អតិថិជនរបស់ «បុរីទ្រី គីម ចំការដូងគម្រោងទី១០» ស្ថិតនៅភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ជាង៥០នាក់ បានលើកគ្នាទៅកាន់សាលាខណ្ឌដង្កោ កាលពីវេលាព្រឹកថ្ងៃទី០៣ ខែតុលា ឆ្នាំ២០២៣ ដើម្បីស្នើសុំឲ្យជួយអន្តរាគមន៍។ បន្ទាប់ពីពួកគាត់ទិញផ្ទះពីបុរី
រាជធានីភ្នំពេញ ៖ អតិថិជនរបស់ «បុរីទ្រី គីម ចំការដូងគម្រោងទី១០» ស្ថិតនៅភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ជាង៥០នាក់ បានលើកគ្នាទៅកាន់សាលាខណ្ឌដង្កោ កាលពីវេលាព្រឹកថ្ងៃទី០៣ ខែតុលា ឆ្នាំ២០២៣ ដើម្បីស្នើសុំឲ្យជួយអន្តរាគមន៍។ បន្ទាប់ពីពួកគាត់ទិញផ្ទះពីបុរីខាងលើនេះ ហើយអ្នកខ្លះបង់ប្រាក់បានចំនួន៣០ភាគរយ ទៅ៨០ភាគរយ និងអ្នកខ្លះទៀតបង់គ្រប់១០០ភាគរយទៅហើយ ប៉ុន្តែពុំទាន់ទទួលបានផ្ទះឡើយ។
មិនត្រឹមតែប៉ុណ្ណោះ ស្រាប់តែបែកធ្លាយរឿងម្ចាស់បុរីទិញដីគេឲ្យលុយមិនគ្រប់ ហើយត្រូវម្ចាស់ដីរារាំងមិនឲ្យបន្តការសាងសង់ផ្ទះតទៅទៀតឡើយ រហូតពេលនេះ ម្ចាស់បុរីខាងលើ ក៏បានរត់គេចខ្លួនលែងទទួលខុសត្រូវថែមទៀតផង។ ជាហេតុធ្វើឲ្យពួកគាត់មានការព្រួយបារម្ភយ៉ាងខ្លាំង និងអស់ទំនុកចិត្តទៅលើម្ចាស់បុរី ទើបពួកគាត់កាន់រូបថតសម្ដេចអគ្គមហាសេនាបតីតេជា ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងរូបថតសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ និងរូបថតលោកអភិសន្តិបណ្ឌិត ស សុខា រដ្ឋមន្ត្រីក្រសួងមហាផ្ទៃលើកគ្នាទៅរកអាជ្ញាធរខណ្ឌដង្កោ ដើម្បីឲ្យជួយដោះស្រាយ។
ក្រុមអ្នកតវ៉ាខាងលើ បាននិយាយប្រាប់ឱ្យដឹងថា «ម្ចាស់បុរីទ្រីគីមនោះ មានប្ដីឈ្មោះ ហេង ទ្រី និងមានប្រពន្ធឈ្មោះ សុង សេងហួយ ហើយផ្ទះនៅក្នុងបុរីនោះ ចែកចេញជា២ប្រភេទ គឺទី១- ប្រភេទផ្ទះអាជីវកម្ម ក្នុង១ខ្នងតម្លៃចាប់ពីជាង១០ម៉ឺនដុល្លារឡើងទៅ និងទី២- ប្រភេទវីឡាកូនកាត់ តម្លៃចាប់ពីជាង៥ម៉ឺនដុល្លារឡើងទៅ។ ពួកគាត់ចូលទៅទិញផ្ទះនៅទីនោះ តាំងពីក្រុមហ៊ុនបុរីនេះនៅពេលចាប់ផ្ដើមបុ.កគ្រឹះសាងសង់ដំបូង ហើយបានធ្វើកុងត្រាជាមួយគ្នា ដោយម្ចាស់បុរីធានាត្រឹមរយៈពេល២ឆ្នាំនឹងបានផ្ទះនៅ។ ពួកគាត់ទិញផ្ទះតាមរយៈការបង់រំលស់ ហើយបើគិតមកដល់ពេលនេះ គឺមានអ្នកខ្លះបង់បាន៣០ ទៅ៥០% ឬ៨០% រីឯអ្នកខ្លះទៀតបានបង់គ្រប់ចំនួន១០០ភាគរយទៅហើយ ប៉ុន្តែពុំទទួលបានផ្ទះសម្រាប់រស់នៅឡើយ»។
ក្រុមអ្នកតវ៉ាខាងលើ បានប្រាប់ឲ្យដឹងបន្ថែមទៀតថា «ដំបូងឡើយ ម្ចាស់បុរីបានសាងសង់ផ្ទះជាធម្មតា ដោយផ្ទះខ្លះសង់បានប្រហែល៨០ភាគរយទៅហើយ ប៉ុន្តែកាលពីដើមឆ្នាំ២០២៣ ស្រាប់តែផ្អាកការសាងសង់ទៅវិញ ហើយនៅពេលពួកគាត់ដែលជាអតិថិជនសួរនាំ ស្រាប់តែបែកធ្លាយរឿងទំនាស់រវាងម្ចាស់បុរី និងម្ចាស់ដីឯណាវិញ។ ដោយសារតែម្ចាស់បុរីទិញដីឲ្យលុយគេមិនគ្រប់ ហើយត្រូវម្ចាស់ដីរារាំងមិនឲ្យសាងសង់បន្តទៀត ចំណែកឯពួកគាត់ ដែលជាអតិថិជនពុំបានដឹងថា បុរីនេះមានភាពរញ៉េរញ៉ៃបែបនេះសោះ ព្រោះនៅពេលចូលទៅទិញដំបូង ម្ចាស់បុរីធានាអះអាងថា គ្មានរឿងអ្វីកើតឡើង គ្មានទំនាស់ ឬពាក់ព័ន្ធរឿងអាក្រ.ក់អ្វីទេ»។
ប្រភពដដែលបានប្រាប់ទៀតថា «ក្រោយពីផ្អាកការសាងសង់ផ្ទះ និងបែករឿងទំនាស់ជាមួយម្ចាស់ដីរួចមក លោក ហេង ទ្រី និងប្រពន្ធឈ្មោះ សុង សេងហួយ ដែលជាម្ចាស់បុរីខាងលើ បានរកលេសដោះសារជាមួយពួកគាត់ម្ដងហើយម្ដងទៀត មានលេសមិនចេះចប់សោះ។ មិនត្រឹមតែប៉ុណ្ណោះ នៅពេលពួកគាត់សួរនាំច្រើនពេក បែរជាឲ្យលេខទូរស័ព្ទទាក់ទងទៅកាន់មេធាវីការពារក្ដីរបស់ម្ចាស់ដីទៅវិញ ហើយទីបំផុតម្ចាស់បុរីរូបនេះ បានរត់គេចខ្លួនបាត់ ទាក់ទងលែងបានតែម្ដង។ ការមិនទទួលខុសត្រូវបែបនេះ ធ្វើឲ្យពួកគាត់មានការព្រួយបារម្ភកាន់តែខ្លាំងឡើងថែមទៀត ទើបរត់រកឲ្យអាជ្ញាធរជួយ ហើយមុននឹងទៅ ក៏បានដាក់លិខិតបណ្ដឹងចូលសាលាខណ្ឌដង្កោនេះ កាលពី១អាទិត្យមុនរួចមកហើយដែរ»។
ក្រោយពេលក្រុមអ្នកតវ៉ាទៅដល់ អាជ្ញាធរខណ្ឌដង្កោបានអញ្ជើញឲ្យពួកគាត់ចូលទៅខាងក្នុងបរិវេណសាលាខណ្ឌ ចៀសវាងការប៉ះពាល់ដល់សណ្ដាប់ធ្នាប់តាមដងផ្លូវ រួចបានហៅតំណាង៦នាក់ឲ្យចូលជួប ដើម្បីសួរនាំ និងរកវិធីសាស្ត្រក្នុងការដោះស្រាយលើបញ្ហានេះ ប៉ុន្តែនៅពុំទាន់ដឹងថា តើអាជ្ញាធរមានគន្លឹះ ដើម្បីដោះស្រាយរឿងនេះតាមរបៀបណានៅឡើយទេ?៕
ចែករំលែកព័តមាននេះ