- ភ្នំពេញ
ភ្ជុំបិណ្ឌមិនត្រឹមជាឱកាសដែលប្រជាពលរដ្ឋត្រូវធ្វើបុណ្យទាននោះទេ តែក៍ជាពេលឈប់ សម្រាកពីវ
ភ្ជុំបិណ្ឌមិនត្រឹមជាឱកាសដែលប្រជាពលរដ្ឋត្រូវធ្វើបុណ្យទាននោះទេ តែក៍ជាពេលឈប់ សម្រាកពីការងារ ហើយមានដំណើរកម្សាន្តផងដែរ។ ដូច្នេះប្រសិនជាប្រេងសាំងចុះថ្លៃ នៅក្នុង ឱកាសនេះ ជាអំណោយផលមួយអាចចូលរួមកាត់បន្ថយការចំណាយរបស់ប្រជាពលរដ្ឋបានមួយចំណែក។
តាមសេចក្តីជូនដំណឹងរបស់ក្រសួងពាណិជ្ជកម្មពីថ្ងៃ១១ដល់ថ្ងៃទី២០តុលានេះប្រេងសាំងនឹងចុះថ្លៃប្រមាណ២០០រៀលក្នុងមួយលីត្រ។ តម្លៃសាំងលក់រាយក្នុងមួយលីត្រស្ថិតក្នុងតម្លៃ ចំនួន ៤.៣០០រៀល ពោលចុះថ្លៃ២៥០រៀលបើធៀបនឹងរយៈពេល១០ថ្ងៃមុន ចំណែកម៉ាស៊ូត ក៏ចុះថ្លៃផងដែរ គឺនៅត្រឹម
៤.៦៥០ រៀលក្នុងមួយលីត្រ ពោលចុះថ្លៃ២០០រៀល។
ថ្ងៃទី១៤ តុលា ចុងសប្តាហ៍នេះជាថ្ងៃភ្ជុំបិណ្ឌ។ ជាទម្លាប់ ប្រជាពលរដ្ឋនឹងចាកចេញពីទីក្រុងភ្នំពេញ ធ្វើដំណើរឆ្ពោះទៅកាន់ស្រុកកំណើតរៀងៗខ្លួនដើម្បីរៀបចំពិធីបែបសាសនា និង ការកម្សាន្តសប្បាយតាមគ្រួសារ។ តាមការកត់សម្គាល់នៅក្នុងឱកាសភ្ជុំបិណ្ឌម្តង មធ្យោបាយធ្វើដំណើរ ក៏ត្រូវបានឡើងថ្លៃដែរហើយវាបានក្លាយជាបន្ទុករបស់ពលរដ្ឋ។
ជារៀងរាល់ឆ្នាំ រដ្ឋបានបញ្ចេញរថយន្តក្រុងដឹកពលរដ្ឋពីភ្នំពេញឆ្ពោះទៅកាន់ស្រុកកំណើត ដោយមិនយកប្រាក់ និងបានអំពាវនាវកុំឱ្យមានការដំឡើងថ្លៃឈ្នួល។ ឆ្នាំនេះរដ្ឋត្រៀមបញ្ចេញរថយន្តក្រុងចំនួន ៤៥៥គ្រឿង សម្រាប់ដឹកពលរដ្ឋទៅតាមបណ្តាខេត្តនានា ពីថ្ងៃទី១២ ដល់ថ្ងៃទី១៦ ខែតុលា។
ក្រសួងទេសចរណ៍បានឱ្យដឹងថា កាលពីឆ្នាំមុន រយៈពេល៣ថ្ងៃ នៃថ្ងៃឈប់សម្រាក បុណ្យភ្ជុំបិណ្ឌ មានប្រជាពលរដ្ឋកម្ពុជាជាង១លាន២៤ម៉ឺននាក់ ចេញដើរកម្សាន្តនៅតាមតំបន់គោលដៅទេសចរណ៍នានា ខណៈភ្ញៀវបរទេសផ្ទៃក្នុងមានតែជាង ១ម៉ឺន៤ពាន់នាក់។
របាយការណ៍របស់ក្រសួងទេសចរណ៍ កាលពីឆ្នាំកន្លងទៅ បញ្ជាក់ថា ខេត្តបាត់ដំបង ខេត្តសៀមរាប និងខេត្តប៉ៃលិន គឺជាគៅលដៅទេសចរណ៍ ដែលទទួលបានភ្ញៀវច្រើនជាងគេ ក្នុងនោះខេត្តបាត់ដំបងជាង២១ម៉ឺននាក់ ខេត្តសៀមរាបជាង១៤ម៉ឺននាក់ ខណៈខេត្តតំបន់ មាត់សមុទ្រដូចជាខេត្តកែបជាង១១ម៉ឺននាក់ ខេត្តកំពតជាង៧ម៉ឺននាក់ និងខេត្តព្រះសីហនុ ជាង៨ម៉ឺននាក់។ ចំនួនពលរដ្ឋចេញដើរកម្សាន្តនាឱកាសថ្ងៃសម្រាកបុណ្យភ្ជុំបិណ្ឌកាលពីឆ្នាំ២ មានកំណើន៨៩.៤៣ភាគរយ ធៀបនឹងរយៈពេលដូចគ្នានៃពិធីភ្ជុំបិណ្ឌកាលពីឆ្នាំ២០២១៕
សរសេរដោយ ៖ សារ៉ាន់
កែសម្រួលដោយ ៖ ប្រេ វីន
ចែករំលែកព័តមាននេះ