- ភ្នំពេញ
ក្រុមមន្ត្រីទេសចរណ៍នៅតាមបណ្តាខេត្តដែលជាប៉ូលទេសចរណ៍សំខាន់របស់ប្រទេសសុទ្ធតែអះអាងស្រ
ក្រុមមន្ត្រីទេសចរណ៍នៅតាមបណ្តាខេត្តដែលជាប៉ូលទេសចរណ៍សំខាន់របស់ប្រទេសសុទ្ធតែអះអាងស្រដៀងគ្នាថា ស្ថិតិនៃការកក់កន្លែងស្នាក់នៅតាមបន្ទប់សណ្ឋាគារនិងផ្ទះសំណាក់ កំពុងតែមានកំណើនកើនឡើង គួរឲ្យកត់សំគាល់សម្រាប់ពិធីបុណ្យភ្ជុំបិណ្ឌនៅពេល ខាងមុខនេះ ។
លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានប្រាប់ឱ្យដឹងថា នៅអំឡុងពេលបុណ្យភ្ជុំបិណ្ឌខាងមុខនេះ សណ្ឋាគារ និងផ្ទះសំណាក់មួយចំនួនក្នុងខេត្ត និងតាមបណ្តាកោះនានា ត្រូវបានកក់ទុកពីសំណាក់ភ្ញៀវរួចរាល់ លើកលែងតែសណ្ឋាគារប្រណិតៗប៉ុណ្ណោះ។
លោកប្រធានមន្ទីរទេសចរណ៍ខេត្តព្រះសីហនុ បានថ្លែងថា សណ្ឋាគារ និងផ្ទះសំណាក់ នៅផ្លូវសំខាន់ៗ និងនៅលើកោះ ភាគច្រើន ភ្ញៀវគាត់កក់បានច្រើន ហើយនិន្នាការកំពុង មានការកើនឡើង។
លោកបានបន្ថែមថា ចំពោះភ្ញៀវដែលបានកក់បន្ទប់សណ្ឋាគារសម្រាប់ស្នាក់នៅក្នុងអំឡុងពេលបុណ្យភ្ជុំបិណ្ឌខាងមុខនេះ ភាគច្រើនជាប្រជាពលរដ្ឋខ្មែរ ហើយស្នាក់នៅរយៈពេលពី៣ទៅ៥យប់ ដែលភាគច្រើនពួកគាត់បានកក់បន្ទប់សម្រាប់ស្នាក់នៅ តាមរយៈប្រព័ន្ធអនឡាញ និងមួយចំនួនទៀត កក់តាមទូរស័ព្ទផ្ទាល់ផងដែរ ។ ក្នុងចំណោមនោះក៏មានភ្ញៀវជនបរទេសខ្លះ តែមានចំនួនតិចតួច ប៉ុន្តែពួកគេច្រើនកក់សម្រាប់ការស្នាក់នៅរយៈពេលយូរជាងនេះ ។
លោក តាំង សុចិត្រគ្រឹស្នា បានបញ្ជាក់ថា «ជាទូទៅនៅកៀកថ្ងៃ ឬដល់ថ្ងៃតែម្តង ទើបយើង អាចដឹងចំនួនជាក់លាក់ ហើយភ្ញៀវខ្លះទៀត រហូតដល់ថ្ងៃទើបគាត់មក ហើយកើនចំនួន ទៅតាមនោះដែរ។ ចាប់តាំងពីផ្លូវល្បឿនលឿនកើតឡើងមក ភ្ញៀវទេសចរកើនឡើង យ៉ាងគំហុក តែក៏ភាគច្រើនពួកគាត់ត្រឡប់ទៅវិញ មិនស្នាក់នៅនោះទេ» ។
លោក បន្តថា តាមការប៉ានស្មានក្នុងរដូវបុណ្យភ្ជុំបិណ្ឌខាងមុខនេះ ខេត្តព្រះសីហនុនឹងទទួល បានភ្ញៀវទេសចរប្រមាណជា ១០ម៉ឺននាក់។
លោក តាំង សុចិត្រគ្រឹស្នា បានបន្ថែមថា ចំពោះភ្ញៀវទេសចរជាតិ និងអន្តរជាតិទាំងអស់ ដែលបានអញ្ជើញទៅដើរលេងកម្សាន្តនៅខេត្តព្រះសីហនុនាថ្ងៃឈប់សំរាកនេះ សូមចូលរួមថែរក្សា ការពារបរិស្ថានឲ្យបានខ្ជាប់ខ្ជួន តាមរយៈការវិចខ្ចប់ ទុកដាក់នូវ កាកសំណល់ផ្សេងៗក្រោយពីប្រើប្រាស់រួចឲ្យបានត្រឹមត្រូវ ដើម្បីធានាឲ្យតំបន់ឆ្នេរ មានភាពស្អាត តំបន់កោះ សម្រាប់បំរើវិស័យទេសចរណ៍។
ស្រដៀងគ្នានេះ ដែរ លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានអោយ ដឹងដែរថា ភាគច្រើនភ្ញៀវទេសចរទាំងជាតិ និងអន្តរជាតិ មកដើរកម្សាន្ត ក្នុងខេត្តសៀមរាប ភាគច្រើនជាភ្ញៀវទេសចរក្នុងស្រុក ដែលមកធ្វើបុណ្យផង លេងស្រុកកំណើត និងដើរកម្សាន្តផង។
ដោយឡែក លោក ចាន់ សុគន្ធី ប្រធានមន្ទីរទេសចរណ៍ខេត្តក្រចេះ អោយដឹងដែរថា មន្ទីរទេសចរណ៍ រួមនិងផ្នែកពាក់ព័ន្ធបានត្រៀមខ្លួនរួចជាស្រេចក្នុង ការស្វាគមន៍ភ្ញៀវទេសចរ ទាំងនោះ បើទោះបីជាខេត្តក្រចេះក្នុងរដូវនេះ មានភ្លៀងធ្លាក់ខ្លាំងយ៉ាងណាក៍ដោយ និងអំពាវនាវ អោយទេសចរទាំងជាតិ និងអន្តរជាតិ ចូលមកកម្សាន្តក្នុងបណ្តារមណីយដ្ឋាន នានា នៅក្នុងខេត្តភាកឥសាន្ត។
លោកប្រធានមន្ទីរ បន្តថា ខេត្តក្រចេះជាខេត្តគោលដៅទេសចរណ៍មួយ ផ្សារភ្ជាប់ជាមួយនិង ធម្មជាតិ ព្រៃភ្នំ ទឹកជ្រោះ និងប្រព័ន្ធជីវៈចម្រុះ ដែលជាការពេញនិយមរបស់ទេសចរសម័យថ្មី។
លោកប្រធានបន្ថែមថា មន្ទីរទេសចរណ៍ និងអាជ្ញាធរពាក់ព័ន្ធ បានបន្តចុះណែនាំ និងបណ្តុះបណ្តាលប្រជាពលរដ្ឋនៅតំបន់កម្សន្តនានា គឺធ្វើយ៉ាងណាត្រូវកែលម្អសេវាកម្មទេសចរណ៍ ឲ្យកាន់តែប្រសើរជាងពេលកន្លងទៅ ដើម្បីទាក់ទាញភ្ញៀវទេសចរជាតិ និងអន្តរជាតិ អោយចូលមកទស្សនាកម្សាន្តឲ្យបានយូរ ដែលអាចជួយបង្កើនប្រាក់ចំណូល ដល់ប្រជាពលរដ្ឋឲ្យកាន់តែមានជីវភាពល្អប្រសើរ ៕
សរសេរ ដោយ ៖ ស. ផានិត
កែសម្រួល ដោយ ៖ ប្រេ វីន
ចែករំលែកព័តមាននេះ