វឿន វាសនា បំបែកកំណត់ត្រា ក្នុងប្រវត្តិសាស្ត្របាល់ទះកម្ពុជា ទទួលបានតម្លៃខ្លួន១០ម៉ឺនដុល្លារ
- ភ្នំពេញ
រាជធានីភ្នំពេញ ៖ ពិតជាមិនធ្មតាមែន សមាជិកកីឡាបាល់ទះវិសាខា វឿន វាសនា បានបំបែក
រាជធានីភ្នំពេញ ៖ ពិតជាមិនធ្មតាមែន សមាជិកកីឡាបាល់ទះវិសាខា វឿន វាសនា បានបំបែកកំណត់ត្រាជាកីឡាករទីមួយក្នុងប្រវត្តិសាស្ត្របាល់ទះកម្ពុជា ដែលទទួលបានតម្លៃខ្លួនខ្ពស់ជាងគេបំផុត នាពេលបច្ចុប្បន្ននេះ ដោយរូបគេនិងត្រូវបានផ្ទេរទៅចូលរួមប្រកបអាជីព ជាមួយក្លិបបាល់ទះថ្មី នៅកោះតៃវ៉ាន់ រយៈពេល២ឆ្នាំ ក្នុងតម្លៃខ្លួនជាង10ម៉ឺនដុល្លារ បន្ទាប់ពីកីឡាកររូបនេះ បានចប់ភារកិច្ចជាមួយក្រុមបាល់ទះជម្រើសជាតិកម្ពុជា ក្នុងព្រឹត្តិការណ៍កីឡាទ្វីបអាស៊ី លើកទី១៩ ឆ្នាំ២០២៣ នៅប្រទេសចិនកាលពីថ្មីៗនេះ ។
ជាការពិតណាស់ កីឡាកររបស់ក្លិបបាល់ទះ វិសាខា និងជាកីឡាករជម្រើសជាតិកម្ពុជា លោកវឿន វាសនា នឹងត្រូវផ្ទេរទៅចូលរួមប្រកបអាជីពថ្មី ជាមួយក្លិបបាល់ទះ Taichung Win Streak Men’s Volleyball នៅកោះតៃវ៉ាន់ រយៈពេល២ឆ្នាំ។ នេះបើយោងតាមការបញ្ជាក់ជាផ្លូវការរបស់សមាគមកីឡាបាល់ទះ វិសាខា កាលពីថ្ងៃទី៨ ខែតុលា ឆ្នាំ២០២៣ ។
តាមសំណេរដែលបង្ហោះលើផេកផ្លូវការ ក្លិបបាល់ទះដ៏ធំក្នុងប្រទេសកម្ពុជាមួយនេះ បានសរសេររៀបរាប់ថា៖ សមាគមកីឡាបាល់ទះ វិសាខា សូមប្រកាសថាកីឡាករ វឿន វាសនា នឹងផ្ទេរទៅចូលរួម ជាមួយក្លិបបាល់ទះ Taichung Win Streak Men’s Volleyball នៅកោះតៃវ៉ាន់ រយៈពេល២ឆ្នាំ។ ថ្នាក់ដឹកនាំក្លិប ក្រុមការងារគ្រូបង្វឹក និងមិត្តរួមក្រុមវិសាខា សូមជូនពរ វឿន វាសនា ទទួលបានជោគជ័យជាមួយក្រុមថ្មី ។
យ៉ាងណាមិញ ថ្មីៗកន្លងទៅនេះ បើតាមលោក អាំង សេរីពិសិដ្ឋ អនុប្រធាន និងជាអគ្គលេខាធិការនៃសហព័ន្ធកីឡាបាល់ទះកម្ពុជា បានបង្ហើបឲ្យដឹងក្នុងការ live លើផេកផ្លូវការរបស់លោកថា កីឡាករ វឿន វាសនា នឹងទទួលបានប្រាក់ចំណូលប្រមាណជាង១០ម៉ឺនដុល្លារអាមេរិក សម្រាប់ការទៅប្រកបអាជីពនៅក្លិបថ្មី រយៈពេល២ឆ្នាំនេះ។
ជាមួយគ្នានេះ លោកក៏បានលើកឡើងផងដែរថា លោក វឿន វាសនា បានបំបែកកំណត់ត្រាជាកីឡាករទីមួយក្នុងប្រវត្តិសាស្ត្របាល់ទះកម្ពុជា ដែលទទួលបានតម្លៃខ្លួនខ្ពស់ជាងគេបំផុត នាពេលបច្ចុប្បន្ននេះ ។
សូមបញ្ជាក់ផងដែរថា កន្លងមកកីឡាកររូបនេះ ក៏ធ្លាប់បានផ្ទេរទៅលេងជាមួយក្លិបបាល់ទះ Lavie Long An នៅប្រទេសវៀតណាម២ដងរួចមកហើយ ដោយកាលពីឆ្នាំ២០២២ទទួលតម្លៃខ្លួនជាង១ម៉ឺនដុល្លារ និងឆ្នាំ២០២៣ ទទួលបានតម្លៃខ្លួនជាង២ម៉ឺនដុល្លារអាមេរិក។ សមាជិករបស់ក្លិបវិសាខា វឿន វាសនា មានអាយុ២២ឆ្នាំ កម្ពស់១,៩៨ម៉ែត្រ ទម្ងន់៨៥គីឡូក្រាម ។ កីឡាកររូបនេះ បានចូលរួមចំណែកយ៉ាងសំខាន់ក្នុងក្រុមបាល់ទះជម្រើសជាតិកម្ពុជា ដោយឈ្នះបានមេដាយប្រាក់ និងសំរិទ្ធ ២លើកជាប់ៗគ្នា ក្នុងព្រឹត្តិការណ៍កីឡាស៊ីហ្គេមលើកទី៣១ នៅប្រទេស វៀត ណាម និងលើកទី៣២ កម្ពុជាយើងធ្វើជាម្ចាស់ផ្ទះ ៕ (ដោយ៖ លោក រៀម រ៉ាន់)
ចែករំលែកព័តមាននេះ