រាជធានីភ្នំពេញ ៖ ជនសង្ស័យចំនួន៥នាក់ ត្រូវបានកម្លាំងនគរបាលខណ្ឌឫស្សីកែវឃាត់ខ្លួន បន្ទាប់ពីធ្វើសកម្មភាពវាយប្លន់យកម៉ូតូនៅចំណុចដីឡូត៍មួយកន្លែង តាមផ្លូវបេតុង ភូមិទួលពពែ សង្កាត់ទួលសង្កែទី២ រួចគេចខ្លួនបានតែ៦ថ្ងៃ ។…
រាជធានីភ្នំពេញ ៖ ជនសង្ស័យចំនួន៥នាក់ ត្រូវបានកម្លាំងនគរបាលខណ្ឌឫស្សីកែវឃាត់ខ្លួន បន្ទាប់ពីធ្វើសកម្មភាពវាយប្លន់យកម៉ូតូនៅចំណុចដីឡូត៍មួយកន្លែង តាមផ្លូវបេតុង ភូមិទួលពពែ សង្កាត់ទួលសង្កែទី២ រួចគេចខ្លួនបានតែ៦ថ្ងៃ ។
ជនសង្ស័យដែលត្រូវឃាត់ខ្លួន ១-ឈ្មោះ អាត អារីហ្វីន ភេទប្រុស អាយុ៣៧ឆ្នាំ ,២.ឈ្មោះ ញ៉ែម
ហូវ ភេទប្រុស អាយុ២៨ឆ្នាំ , ៣.ឈ្មោះ អ៊ូច ចន្ទសម្បត្តិ ភេទប្រុស អាយុ៣២ឆ្នាំ, ៤.ឈ្មោះ លឹម ថា
វីត ភេទប្រុស អាយុ២៩ឆ្នាំ និង៥.ឈ្មោះ ទី ដាវី ភេទប្រុស អាយុ២០ឆ្នាំ មានទីលំំនៅ សង្កាត់ច្រាំងចំរេះទី១ ខណ្ឌឫស្សីកែវ រាជធានីភ្នំពេញ ។
តាមនគរបាលខណ្ឌប្ញស្សីកែវបានឲ្យដឹងថា កាលពីថ្ងៃទី០១ ខែសីហា ឆ្នាំ២០២៥ វេលាម៉ោង២០និង៣០នាទីយប់ ជនសង្ស័យមានបក្សពួក៥នាក់ ជិះម៉ូតូចំនួន២គ្រឿងបានធ្វើសកម្មភាពវាយជនរងគ្រោះប្លន់យកម៉ូតូ០១គ្រឿង ម៉ាក Honda Dream ផលិតឆ្នាំ២០១៦ មិនចាំស្លាកលេខនៅចំណុចដីឡូត៍ ផ្លូវបេតុង ភូមិទួលពពែ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ ។ ក្រោយធ្វើសកម្មភាពបានសម្រេច ក្រុមជនសង្ស័យបាននាំគ្នាជិះម៉ូតូគេចខ្លួនបាត់។
តាមនគរបាលបានឲ្យដឹងទៀតថា ដោយមានការដឹកនាំបញ្ជាពីលោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវ កម្លាំងជំនាញផ្នែកនគរបាលយុត្តិធម៌ ដឹកនាំដោយលោកវរសេនីយ៍ទោ ផល មេសា អធិការរងបាន ចុះត្រួតពិនិត្យកន្លែងកើតហេតុ និងបើកការស្រាវជ្រាវកំណត់អត្តសញ្ញាណជនសង្ស័យ រហូតមកដល់វេលាម៉ោង០២និងនាទីរំលងអធ្រាត្រចូលថ្ងៃទី០៧ ខែសីហា ឆ្នាំ២០២៥ ទើបចាប់ខ្លួនជនសង្ស័យចំនួន០៥នាក់ ត្រង់ចំណុចផ្លូវជាតិលេខ៥ ក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ព្រមទាំងដកហូតម៉ូតូ០២គ្រឿង។
ទោះបីជាយ៉ាងណា ម៉ូតូរបស់ជនរងគ្រោះត្រូវបានក្រុមជនសង្ស័យយកទៅលក់ឱ្យបុរសម្នាក់មិនស្គាល់អត្តសញ្ញាណ នៅចំណុចស្ពានអាកាសចោមចៅ ក្នុងខណ្ឌពោធិ៍សែនជ័យ រាជធានីភ្នំពេញ។
ជនសង្ស័យទាំង៥នាក់ត្រូវបាននគរបាលឃាត់ខ្លួននៅអធិការដ្ឋានខណ្ឌឬស្សីកែវ ដើម្បីកសាង
សំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់ ៕
ចែករំលែកព័តមាននេះ