ខេត្តស្វាយរៀង ៖ ជាងធ្វើផ្ទះម្នាក់បានត្រូវក្រុមគ្រួសារដឹកយកទៅសង្គ្រោះនៅមន្ទីរពេទ្យខេត្តភ្លាមៗបន្ទាប់ពីរអិលជើងធ្លាក់ពីលើរនងផ្ទះ (មេជញ្ជាំង)កម្ពស់៣,២ម៉ែត្របោកក្បាលនឹងធ្នឹមក្រវាត់សសរផ្ទះបែកចេញឆ្អឹងលលាដ៍ក្បាល ។ ជនរងគ្រោះមានឈ្មោះអ៊ុក ផាត ភេទប្រុស អាយុ៣៥ឆ្នាំ មានទីលំនៅក្នុងភូមិត្រពាំងបន្ទាយ ឃុំអណ្តូងពោធិ៍
ខេត្តស្វាយរៀង ៖ ជាងធ្វើផ្ទះម្នាក់បានត្រូវក្រុមគ្រួសារដឹកយកទៅសង្គ្រោះនៅមន្ទីរពេទ្យខេត្តភ្លាមៗបន្ទាប់ពីរអិលជើងធ្លាក់ពីលើរនងផ្ទះ (មេជញ្ជាំង)កម្ពស់៣,២ម៉ែត្របោកក្បាលនឹងធ្នឹមក្រវាត់សសរផ្ទះបែកចេញឆ្អឹងលលាដ៍ក្បាល ។ ជនរងគ្រោះមានឈ្មោះអ៊ុក ផាត ភេទប្រុស អាយុ៣៥ឆ្នាំ មានទីលំនៅក្នុងភូមិត្រពាំងបន្ទាយ ឃុំអណ្តូងពោធិ៍ ស្រុករមាសហែក ជាជាងធ្វើផ្ទះ ឈើ ។
ហេតុការណ៍ខាងលើនេះបានកើតឡើងកាលពីវេលាម៉ោង៤រសៀលថ្ងៃទី១៦ ឧសភា នៅចំណុចខាងជើងផ្ទះជនរងគ្រោះប្រមាណជា១៥០ម៉ែត្រ ស្ថិតក្នុងភូមិត្រពាំងបន្ទាយ ។ តាមការឱ្យដឹងពីឈ្មោះស្រី ចាន់ថា អាយុ៣៧ឆ្នាំ ជាជាងធ្វើផ្ទះជាមួយជនរងគ្រោះបានប្រាប់ថា នៅពេលកើតហេតុនោះរូបគាត់និងជនរងគ្រោះ ព្រមទាំងគ្នីគ្នាពីរនាក់ផ្សេងទៀតកំពុងឡើងវាយផ្ទោងដំបូលផ្ទះ ហើយពេលនោះមិនដឹងជាមានមូលហេតុអ្វីទេ ស្រាប់តែជនរងគ្រោះរអិលជើងធ្លាក់ពីលើរនងផ្ទះមកក្រោម បោកក្បាលនឹងដុំឥដ្ឋដែលរៀបជាធ្នឹមក្រវាត់ជើងសសរផ្ទះបណ្តាលឱ្យដាច់រយះក្បាលប្រវែងកន្លះចង្អាមមើលឃើញឆ្អឹងលលាដ៍ក្បាលសស្ងាច ។
ប្រភពដដែលនេះបានបន្តទៀតថា ក្រោយពេលកើតហេតុភ្លាមជនរងគ្រោះនៅដឹងស្មារតីនៅឡើយទេ ប៉ុន្តែដោយសារតែឈាមហូរចេញមកឥតឈប់ធ្វើឱ្យជនរងគ្រោះខ្សោយទៅៗ រហូតដល់សន្លប់បាត់ស្មារតីតែម្តង ។ លុះប្រមាណជាកន្លះម៉ោងក្រោយមកទើបរថយន្តសាមុយរបស់មន្ទីរពេទ្យបង្អែកស្រុករមាសហែក មកដល់ ក៏រៀបចំដាក់អុកស៊ីហ្សែនជនរងគ្រោះនិងដឹកយកទៅកាន់មន្ទីរពេទ្យខេត្តដើម្បីធ្វើការជួយសង្គ្រោះ ។
ក្រុមគ្រូពេទ្យបានឱ្យដឹងថា ក្រោយពីធ្វើការលាងនិងដេរមុខរបួសចំនួន៩ថ្នេររួចមក ជនរងគ្រោះបានដឹងខ្លួនឡើងវិញហើយ ប៉ុន្តែមិនអាចកម្រើកខ្លួនប្រាណដៃជើងបានទេ ទើបគ្រូពេទ្យសន្និដ្ឋានថាមុខរបួសបានប៉ះពាល់ទៅដល់ខួរក្បាលហើយ ប៉ុន្តែមិនដឹងថាកម្រិតណានោះទេទាល់តែទៅស្កែនខួរក្បាលនៅភ្នំពេញទើបដឹង ៕
ចែករំលែកព័តមាននេះ