ការប្រកួតមួយនៅលីគកំពូលហូឡង់ត្រូវរំសាយ ក្រោយអ្នកចាំទីម្នាក់ស្ទើរបាត់បង់ជីវិត
ហូឡង់ ៖ អ្នកចាំទី Etienne Vaessen ស្ទើរតែគ្រោះថ្នាក់ដល់អាយុជីវីត ពោលគឺនៅអំឡុងពេលការ
ហូឡង់ ៖ អ្នកចាំទី Etienne Vaessen ស្ទើរតែគ្រោះថ្នាក់ដល់អាយុជីវីត ពោលគឺនៅអំឡុងពេលការប្រកួតរវាងក្រុមម្ចាស់ផ្ទះ RKC Waalwijk ទល់នឹងក្រុមភ្ញៀវ Ajax នៃលីគកំពូលហូឡង់ Eredivisie កាលពីថ្ងៃទី៣០ ខែកញ្ញា ឆ្នាំ២០២៣ កន្លងទៅ។
ជំនួបដែលធ្វើឡើងនៅក្នុងកីឡដ្ឋាន Mandemakers ត្រូវបានរំសាយចោល បន្ទាប់ពីលេងបាន៨៤នាទីទៅហើយ ក្រោយពេលខ្សែប្រយុទ្ធហូឡង់ Brian Brobbey របស់ក្រុម Ajax បានទាត់ចំក្បាលអ្នកចាំទីហូឡង់ Etienne Vaessen របស់ក្រុម RKC Waalwijk ដោយអចេតនានៅពេលរត់ប្រជែង ដើម្បីស៊ុតបាល់បញ្ចូលទី។
អ្នកចាំទី Etienne បានសន្លប់ស្តុកស្តឹងគ្មានចលនា ខណៈកំពុងទទួលការសង្គ្រោះបឋមពីពេទ្យជំនាញលើទីលានប្រកួត ស្របពេលដែលកីឡាករមួយចំនួនឈរស្រក់ទឹកភ្នែក និងបន់ស្រន់ នៅពេលបុគ្គលិកពេទ្យកំពុងសង្គ្រោះជីវិត Etienne។ ប៉ុន្តែទោះយ៉ាងណាក៏ដោយ អ្នកចាំទីវ័យ២៨ឆ្នាំរូបនេះបានដឹងខ្លួនមកវិញ អំឡុងពេលត្រូវបានសែងចេញពីទីលានដោយហ្វ្រង់កា។
យោងតាមសេចក្តីថ្លែងការណ៍របស់ក្លិប RKC Waalwijk បានបញ្ជាក់ថា ស្ថានភាពអ្នកចាំទី Etienne ល្អប្រសើរឡើងវិញ ហើយកំពុងបន្តសម្រាកទទួលការព្យាបាលយ៉ាងយកចិត្តទុកដាក់ពីពេទ្យជំនាញ ហើយក្លិបសង្ឃឹមថា នឹងឃើញអ្នកចាំទីរបស់ពួកគេ ត្រឡប់មកកាន់ទីលានប្រកួតវិញឆាប់ៗនេះ។
ការប្រកួតរវាងក្រុមទាំងពីរត្រូវបានរំសាយចោល ដោយនៅសល់ម៉ោងធម្មតាតែ៦នាទីទៀតប៉ុណ្ណោះ ចំពេលដែលក្រុម Ajax កំពុងនាំមុខលទ្ធផល ៣-២ ។ អ្នករៀបចំការប្រកួតនៅកីឡដ្ឋានបានពន្យល់ថា កីឡាករមួយចំនួនរងការប៉ះពាល់អារម្មណ៍ខ្លាំង និងមិនអាចបន្តការប្រកួតបានឡើយ។ ពាក់ព័ន្ធជុំវិញបញ្ហានេះ ក្លិប Ajax ក៏បានបង្ហោះសារលើបណ្តាញសង្គម X យ៉ាងដូច្នេះថា «នេះគឺលើសពីបាល់ទាត់ទៅទៀត យើងសូមអធិស្ឋានដល់ Etienne ថាអ្នកនឹងមិនអីនោះទេ»៕ (ប្រភពពី BBC)
ចែករំលែកព័តមាននេះ