អតីតខ្សែប្រយុទ្ធឆ្នើមអ៊ីស្រាអែលម្នាក់ ត្រូវក្រុមហាម៉ាសសម្លា.ប់ អំឡុងធ្វើពិធីខួបកំណើត
អ៊ីស្រាអែល ៖ យោងតាមប្រភពពីសារព័ត៌មានអន្តរជាតិជាច្រើន កាលពីថ្ងៃទី៩ ខែតុលា ឆ្នាំ២០២៣
អ៊ីស្រាអែល ៖ យោងតាមប្រភពពីសារព័ត៌មានអន្តរជាតិជាច្រើន កាលពីថ្ងៃទី៩ ខែតុលា ឆ្នាំ២០២៣ កន្លងទៅ បានរាយការណ៍ថា អតីតកីឡាករបាល់ទាត់អ៊ីស្រាអែល លោក Lior Assulin ត្រូវបានសម្លា.ប់ក្នុងការវាយប្រហារពីក្រុមហាម៉ាសប៉ាឡេស្ទីន អំឡុងពេលលោកកំពុងធ្វើពិធីជប់លៀងខួបកំណើតគម្រប់អាយុ៤៣ឆ្នាំ។
ការវាយប្រហារបានកើតឡើងក្នុងពិធីជប់លៀងខួបកំណើតគម្រប់៤៣ឆ្នាំរបស់លោក Assulin ដោយបានផ្លាស់ប្តូរអ្វីដែលជាភាពសប្បាយរីករាយ ប្រែទៅជាទិដ្ឋភាពដ៏រន្ធត់នៃភេរវកម្ម និងការសម្លាប់បង្ហូរឈាម។ លោក Assulin ដែលលេងក្នុងតំណែងខ្សែប្រយុទ្ធ និងធ្លាប់ប្រកបអាជីពជាមួយក្លិប Hapoel Tel Aviv និង Apollon Limassol ត្រូវបានសម្លាប់នៅរមណីយដ្ឋានមួយ នៅភាគខាងត្បូងប្រទេសអ៊ីស្រាអែល អំឡុងពេលការវាយប្រហារដ៏រន្ធត់កាលពីថ្ងៃទី៧ ខែតុលា កន្លងទៅ។ ភេរវករប្រហែល៥០នាក់ បានមកដល់កន្លែងពិធីជប់លៀង ហើយបានដាច់ជីវិតជនស៊ីវិលជាច្រើននាក់ រួមទាំងលោក Assulin ផងដែរ។
ស្ថានភាពសោកនា.ដកម្មដ៏រន្ធ.ត់នេះ បានធ្វើឱ្យសហគមន៍បាល់ទាត់ទាំងមូលមានការភ្ញាក់ផ្អើលយ៉ាងខ្លាំង។ ជាក់ស្តែងនៅលើប្រព័ន្ធផ្សព្វផ្សាយសង្គម ក្លិប Hapoel Tel Aviv ក៏ដូចជាអតីតមិត្តរួមក្រុមដែលបានលេងជាមួយលោក Assulin បានសម្តែងសាររំលែកទុក្ខដល់ក្រុមគ្រួសារ និងមិត្តភក្តិរបស់គាត់ផងដែរ។
លោក Lior Assulin ធ្លាប់លេងឱ្យក្លិបជាច្រើន អំឡុងពេលអាជីពបាល់ទាត់ដ៏លេចធ្លោយរបស់គាត់ និងជាខ្សែប្រយុទ្ធដ៏ឆ្នើមបំផុតម្នាក់នៅក្នុងលីគអ៊ីស្រាអែលក្នុងឆ្នាំ ២០០៤។ គាត់ស៊ុតបាល់បញ្ចូលទីបាន៨៨គ្រាប់ ព្រមទាំងឈ្នះពានរង្វាន់ Israeli Cup ឆ្នាំ ២០០៤ ជាមួយនឹងក្រុម Bnei Sakhnin ផងដែរ។
ដោយឡែក កាលពីថ្ងៃទី៩ ខែតុលា កន្លងទៅ សហព័ន្ធបាល់ទាត់ទ្វីបអឺរ៉ុប ដែលហៅកាត់ថា UEFA បានចេញសេចក្តីប្រកាស ដើម្បីពន្យារពេលការប្រកួតទាំងអស់ដែលបានគ្រោងទុកនៅក្នុងប្រទេសអ៊ីស្រាអែលរយៈពេលពីរសប្តាហ៍ខាងមុខ ដោយសារតែជម្លោះដែលកំពុងបន្តនៅក្នុងប្រទេសមួយនេះ។
សេចក្តីថ្លែងការណ៍របស់ UEFA បានឱ្យដឹងថា «ដោយគិតពីស្ថានភាពសន្តិសុខបច្ចុប្បន្ននៅក្នុងប្រទេសអ៊ីស្រាអែល UEFA បានសម្រេចចិត្តពន្យារពេលការប្រកួតទាំងអស់ដែលបានគ្រោងទុកក្នុងប្រទេសអ៊ីស្រាអែល ជាមួយនឹងកាលបរិច្ឆេទថ្មី ដែលត្រូវបញ្ជាក់ក្នុងពេលសមស្រប»។
ការប្រកួតដែលរងផលប៉ះពាល់រួមមាន ការប្រកួតជម្រុះ Euro 2024 នៅថ្ងៃទី១២ ខែតុលា រវាងអ៊ីស្រាអែល នឹងស្វីស ក៏ដូចជាការប្រកួតជើងឯក Euro Under-21 របស់អ៊ីស្រាអែលជាមួយនឹងអេស្តូនី ហើយនិងអាល្លឺម៉ង់។ ការប្រកួតក្រុមឈុតយុវជន ដែលគ្រោងធ្វើឡើងចាប់ពីថ្ងៃទី១០ ដល់ថ្ងៃទី១៧ ខែតុលា ដែលមានការចូលរួមពីក្រុមអាយុក្រោម១៧ឆ្នាំមកពីប្រទេសអ៊ីស្រាអែល បែលហ្ស៊ិក ហ្គីប្រាលតា និងវេលស៍ ក៏ត្រូវបានពន្យារពេលផងដែរ។ បន្ថែមពីលើនេះ UEFA បានព្រមានថា ការប្រកួតជម្រុះ Euro 2024 មួយទៀតរវាងអ៊ីស្រាអែល និងកូសូវ៉ូ ដែលគ្រោងធ្វើនៅថ្ងៃទី១៥ ខែតុលា ក៏អាចត្រូវបានពន្យារពេលផងដែរ ដោយ UEFA បានព្រមានដោយបន្ថែមថាពួកគេនឹងរង់ចាំ២ឬ៣ថ្ងៃទៀត ដើម្បីសម្រេច៕ (ដកស្រង់ចេញពី Marca, TMZ និង CNN)
ចែករំលែកព័តមាននេះ