ខេត្តកំពង់ចាម ៖ សិស្សសាលាបឋមសិក្សាទួលថ្មម្នាក់ឈ្មោះ ខឿន រតនៈ អាយុ១០ឆ្នាំ ដែលមានផ្ទះនៅខាងក្រោយបន្ទាយទាហាន ក្នុងភូមិបឹងកុកទី២ សង្កាត់បឹងកុក ក្រុងកំពង់ចាម ប្រាប់ម្តាយថាទៅរៀនគួនៅវេលា ម៉ោង១រសៀល ថ្ងៃទី១៦ ឧសភា ២០១១ តែតាមពិតបែរជាទៅងូតទឹកទន្លេមេគង្គលេងក្បែរប្រដឹសកោះប៉ែនជាមួយមិត្តភក្តិ
ខេត្តកំពង់ចាម ៖ សិស្សសាលាបឋមសិក្សាទួលថ្មម្នាក់ឈ្មោះ ខឿន រតនៈ អាយុ១០ឆ្នាំ ដែលមានផ្ទះនៅខាងក្រោយបន្ទាយទាហាន ក្នុងភូមិបឹងកុកទី២ សង្កាត់បឹងកុក ក្រុងកំពង់ចាម ប្រាប់ម្តាយថាទៅរៀនគួនៅវេលា ម៉ោង១រសៀល ថ្ងៃទី១៦ ឧសភា ២០១១ តែតាមពិតបែរជាទៅងូតទឹកទន្លេមេគង្គលេងក្បែរប្រដឹសកោះប៉ែនជាមួយមិត្តភក្តិ ហើយបានលង់ទឹកស្លាប់រហូតមកដល់ម៉ោងជាង ៧ព្រឹក ថ្ងៃទី១៧ ឧសភា ទើបសពផុសអណ្តែតនៅភូមិរកាលើ សង្កាត់សំបួរមាស ក្រុងកំពង់ចាម ។
ស្ត្រីជាម្តាយឈ្មោះសូយ នាង អាយុ៣៣ឆ្នាំ រៀបរាប់ឲ្យកោះសន្តិភាពដឹងថា ក្រោយពីទទួលទានអាហារថ្ងៃត្រង់ហើយនាវេលាម៉ោងជាង១២ កូនប្រុសនាងឈ្មោះរតនៈសុំទៅរៀនគួនៅសាលា តែម៉ោង១ទើបនាងយល់ព្រមឲ្យទៅ ។ តាមការកត់សំគាល់ម៉ោង១រសៀលត្រូវចូលរៀននិងចេញនៅម៉ោង២រសៀល តែរហូតដល់ម៉ោង៣រសៀលទៅហើយមិនឃើញកូននាងជិះកង់ត្រឡប់មកផ្ទះវិញសោះ។ នាងបានជិះម៉ូតូចេញទៅតាមរកនៅសាលារៀន តែមិនជួបកូនប្រុសទេ។ បន្ទាប់មកទៀតនាងតាមរកនៅកន្លែងលេងហ្គេមនានានៅក្នុងក្រុងកំពង់ចាម នៅតែមិន ឃើញទៀត ហើយចេះតែប្រឹងប្រែងតាមរកបន្តទៀតនៅតាមផ្លូវមាត់ទន្លេ ព្រមទាំងសួរគេឯងផង តែមិនមានពន្លឺទៀត។ រហូតដល់យប់រូបនាងនិងក្រុមសាច់ញាតិតាមស្វះស្វែងរកពីកន្លែងមួយទៅកន្លែងមួយស្ទើរពេញក្រុងកំពង់ចាម ។ លុះដល់ព្រឹកថ្ងៃទី១៧ ឧសភា ក្រុមគ្រួសារបន្តតាមរកទៀត ហើយដល់វេលាម៉ោងជាង៨ព្រឹកបានទទួលដំណឹងថា មានសពក្មេងប្រុសម្នាក់អណ្តែតនៅមាត់់ទន្លេក្នុងភូមិរកាលើ ។ ខណៈពេលនាងទៅមើលដឹងថា ជាកូនរបស់នាង។
លោក គង់ សុខុម នាយសង្កាត់វាលវង់ ប្រាប់ថា ក្មេងប្រុសដែលលង់ទឹកទន្លេស្លាប់នេះមិនដឹងថា ងូតទឹកទន្លេលេងនៅត្រង់ទីតាំងណាមួយទេ ហើយក៏មិនដឹងជាមានគ្នាប៉ុន្មាននាក់ដែរ ។ ពេលបាត់ក្មេងប្រុសនោះមិនមានការភ្ញាក់ ផ្អើលឆោឡោទេរហូតមកដល់វេលាម៉ោងជាង៧ព្រឹកថ្ងៃទី១៧ ឧសភា ស្រាប់តែមានសពក្មេងប្រុសម្នាក់ត្រូវគេប្រទះឃើញផុសអណ្តែតនៅច្រាំងទន្លេត្រង់ ភូមិរកាលើ សង្កាត់សំបួរមាស ក្រុងកំពង់ចាម។ ភ្លាមៗនោះមិនមានអ្នកណាស្គាល់អត្តសញ្ញាណសពឡើយ ។ រហូតដល់វេលាម៉ោងជាង៨ព្រឹកទើបទទួលបានព័ត៌មានថា អ្នកភូមិបឹងកុកទី២ សង្កាត់បឹងកុក បានបាត់កូនប្រុស លុះពេលម្តាយទៅមើលទើបដឹងថាជាកូនរបស់ខ្លួនមែន។ សពក្មេងប្រុសនេះត្រូវបានឪពុកម្តាយនាំយកទៅបូជានៅវត្តដីដុះដើម្បីយកធាតុទៅធ្វើបុណ្យតាមប្រពៃណីខ្មែរ ៕
ចែករំលែកព័តមាននេះ