ក្រុងហាំងចូវ ដាក់គោលដៅធ្វើម្ចាស់ផ្ទះព្រឹត្តិការណ៍ពហុកីឡា ខណៈកំពុងរីករាយនឹងកីឡាអាស៊ីហ្គេម
ចិន ៖ មន្ត្រីរបស់ប្រទេសចិនអះអាងថា ទីក្រុងហាំងចូវ (Hangzhou) កំពុងកំណត់គោលដៅក្នុងការ
ចិន ៖ មន្ត្រីរបស់ប្រទេសចិនអះអាងថា ទីក្រុងហាំងចូវ (Hangzhou) កំពុងកំណត់គោលដៅក្នុងការធ្វើជាម្ចាស់ផ្ទះព្រឹត្តិការណ៍កីឡាសំខាន់ៗ នាពេលអនាគត ខណៈដែលកំពុងបន្តដំណើរការប្រកួតព្រឹត្តិការណ៍កីឡាអាស៊ីហ្គេមលើកទី១៩ ឆ្នាំ២០២២ (Asian Games) ដ៏ធំបំផុតមិនធ្លាប់មានរបស់ទីក្រុងនៅភាគពាយ័ព្យ ខេត្តហ្សឺជាំង (Zhejiang) មួយនេះ។
អត្តពលិកចំនួន ១២,៥០០នាក់ មកពី ៤៥ ប្រទេស បាននិងកំពុងប្រកួតលើវិញ្ញាសាចំនួន ៤០ នៅក្នុងរយៈពេល១៥ថ្ងៃ នៃព្រឹត្តិការណ៍ដែលបានធ្វើពិធីបើក កាលពីថ្ងៃទី២៣ ខែកញ្ញា កន្លងទៅ នឹងគ្រោងបញ្ចប់នៅថ្ងៃទី៨ ខែតុលា ខាងមុខនេះ ត្បិតព្រឹត្តិការណ៍នេះ បានពន្យារពេល១២ខែ ដោយសារតែជំងឺរាតត្បាតកូវីដ-១៩។
ទីតាំង និងកីឡដ្ឋានសរុបចំនួន ៥៤ កំពុងបម្រើដល់ការប្រកួត ដោយនៅក្នុងនោះមានទីតាំងចំនួន ១២ ត្រូវបានសាងសង់ថ្មី ខណៈទីតាំងផ្សេងទៀត ត្រូវបានជួសជុលកែលំអបន្ថែម ដោយបំពាក់គ្រឿងបរិក្ខារទំនើបៗ និងទទួលបានការកោតសរសើរយ៉ាងខ្លាំងពីលោក Vinod Kumar Tiwari អគ្គនាយកស្តីទីក្រុមប្រឹក្សាអូឡាំពិកអាស៊ី ដោយសរសើរថា «ស្តង់ដារកីឡាអូឡាំពិក» ។ ហាំងចូវ គឺជាទីក្រុងចិនដីគោកទី៣ ដែលរៀបចំព្រឹត្តិការណ៍អាស៊ីហ្គេម បន្ទាប់ពីទីក្រុងប៉េកាំង (Beijing) កាលពីឆ្នាំ ១៩៩០ និងទីក្រុងក្វាងចូវ (Guangzhou) កាលពីឆ្នាំ ២០១០ ។
លោក Mao Genhong អគ្គលេខាធិការរងរៀបចំព្រឹត្តិការណ៍កីឡាអាស៊ីហ្គេមទីក្រុងហាំងចូវ និងរដ្ឋាភិបាលប្រជាជនក្រុងហាំងចូវបានថ្លែងថា «បទពិសោធន៍ នៃការរៀបចំព្រឹត្តិការណ៍អាស៊ីហ្គេម គឺជាមូលដ្ឋានគ្រឹះដ៏សំខាន់បំផុត សម្រាប់ព្រឹត្តិការណ៍ពហុកីឡានាពេលអនាគត។ កីឡាអូឡាំពិកមានអត្តពលិកចូលរួម ១ម៉ឺននាក់ ហើយកីឡាអាស៊ីមានប្រមាណ ១២,០០០នាក់។ យើងមានព្រឹត្តិការណ៍ប្រកួតចំនួន ៤៥។ យើងបានប្រារព្ធព្រឹត្តិការណ៍សាកល្បងចំនួន ៥៧ នៅឆ្នាំនេះ ហើយឆ្នាំនេះ យើងបានរៀបចំព្រឹត្តិការណ៍សាកល្បងកម្រិតអន្តរជាតិចំនួន ១០។ ដូច្នេះទីក្រុងហាំងចូវ កំពុងស្ថិតក្នុងដំណើរការព្យាយាមនាំយកព្រឹត្តិការណ៍កីឡាសំខាន់ៗ បន្ថែមទៀតក្នុងរយៈពេលប៉ុន្មានឆ្នាំខាងមុខនេះ»។
អគ្គលេខាធិការរងដដែលរូបនេះ បានបន្ថែមថា «រដ្ឋាភិបាលមូលដ្ឋានមួយចំនួន នឹងទទួលបន្ទុកលើតួនាទីពួកគេ ប្រកបដោយការទទួលខុសត្រូវច្បាស់លាស់ ដើម្បីអាចរៀបចំឱ្យមានស្តង់ដារដូចព្រឹត្តិការណ៍អាស៊ីហ្គេម ហើយខ្ញុំគិតថា ការទទួលខុសត្រូវច្បាស់លាស់នេះ នឹងមានគុណសម្បត្តិខ្លះ។ ម្ចាស់ផ្ទះ និងកន្លែងប្រកួតក្នុងស្រុក នឹងធ្វើការរួមគ្នាលើប្រតិបត្តិការកន្លែងប្រកួត ហើយយើងសង្ឃឹមថា យើងនឹងយកបទពិសោធន៍មានពីប្រតិបត្តិការកីឡាអាស៊ីហ្គេម ដើម្បីរៀបចំព្រឹត្តិការណ៍កីឡាសំខាន់ៗផ្សេងទៀត នាពេលអនាគត»។
គួរបញ្ជាក់ថា គិតត្រឹមព្រឹកថ្ងៃទី០៣ ខែតុលា ឆ្នាំ២០២៣ នៃព្រឹត្តិការណ៍អាស៊ីហ្គេមលើកទី១៩ ម្ចាស់ផ្ទះចិនកំពុងបន្តនាំមុខកំពូលតារាងមេដាយបណ្តោះអាសន្ន ដោយឈ្នះមេដាយសរុបចំនួន ២៧០គ្រឿង មាស ១៤៧ ប្រាក់ ៨១ និងសំរឹទ្ធ ៤២ តាមក្រោយជប៉ុនដែលឈ្នះមេដាយសរុបចំនួន ១២២គ្រឿង មាស ៣៣ ប្រាក់ ៤៤ និងសំរឹទ្ធ ៤៥ ចំណាត់ថា្នក់លេខ៣ កូរ៉េខាងត្បូង ឈ្នះមេដាយសរុបចំនួន ១៣៣គ្រឿង មាស ៣១ ប្រាក់ ៣៩ និងសំរឹទ្ធ ៦៣៕ (ប្រភពពី Inside The Games)
ចែករំលែកព័តមាននេះ