ខេត្តបន្ទាយមានជ័យ ៖ ជនសង្ស័យម្នាក់ដែលជាអ្នកផ្តល់ទីតាំងសម្រាប់ប្រើប្រាស់គ្រឿងញៀន និងរក្សាទុកដោយខុសច្បាប់ រួមនិងអ្នកប្រើប្រាស់គ្រឿងញៀនប្រុស-ស្រី១៥នាក់ ត្រូវបញ្ជូនទៅសាលាដំបូងខេត្តបន្ទាយមានជ័យ កាលពីរសៀលថ្ងៃទី០៥ តុលា ឆ្នាំ២០២៣ ក្រោយពីឃាត់ខ្លួននិងសួរនាំរួច ។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែតបានឲ្យដឹងថា អនុវត្តតាមបទបញ្ជារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិនិងក្រោមការបញ្ជាផ្ទាល់របស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ដោយដឹកនាំផ្ទាល់របស់លោកឧត្តមសេនីយ៍ត្រី ធិន ស៊ិនដេត ស្នងការរងទទួលការងារប្រឆាំងបទល្មើសគ្រឿងញៀន ។
នៅថ្ងៃទី៣ តុលា ឆ្នាំ២០២៣ វេលាម៉ោង២០.០០នាទីកម្លាំងផ្នែកប្រឆាំងគ្រឿងញៀននៃអធិការដ្ឋាននគរបាលក្រុងប៉ោយប៉ែតបានសហការជាមួយកម្លាំងនគរបាលព្រហ្មទណ្ឌចុះបង្ក្រាបទីតាំង(ខេ ធី វី-KTV) មួយកន្លែងមិនទាន់មានឈ្មោះយីហោក្នុងបុរីសានហូរដែលស្ថិតនៅភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
កម្លាំងបានឃាត់ខ្លួនជនសង្ស័យបានចំនួន១៥នាក់ (ស្រី០៥នាក់) ក្នុងនោះ មុខសញ្ញាបប្រើប្រាស់អាវុធខ្លីខុសច្បាប់និងផ្ដល់ទីតាំងសម្រាប់ប្រើប្រាស់គ្រឿងញៀននឹងរក្សាទុកវត្ថុតាងសង្ស័យជាសារធាតុញៀនខុសច្បាប់០១នាក់ ឈ្មោះផាន់ គួយ ភេទប្រុស អាយុ៣៦ឆ្នាំ ។
លោកឧត្តមសេនីយ៍ត្រី ធិន ស៊ិនដេត ស្នងការរង ទទួលផែនការងារប្រឆាំងបទល្មើសគ្រឿងញៀនបានបញ្ជាក់ថា៖តាមចម្លើយសារភាពរបស់ឈ្មោះផាន់ គួយ រូបគេពិតជាបានកាន់កាប់អាវុធខុសច្បាប់និងផ្តល់ទីតាំងប្រើប្រាស់និងរក្សាទុកសារធាតុញៀនសខុសច្បាប់ប្រាកដមែន ។
ចែករំលែកព័តមាននេះ