- ភ្នំពេញ
នៅលើបណ្តាញសង្គមមានការពេបជ្រាយច្រើន ក្រោយពេលដែលក្រសួងទេសចរណ៍ បានចេញនូវរបាយការណ៍អំពីចំនួនភ្ញៀវទេសចរបរទេសមកកាន់កម្ពុជានៅក្នុងរយៈពេល៨ខែ ខណៈដែលប្រទេសជិតខាងកម្ពុជា ប្រកាសចេញនូវតួរលេខ
នៅលើបណ្តាញសង្គមមានការពេបជ្រាយច្រើន ក្រោយពេលដែលក្រសួងទេសចរណ៍ បានចេញនូវរបាយការណ៍អំពីចំនួនភ្ញៀវទេសចរបរទេសមកកាន់កម្ពុជានៅក្នុងរយៈពេល៨ខែ ខណៈដែលប្រទេសជិតខាងកម្ពុជា ប្រកាសចេញនូវតួរលេខជាបន្តបន្ទាប់ដែរនោះ។
ក្រសួងទេសចរណ៍បានប្រកាសថា សម្រាប់រយៈពេល៨ខែដើមឆ្នាំ២០២៣នេះ កម្ពុជា ទទួលបានទេសចរបរទេសប្រមាណ ៣,៥ លាននាក់ កើនឡើង ២៥០,៨% ធៀបនឹងរយៈពេលដូចគ្នាឆ្នាំ២០២២។
ប្រភពដដែលបានបន្តទៀតថា ក្នុងចំណោមភ្ញៀវទេសចរបរទេសទាំងនោះ មានភ្ញៀវទេសចរ ដែលចូលតាមផ្លូវអាកាសមានចំនួនប្រមាណ ១,២ លាននាក់ ដោយកើនឡើង ២០៦,១% ធៀបនឹងរយៈពេលដូចគ្នានៃឆ្នាំ២០២២ ហើយតាមផ្លូវគោក និងផ្លូវទឹកសម្រាប់ មានចំនួន ប្រមាណ ២,២៨ លាននាក់។
ប្រភពដដែលបានបន្តថា តាមការរំពឹងទុក កម្ពុជានឹងទទួលបានទេសចរអន្តរជាតិក្នុងរង្វង់ ប្រមាណ៤,៥ លាន ទៅ ៥ លាននាក់សម្រាប់ពេញមួយឆ្នាំ២០២៣នេះ។
នេះគឺជាតួរលេខដែលប្រកាសដោយក្រសួងទេសចរណ៍របស់កម្ពុជា ប៉ុន្តែសម្រាប់វៀតណាមវិញ បានឲ្យដឹងថា នៅក្នុងរយៈពេល៩ខែ កន្លងមកនេះ វៀតណាមបានស្វាគមន៍ភ្ញៀវទេសចរបរទេសសរុប ៨,៩ លាននាក់ ។
ប្រភពដដែលបានបន្តថា នៅក្នុងចំណោមភ្ញៀវទេសចរបរទេសទាំងនោះ គឺមកពីអាស៊ីមានប្រមាណជា៦,៨៥លាននាក់ មកពីអឺរ៉ុបប្រមាណជាជាង១លាននាក់ ពីអាមេរិកមានចំនួនប្រមាណជាជិត៧សែននាក់ មកពីអូសេអានី ជាង២សែននាក់ និងពីអាហ្វ្រិក ជាង១ម៉ឺននាក់ ។
ដោយផ្អែកនៅលើគោលនយោបាយបើកចំហរទិដ្ឋាការថ្មី ដែលបានដាក់ចេញកាលពីខែសីហា កន្លងទៅ សម្រាប់ឆ្នាំ២០២៣ វៀតណាមអាចនឹងទាក់ទាញភ្ញៀវទេសចរបរទេសចាប់ពី ១០ ទៅ ១២ លាននាក់ ។
សម្រាប់ថៃវិញ នៅក្នុងរយៈពេល៩ខែកន្លងមក តួរលេខបានបង្ហាញថា ថៃបានទាក់ទាញភ្ញៀវទេសចរបរទេសដល់ទៅ ១៩ លាននាក់ ប៉ុន្តែរដ្ឋបាលថៃ មិនអស់ចិត្តទេ ហើយនៅតែថា ចំនួននេះតិចជាងគោលដៅដែលខ្លួនចង់បាន ដូច្នេះហើយថៃ ក៏បានដាក់ចេញនូវគោលនយោបាយថ្មីថែមទៀត ពោលគឺគោលនយោបាយលើកលែងទិដ្ឋាការដល់អ្នកទេសចរចិន ដោយរំពឹងថា ខ្លួនអាចនឹងបន្ថែមការទាក់ទាញទេសចរចិន បាន៤លាននាក់ នៅក្នុងរយៈពេលនៃការអនុវត្តគោលនយោបាយថ្មីដែលបានដាក់ចេញ ពីថ្ងៃទី២៥ ខែកញ្ញា ឆ្នាំ២០២៣ ដល់ថ្ងៃទី២៩ ខែកុម្ភៈ ឆ្នាំ២០២៤។
មកដល់ពេលនេះ អ្នកជំនាញថៃបានអះអាងថា ទីផ្សារទេសចរណ៍ចិនមានសារៈសំខាន់បំផុតសម្រាប់ការងើបឡើងវិញ នៃសេដ្ឋកិច្ចរបស់ប្រទេសថៃ ដោយសារវាផ្តល់នូវសក្តានុពលយ៉ាងច្រើនសម្រាប់កំណើនខ្ពស់ទាំងប្រាក់ចំណូល និងជំរុញកំណើនវិស័យពាក់ព័ន្ធ ខណៈដែលទីផ្សារចិននៅតែប្រឈមមុខនឹងបញ្ហា ។
ឃើញតួរលេខទាំងនេះ យើងជាខ្មែរសូមកុំច្រណែន ពីព្រោះនេះ គឺជាផលនៃការខិតខំរបស់ប្រទេសជិតខាងទាំងនេះ ខណៈដែលគេដឹងថា ថៃ និងវៀតណាម គឺសុទ្ធសឹងតែជាប្រទេសជិតខាង ដែលមានពលរដ្ឋ និងទឹកដីធំជាងកម្ពុជាទាំងអស់ ហើយក៏មានសេដ្ឋកិច្ចខ្លាំងជាងកម្ពុជាដែរ។
ប្រទេសវៀតណាម មានផ្ទៃដីប្រមាណជា ៣៣១.២១២ គីឡូម៉ែត្រការ៉េ និងមានប្រជាជនជាង ១០០លាននាក់ ដោយឡែកថៃមានផ្ទៃដីរហូតដល់ទៅ ៥១៣.១២០ គីឡូម៉ែត្រការ៉េ និងមានប្រជាជនសរុប ជាង៧០លាននាក់ ដូច្នេះប្រទេសជិតខាងទាំងពីរនេះ គឺពិតជាមានធនធាន និងមានសក្តានុពលច្រើននៅក្នុងការទាក់ទាញទេសចរណ៍បរទេស ប៉ុន្តែកម្ពុជាក៏កុំអស់សង្ឃឹម។
មកដល់ពេលនេះ ក្បាលម៉ាស៊ីនដឹកនាំខាងវិស័យទេសចរណ៍កម្ពុជា ទើបតែចូលកាន់ការងារ បានជាង១ខែទេ ដូច្នេះអាចថា ត្រូវការពេលវេលាសិក្សា និងវា.យតម្លៃនូវយុទ្ធសាស្ត្របន្ថែមទៀត ដើម្បីដាក់ចេញទៅមានប្រសិទ្ធភាព ។ គោលដៅ និងយុទ្ធសាស្ត្រដែលបានដាក់សម្រាប់វិស័យទេសចរណ៍នៅពេលនេះ ជាគោលដៅដែលមានស្រាប់ទេ ដូច្នេះសូមទុកពេល ហើយសង្ឃឹមថា នឹងអាចមានការវិវត្តន៍ទៅមុខនៅខែវិច្ឆិកា ឆ្នាំ២០២៣ ខាងមុខ ដោយមកដល់ពេលនេះ មានព័ត៌មានថា អ្នកជំនាញការ និងអ្នកដែលពាក់ព័ន្ធកំពុងតែជជែកគ្នាយ៉ាងស្វិតស្វាញ ដើម្បីកំណត់គោលនយោបាយមួយដែលមានប្រសិទ្ធភាព ។
មិនតែរដ្ឋាភិបាលទេ សូម្បីតែប្រជាជនកម្ពុជា ក៏ត្រូវនាំគ្នាខិតខំផងដែរ តាមសមត្ថភាពរបស់ខ្លួន ដូចជាធ្វើជាពលរដ្ឋពោរពេញដោយក្តីញញឹម និងការទទួលរាក់ទាក់ ចំណែកអ្នករកស៊ីខាងទេសចរណ៍ដូចជា អ្នកបើកសណ្ឋាគារ អ្នកបើកភោជនីយដ្ឋាន និងអ្នកលក់វត្ថុអនុស្សាវររីយ៍ជាដើម ត្រូវតែរកស៊ីប្រកបដោយសីលធម៌ ស្មោះត្រង់ និងមិនត្រូវបោ.កប្រាស់អ្នកទេសចរណ៍បរទេសឡើយ៕
សរសេរដោយ ៖ ហេង ចេស្តារ
កែសម្រួលដោយ ៖ ប្រេ វីន
ចែករំលែកព័តមាននេះ