្រុងចម្រើននៅក្នុងការងារដោយកាន់តែទទួលបានដំឡើងតំណែង និងការដំឡើងប្រាក់ខែ ចំណែកអ្នករកស៊ីវិញ នឹងកាន់តែមានដៃគូរសហការច្រើនហើយធ្វើអោយមុខរបររបស់ខ្លួនរីកចម្រើនទៅមុខ។
តើយើងធ្វើមនុស្សល្អដោយរបៀបណា? ជាដំបូង គឺវាចេញអំពីការគិតរបស់មនុស្សយើង។ ការគិតល្អ ឬវិជ្ជមានចំពោះអ្នកដទៃ ត្រូវបានគេចាត់ទុកថា ជាចំណុចចាប់ផ្តើមដ៏ល្អមួយដែលនឹងបើកបេះដូងរបស់យើងសម្រាប់ការធ្វើទំនាក់ទំនងល្អជាមួយមនុស្សនៅក្នុងសង្គម។ នៅពេលដែលយើងមើលឃើញចំណុចល្អរបស់អ្នកដទៃ យើងបង្កើតឱកាសសម្រាប់កិច្ចសហប្រតិបត្តិការ ដើម្បីផលប្រយោជន៍រួម។ ផ្ទុយមកវិញ នៅពេលយើងមើលឃើញតែចំណុចអាក្រក់របស់មនុស្ស យើងបានបិទផ្លូវសម្រាប់ការទំនាក់ទំនង និងកិច្ចសហប្រតិបត្តិការ។
បន្ទាប់ពីយើងបានគិតល្អសម្រាប់មនុស្សជុំវិញខ្លួនយើងហើយ យើងត្រូវតែធ្វើការប្រាស្រ័យទាក់ទងជាមួយមនុស្សនានាជាមួយនឹងការនិយាយស្តីល្អ និង ស្មោះត្រង់។ នៅក្នុងទំនាក់ទំនងសង្គម ការនិយាយស្តីពីរោះ ស្មោះត្រង់ និងពោរពេញទៅដោយការគោរពភាគីម្ខាងទៀតនៃការទំនាក់ទំនង វានឹងធ្វើអោយការទំនាក់ទំនងនោះកាន់តែរឹងមាំ។ ដូច្នេះ យើងត្រូវចៀសវាងការនិយាយស្តីដែលអសុរស និងពិសពុល ពីព្រោះវានឹងបំផ្លាញដល់ការទំនាក់ទំនង។
នៅពេលយើងបាននិយាយល្អហើយ យើងកាន់តែចូលកៀកបេះដូងរបស់មនុស្សនានា។ ការគិតល្អ ការនិយាយស្តីល្អមិនទាន់គ្រប់គ្រាន់សម្រាប់យើងក្លាយជាមនុស្សល្អនោះទេ។ ការគិតល្អ និងការនិយាយស្តីល្អ ត្រូវតែផ្សារភ្ជាប់ជាមួយនឹងសកម្មភាពជាក់ស្តែង។ ដូច្នេះ អ្នកត្រូវតែធ្វើល្អ ដើម្បីអោយមានភាពស៊ីចង្វាក់គ្នា រវាងការគិត ការនិយាយស្តី និងការប្រព្រឹត្តិ ឬសកម្មភាពជាក់ស្តែងរបស់យើង ដើម្បីអាចអោយយើងក្លាយជាមនុស្សល្អដ៏ពិតប្រាកដ។
ដើម្បីសង្គមកម្ពុជាមួយដ៏ល្អនោះ ប្រជាជនកម្ពុជាគ្រប់រូប មិនថាតូច មិនថាធំ និងមិនថាមាន មិនថាក្រនោះទេ យើងត្រូវលើកកម្ពស់ស្មារតីនៃការគិតល្អ និយាយស្តីល្អ និងធ្វើល្អ។ សកម្មភាពនៃការធ្វើបុណ្យទៀននាឱកាសភ្ជុំបិណ្ឌនេះ គឺជាការនាំផ្លូវ និងបណ្ដុះស្មារតីនៃការធ្វើអំពើល្អនៅក្នុងសង្គមកម្ពុជា៕
ដោយ ៖ ប្រេ វីន
ចែករំលែកព័តមាននេះ