ខេត្តស្ទឹងត្រែង ៖ សិស្សានុសិស្ស លោកគ្រូ អ្នកគ្រូ សាលាបឋមសិក្សាទន្សោង ក្នុងស្រុកសៀមបូក ខេត្តស្ទឹងត្រែង បានសំណូមពរដល់ស្ថាប័នពាក់ព័ន្ធជួយសាងសង់អគារសិក្សាមួយខ្នង ដើម្បីសម្រួលដល់ការរៀន និងបង្រៀន ខណៈបច្ចុប្បន្ននេះ សិស្សកំពុងតែរៀននៅក្នុងរោងដោល និងនៅតាមផ្ទះ ដែលជួបបញ្ហាប្រឈមផ្សេងៗ នៅក្នុងរដូវវស្សាភ្លៀងធ្លាក់ ។
ក្នុងសកម្មភាពរៀន និងបង្រៀន កុមារថ្នាក់ទី៤ ទី៥ និងទី៦ នៅភូមិទន្សោង ឃុំសៀមបូក ស្រុកសៀមបូក ខេត្តស្ទឹងត្រែងកាលពីដើមសប្តាហ៍នេះ លោកគ្រូ ជៀម វណ្ណៈ តំណាងឲ្យជនជាតិដើមភាគតិចគួយ បានរៀបរាប់ថា ៖ នៅពេលមានភ្លៀងម្ដងៗ សិស្សអង្គុយរៀន មិនបានទេ ព្រោះខ្យល់ទឹកភ្លៀងសាចចូល ហើយខែប្រាំងក្តី កូនសិស្សមករៀន ត្រូវដោះអាវចេញ ក៏មានដែរ ។
លោកបន្តថា នៅសាលាបឋមសិក្សាទន្សោងនេះ មានអគារមួយខ្នង មានចំនួន០៣បន្ទប់ សម្រាប់បង្រៀនថ្នាក់ទី១ ទី២ និងទី៣ ចំណែកទី៤ ទី៥ គឺខ្ចីផ្ទះប្រជាពលរដ្ឋបង្រៀន ហើយថ្នាក់ទី៦ បង្រៀននៅក្នុងរោងដោលជាបណ្តោះអាសន្ន អស់រយៈពេល១០ឆ្នាំមកហើយ ។
លោក សៅ សេង នាយកសាលាបបឋមសិក្សា ភូមិទន្សោង បានទទួលស្គាល់ថា នេះជាការតស៊ូទ្រាំនឹងភាពលំបាក ព្រោះតែចង់ឱ្យកូនចៅប្រជាពលរដ្ឋមានចំណេះដឹងដូចគេឯង ហើយភាពលំបាកនេះ ក៏ជាបញ្ហាប្រឈមធ្វើឱ្យកុមារមួយចំនួន បានបោះបង់ចោលការសិក្សា ផងដែរ ។
លោកបន្តថា ចំណែកការស្នើសុំសាលារៀននេះ លោក និងមាតាបិតាសិស្ស បានសុំទៅអង្គការ ភ្លែនអន្តរជាតិកម្ពុជា ប្រចាំខេត្តស្ទឹងត្រែង និងធ្វើរបាយការណ៍ ស្នើសុំទៅការិយាល័យអប់រំស្រុក រួចហើយ តែមិនទទួលបានព័ត៌មានអ្វីត្រឡប់មកវិញទេ ។
លោក ប៉ាវ បូណា ប្រធានការិយាល័យអប់រំ យុវជន និងកីឡា ស្រុកសៀមបូក បានបញ្ជាក់ថា តម្រូវការនេះ ពិតជាទាមទារឱ្យមានការជួយធ្វើការអភិវឌ្ឍគ្រប់ហេដ្ឋារចនាសម្ព័ន្ធ ព្រោះជាតំបន់ទីជនបទ ស្ថិតនៅឆ្ងាយដាច់ស្រយាល ផ្លូវក៏លំបាក ទៅមក ថែមទៀត ។
លោកបន្តថា ចំណែកការស្នើសុំសាលារៀននោះ លោកបានស្នើសុំ ទៅមន្ទីរអប់រំ យុវជន និងកីឡាខេត្ត រួចហើយដែរ ប៉ុន្តែមិនទាន់មានដំណឹងយ៉ាងណានោះទេ ហើយលោក នឹងតាមដានសួរនាំទៅមន្ទីរបន្តទៀត ។
សូមបញ្ជាក់ថា ការបង្រៀន និងរៀននៅក្នុងរោងដោលនេះ ជាករណីប្រឈមទៅនឹងគ្រោះថ្នាក់ផង នៅរដូវវស្សា ពេលមានព្យុះភ្លៀង ហើយត្រូវខកខានរៀនសូត្រ នឹងអាចធ្វើឱ្យកុមារបោះបង់ការសិក្សាមានការកើនឡើង ៕
ចែករំលែកព័តមាននេះ