កំពូលកីឡាការិនីវាយតឺន្នីសរបស់បែលហ្ស៊ិកគីម ឃ្លីស្ទ័របានអះអាងថាខ្លួននឹងចូលរួមប្រកួតក្នុងក្របខណ្ឌធំFrench Openក្រោយពីរបួសកជើងបានជាសះស្បើយទាំងស្រុង។
កីឡាការិនីលំដាប់ទី២ពិភពលោករូបនេះកាលពីខែមេសាកន្លងទៅនៅក្នុងពិធីអាពាហ៍ពិពាហ៍បងប្អូនជីដូនមួយរបស់នាងបានក្រឡាច់ដាច់សរសៃកជើង តែនៅដើមខែឧសភានេះនាងអាចហ្វឹកហាត់បាន។ ការប្រកួតក្របខណ្ឌធំFrench Openឆ្នាំនេះនឹងចាប់ផ្តើមពីថ្ងៃទី១៧ខែឧសភាដល់ថ្ងៃទី៥ខែមិថុនា ។
ឃ្លីស្ទ័រដែលបានយកឈ្នះក្របខណ្ឌធំAustralian Openកាលពីខែមករាបាននិយាយថា៖«ការប្រកួតនឹងដំណើរការទៅបានល្អជាមិនខាន។ ការវាយកូនបាល់របស់ខ្ញុំបានល្អ ណាស់»។ កីឡាការិនីវ័យ២៧ឆ្នាំរូបនេះដែលបានយកឈ្នះពានជើងឯកក្របខណ្ឌធំUS Openផងដែរនោះបានបន្ថែមថា៖«ខ្ញុំរង់ចាំការប្រកួតយ៉ាងអន្ទះសា ។ បើនិយាយជារួមមក ការឈឺចាប់នៅមានតិចតួចដែរ ក៏ប៉ុន្តែការរុំដោយបង់យ៉ាងតឹងនឹងធ្វើឲ្យខ្ញុំកាន់តែមានសុវត្ថិភាពបន្ថែមទៀត។ ប្រៀបផ្លូវចិត្តរបស់ខ្ញុំគឺថា ខ្ញុំធ្លាប់បានឈ្នះពានជើងឯកក្របខណ្ឌធំកន្លងមក។ បើខ្ញុំលេងបានល្អ ខ្ញុំនឹងឈ្នះទៀត។ អាកប្បកិរិយាសំខាន់ណាស់ បើទោះបីជាស្ថានភាពផ្នែករាងកាយរបស់យើងខុសប្លែកគ្នាយ៉ាងណាក៏ដោយ»។
នាងឃ្លីស្ទ័រដែលទើបតែបានជាសះស្បើយពីរបួសស្មា និងកដៃផងដែរនោះមិនធ្លាប់បានយកឈ្នះពានជើងឯកក្របខណ្ឌធំFrench Openពីមុនមកទេ។ នេះគឺជាភាពកំសោយរបស់នាងក្នុងការប្រកួតនៅលើទីលានដីក្រហម។ តែទោះជាយ៉ាងណានាងក៏ធ្លាប់ដណ្តើមបានលេខ២នៅទីនេះ(French Open)២លើករួចមកហើយដែរ។
នាងឃ្លីស្ទ័រនៅក្នុងអាជីពធ្លាប់បានយកឈ្នះពានជើងឯកចំនួន៤១លើក(ស្ថិតនៅលំដាប់ទី១៣)។ នាងធ្លាប់បានឡើងកាន់តំណែងជាកីឡាកាតិនីលំដាប់ទី១ពិភពលោកកាលពីថ្ងៃទី១១ខែសីហាឆ្នាំ២០០៣។ ទឹកប្រាក់ដែលនាងរកបាននៅក្នុងអាជីពមានចំនួន២៣លាននិង៧រយពាន់ដុល្លារអាមេរិក(ស្ថិតនៅលំដាប់ទី៣) ៕
ចែករំលែកព័តមាននេះ