រាជធានីភ្នំពេញ ៖ រដ្ឋបាលរាជធានីភ្នំពេញនឹងពង្រីកលូប្រឡាយបង្ហូរទឹកឱ្យកាន់តែធំ រួមទាំងតម្លើង
រាជធានីភ្នំពេញ ៖ រដ្ឋបាលរាជធានីភ្នំពេញនឹងពង្រីកលូប្រឡាយបង្ហូរទឹកឱ្យកាន់តែធំ រួមទាំងដំឡើងស្ថានីយបូមទឹកថ្មីបន្ថែមទៀត ដើម្បីបញ្ចៀសការជន់លិចពីជំនន់ទឹកភ្លៀង នៅក្នុងភូមិសាស្ត្ររាជធានីភ្នំពេញ ដើម្បីឱ្យស្របទៅតាមការរស់នៅរបស់ប្រពលរដ្ឋមានភាពស៊ីវីល័យ។
ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ លើកឡើងបែបនេះ ក្នុងឱកាសដឹកនាំកិច្ចប្រជុំ រៀបចំផែនការវិនិយោគហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹកសម្រាប់បញ្ជៀសការជន់លិចនៅភូមិសាស្ត្ររាជធានីភ្នំពេញ ជាមួយអភិបាលខណ្ឌទាំង១៤និងមន្ទីរពាក់ព័ន្ធ នាព្រឹកថ្ងៃទី០៤ ខែតុលា ឆ្នាំ២០២៣នេះ នៅសាលារាជធានីភ្នំពេញ។
ឯកឧត្តម ឃួង ស្រេង បានថ្លែងថា បច្ចុប្បន្នការរៀបចំប្រព័ន្ធលូប្រឡាយរំដោះទឹកបានល្អប្រសើរ រហូតទទួលបានការកោតសរសើរពីអន្តរជាតិនិងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ប៉ុន្តែទោះបីជាយ៉ាងណាក្តី ក៏នៅតែមានបញ្ហាប្រឈមខ្លះ ដែលទៀមទារួមគ្នា ដើម្បីរកដំណោះស្រាយ ធ្វើយ៉ាងណាបញ្ជៀសឱ្យបានពីការលិចលង់នៅពេលដែលមានភ្លៀងធ្លាក់ខ្លាំងនិងយូរម្តងៗ។ ដូច្នេះការប្រមូលព័ត៌មានជុំវិញប្រព័ន្ធលូ ប្រឡាយ ឱ្យបានគ្រប់ជ្រុងជ្រោយ គឺដើម្បីរិះរកវិធានការថ្មីៗបន្ថែមទៀត ឈានទៅរកការរំដោះទឹកក្នុងរាជធានីភ្នំពេញឱ្យបានកាន់តែល្អប្រសើរ និងប្រើប្រាស់បាន យូរអង្វែងពិសេសការបង្វែរផ្លូវទឹកពីខេត្តកំពង់ស្ពឺកុំចូលមករាជធានីភ្នំពេញ។
ឯកឧត្តមបន្ថែមថា ស្របពេលប្រជាពលរដ្ឋរស់នៅក្នុងរាជធានី ភ្នំពេញមានភាពស៊ីវីល័យ ដូចនេះ រដ្ឋបាលរាជធានីភ្នំពេញគឺត្រូវមានការគិតគូរ ចំពោះប្រព័ន្ធលូ ប្រឡាយ ដែលត្រូវកែលម្អ ឡើងវិញ ពិសេសគឺការពង្រីក ប្រឡាយបង្ហូរទឹកពីតូចទៅធំ ការតំឡើងស្ថានីយបូមទឹកឱ្យកាន់តែធំជាងមុននិងការតំឡើងស្ថានីយបូមទឹកថ្មីថែមទៀត ដើម្បីដោះស្រាយការលិចលង់ដោយជំនន់ទឹកភ្លៀងនៅរាជធានីភ្នំពេញបានយូរអង្វែងចាប់ពី២០ទៅ៣០ឆ្នាំ ។
ឯកឧត្តម ឃួង ស្រេង បានបន្ថែមទៀតថា រដ្ឋបាលរាជធានីភ្នំពេញនឹងប្រជុំជាមួយក្រសួងសេដ្ឋកិច្ចនិងហិរញ្ញវត្ថុ មន្ទីរសាធារការនិងដឹកជញ្ជូនរាជធានីភ្នំពេញនិងមន្ទីរធនធានទឹក និងឧតុនិយមរាជធានីភ្នំពេញ រៀបចំជាផែនការដាក់ទៅអន្តរក្រសួង ដើម្បីបន្តការអភិវឌ្ឍារចនាសម្ព័ន្ធក្រោមដី ឱ្យបានល្អ ដោយធ្វើយ៉ាងណា កុំឱ្យមានការគំរា.មកំហែងពីជំនន់ទឹកភ្លៀង។
លោក សាំ ពិសិដ្ឋ ប្រធានមន្ទីរសាធារការនិងដឹកជញ្ជូនរាជធានីភ្នំពេញបានលើកឡើងដែរថា ការស្ថាបនាប្រព័ន្ធ លូ នៅរាជធានីភ្នំពេញគិតមកដល់ឆ្នាំ២០២២ គឺស្ថាបនាបានបណ្តាញលូប្រវែងជាង៩២៤គីឡូម៉ែត្រ ហើយនឹងបន្តស្ថាបនាប្រព័ន្ធលូ ប្រឡាយជាបន្តបន្ទាប់ទៀត ក្នុងនោះបញ្ហាសំខាន់គឺក្រសួងរក្សាឱ្យបាននៅអាងស្តុបទឹក ដើម្បីរំទឹកចេញពីភ្នំពេញ៕
ចែករំលែកព័តមាននេះ