រាជធានីភ្នំពេញ ៖ អ្នកជំងឺដែលកំពុងសម្រាកព្យាបាលនៅមន្ទីរពេទ្យព្រះកុសុមៈចំនួន៦២នាក់ រួមជាមួយអ្នកជំងឺកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ហៅពេទ្យរុស្ស៊ីចំនួន៣៥០នាក់ ព្រឹកថ្ងៃទី១៧ ឧសភា ដែលជាថ្ងៃពេញបូណ៍មី ចំថ្ងៃបុណ្យវិសាខ បូជា បានទទួលការឧបត្ថម្ភកញ្ចប់អាហារថ្ងៃត្រង់ម្នាក់មួយកញ្ចប់ពីសំណាក់
រាជធានីភ្នំពេញ ៖ អ្នកជំងឺដែលកំពុងសម្រាកព្យាបាលនៅមន្ទីរពេទ្យព្រះកុសុមៈចំនួន៦២នាក់ រួមជាមួយអ្នកជំងឺកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ហៅពេទ្យរុស្ស៊ីចំនួន៣៥០នាក់ ព្រឹកថ្ងៃទី១៧ ឧសភា ដែលជាថ្ងៃពេញបូណ៍មី ចំថ្ងៃបុណ្យវិសាខ បូជា បានទទួលការឧបត្ថម្ភកញ្ចប់អាហារថ្ងៃត្រង់ម្នាក់មួយកញ្ចប់ពីសំណាក់លោកជំទាវឧកញ៉ា យីន ផាន្នី នាយិកាគ្រប់គ្រងទីផ្សារនៃសារព័ត៌មានកោះសន្តិភាព។
ក្នុងឱកាសនោះដែរ ក៏មានការចូលរួមដំណើរដោយលោកជំទាវឧកញ៉ា ភាព ហៀក ប្រធានក្រុមប្រឹក្សាភិបាលក្រុមហ៊ុនជីប ម៉ុងគ្រុប ដោយបាននាំយកទៅជាមួយនូវទឹកដោះគោកំប៉ុងចំនួន៨កេស មានចំនួនសរុប៣៨៤កំប៉ុង។ លោកស្រី សុផល ឡេង នាយិកាមូលនិធិសង្គ្រោះកុមារអាស៊ីអាគ្នេយ៍ នៅរដ្ឋផ្លរីដា សហរដ្ឋអាមេរិក ក្នុងឱកាសដែលលោកស្រីនាំប្រតិភូនិស្សិតមួយក្រុមមកទស្សនកិច្ចសិក្សានៅកម្ពុជា ក៏បានចូលរួមដំណើរដែរ ដោយបានបរិច្ចាគនូវថ្នាំពេទ្យមួយចំនួន ជាថ្នាំវីតាមីន ចែកចាយដល់អ្នកជំងឺផងដែរ។
នៅពេលប្រតិភូអញ្ជើញដល់មន្ទីរពេទ្យមិត្តភាពខ្មែរ-សូវៀត លោកវេជ្ជបណ្ឌិត សាយ សេងលី នាយកមន្ទីរពេទ្យ ព្រមទាំងនាយករដ្ឋបាលបានស្វាគមន៍ដោយទឹកចិត្តរីករាយ ដោយបានជួយសម្រួលនូវការចែកចាយកញ្ចប់អាហារបានដល់ដៃអ្នកជំងឺគ្រប់ៗគ្នា តាំងពីជាន់ក្រោមដល់ជាន់ខាងលើ និងនៅគ្រប់អគារព្យាបាលទាំងអស់។ អ្នកជំងឺណាដែលដើរបាន អាចមកទទួលយកដោយខ្លួនឯង។ អ្នកជំងឺណាដែលដើរមិនរួចត្រូវបានយកទៅចែកជូនដល់បន្ទប់តែម្តង។ អ្នកជំងឺខ្លះត្រូវបានអ្នកកំដរមកទទួលយកក៏មានដែរ។ លោកនាយកមន្ទីរពេទ្យបានសម្រួលការងារចែកចាយកញ្ចប់អាហារបានដល់គ្រប់អ្នកសម្រាកព្យាបាលទាំងអស់ដោយយកចិត្តទុកដាក់បំផុត។
បន្ទាប់ពីបានចែកចាយកញ្ចប់អាហារគ្រប់អ្នកជំងឺដែលសម្រាកនៅមន្ទីរពេទ្យមិត្តភាពខ្មែរ-សូវៀត ហៅពេទ្យរុស្ស៊ីចប់មក លោកជំទាវឧកញ៉ា យីន ផាន្នី រួមជាមួយប្រតិភូអមដំណើរបាននាំយកកញ្ចប់អាហារមួយផ្នែកទៀតឆ្ពោះទៅមន្ទីរពេទ្យព្រះកុសុមៈ ហៅមន្ទីរពេទ្យព្រះសង្ឃ ដែលនៅទីនោះបានទទួលការស្វាគមន៍យ៉ាងរីករាយពីសំណាក់លោកវេជ្ជបណ្ឌិត សូ វុន អគារនុរក្សនៃមន្ទីរពេទ្យ។ សកម្មភាពចែកកញ្ចប់អាហារនៅមន្ទីរពេទ្យព្រះកុសុមៈក៏បានប្រព្រឹត្តទៅយ៉ាងរលូនដូចនៅមន្ទីរពេទ្យមិត្តភាពខ្មែរ-សូវៀតដែរ គឺបានចែកជូនបានគ្រប់អ្នកជំងឺតាមបន្ទប់នីមួយៗ។ លោកវេជ្ជបណ្ឌិតអគារនុរក្ស សូ វុន បានសម្តែងនូវកាយវិការ និងទឹកចិត្តរីករាយក្រៃលែង ចំពោះកាយវិការមនុស្សធម៌នេះ។
លោកជំទាវឧកញ៉ា យីន ផាន្នី ថ្លែងថា លោកជំទាវផ្ទាល់បានរៀបចំកញ្ចប់អាហារមានបាយ១កញ្ចប់, សម្ល១មុខ, ត្រីងៀត១ដុំ និងទឹកសុទ្ធ១ដប រៀបចំវេចខ្ចប់យ៉ាងស្អាតប្រកបដោយអនាម័យ មានចំនួន៤៤៥កញ្ចប់ សម្រាប់អ្នកជំងឺ៤១២នាក់តាមបញ្ជី។ ការដាក់លើសនេះក្រែងមានអ្នកជំងឺចូលថ្មីទៀត ឬក៏សម្រាប់អ្នកកំដរដែលខ្វះខាត។ លោកជំទាវឱ្យដឹងទៀតថា អ្នកជំងឺម្នាក់បានកញ្ចប់អាហារមួយថង់ដែលមានបាយ សម្លស្ពៃជូ ជាមួយត្រីរ៉ស់ ឬបាយត្រីងៀត និងទឹកសុទ្ធ១ដប ព្រមទាំងទឹកដោះគោ១កំប៉ុង ដោយមានថ្នាំវីតាមីន១កញ្ចប់តូចទៀតផង។
លោកជំទាវឧកញ៉ា យីន ផាន្នី ក៏ដូចជាលោកជំទាវឧកញ៉ា ភាព ហៀក បានថ្លែងផងដែរថា ថ្ងៃនេះជាថ្ងៃបុណ្យវិសាខបូជា ជាថ្ងៃបុណ្យធំរបស់ព្រះពុទ្ធសាសនាយើង។ ការធ្វើបុណ្យនេះក្នុងបំណងឧទ្ទិសកុសលជូនដល់វិញ្ញាណក្ខន្តជីដូនជីតា ញាតកាទាំង៧សន្តានដែលបានចែកឋានទៅ ៕
ចែករំលែកព័តមាននេះ