ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី និងជាប្រធានក្រុមប្រឹក្សាស្ដារអភិវឌ្ឍន៍ វិស័យកសិកម្ម និងជនបទ មានប្រសាសន៍ថា យុទ្ធនាការកាត់បន្ថយការប្រើប្រាស់ប្លាស្ទិកនាថ្ងៃនេះ គឺមាន សារៈសំខាន់ខ្លាំងណាស់ វាជាយុទ្ធនាការបោះជំហានថ្មីមួយទៀតនៅក្នុងការ
ខេត្តកំពង់ឆ្នាំង ៖ ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី និងជាប្រធានក្រុមប្រឹក្សាស្ដារអភិវឌ្ឍន៍ វិស័យកសិកម្ម និងជនបទ មានប្រសាសន៍ថា យុទ្ធនាការកាត់បន្ថយការប្រើប្រាស់ប្លាស្ទិកនាថ្ងៃនេះ គឺមាន សារៈសំខាន់ខ្លាំងណាស់ វាជាយុទ្ធនាការបោះជំហានថ្មីមួយទៀតនៅក្នុងការផ្សារភ្ជាប់ពង្រីករវាងថ្នាក់ជាតិ និងថ្នាក់ក្រោមជាតិ ដើម្បីរួមចំណែកក្នុងកិច្ចគាំពារបរិស្ថាន សំដៅសម្រេចបាននូវគោលដៅ «សុក្រិតកម្ម បរិស្ថានកិច្ច»។ មានប្រសាសន៍ បែបនេះ នៅក្នុងយុទ្ធនាថា ការកាត់បន្ថយការប្រើប្រាស់ប្លាស្ទិក នៅមុខសាលាខេត្តកំពង់ឆ្នាំង នាព្រឹកថ្ងៃទី៣០ ខែកញ្ញា ឆ្នាំ២០២៣។
ឯកឧត្តម បានបន្តថា យុទ្ធនាការថ្ងៃនេះ បានស្ដែងចេញនៅឆន្ទៈរបស់អាជ្ញាធរមូលដ្ឋានគ្រប់លំដាក់ថ្នាក់ អង្គភាព និងអ្នកពាក់ព័ន្ធ ជាពិសេសលោកគ្រូ អ្នកគ្រូ សិស្សានុសិស្ស និងប្រជាពលរដ្ឋខេត្តកំពង់ឆ្នាំង ក្នុងការរួមចំណែកកាត់បន្ថយការប្រើប្រាស់ប្លាស្ទិក ។ ក្នុងការអនុវត្តយុទ្ធសាស្ត្រចម្បងដំណាក់កាលទី១ ក្រសួងបរិស្ថានបានដាក់ចេញនូវការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះខ្ញុំមិនប្រើថង់ប្លាស្ទិកទេ» ដោយផ្ដោតលើការអនុវត្តគោលការណ៍ស្អាតផ្ដើមចេញពីសាលារៀននាំឲ្យផ្ទះស្អាតនិង សហគមន៍ស្អាត ។
នៅក្នុងឱកាសនោះ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានអំពាវនាវឲ្យមានការចូលរួមអនុវត្តពីគ្រប់ភាគីពាក់ព័ន្ធ ទាំងបរិស្ថានរដ្ឋ ស្ថាប័នរដ្ឋ វិស័យឯកជន និងសង្គមស៊ីវិល ព្រមទាំងប្រជាពលរដ្ឋទាំងអស់ ដើម្បីសម្រេចឲ្យបានជោគជ័យប្រកបដោយសមិទ្ធផលនិងប្រសិទ្ធភាពខ្ពស់ ដោយបានលើកទឹកចិត្ត និងសរសើរដល់សិស្ស នៅតាមសាលារៀនទាំងអស់ ឱ្យចូលរួមយុទ្ធនាការកាត់បន្ថយការប្រើប្រាស់ប្លាស្ទិក ដើម្បីគ្មានសារធាតុពុលដល់កម្ពុជា។
ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ក៏បានមានប្រសាសន៍ថា ប្រយុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះខ្ញុំមិនប្រើប្រាស់ថង់ប្លាស្ទិកទេ» មានសារៈសំខាន់ខ្លាំងណាស់ វាបានចូលរួមចំណែកកាត់បន្ថយការបំពុលបរិស្ថាននៅលើគោក និងក្នុងទឹក ព្រោះថា ប្លាស្ទិក វាមិនងាយនឹងរលាយនោះទេ វាអាចមានអាយុកាលរាប់រយឆ្នាំ ហើយបើយើងនៅតែនាំគ្នាបន្តការប្រើប្រាស់ប្លាស្ទិកធ្វើឲ្យប៉ះពាល់ដល់បរិស្ថានយ៉ាងធ្ងន់ធ្ងរ ហេតុនេះ សូមបងប្អូនប្រជាពលរដ្ឋចូលរួមកាត់បន្ថយការប្រើប្រាស់ថង់ប្លាស្ទិក ក្នុងមួយសប្តាហ៍ឱ្យបាន២ទៅ៣ថ្ងៃ។
គួរបញ្ជាក់ដែរថា យុទ្ធនាការកាត់បន្ថយការប្រើប្រាស់ប្លាស្ទិច នាថ្ងៃនេះ គឺរៀបចំដោយក្រសួងបរិស្ថានរដ្ឋបាលខេត្តកំពង់ឆ្នាំង ខេត្តពោធិ៍សាត់ ខេត្តកណ្ដាល និងកាកបាទក្រហមកម្ពុជាផងដែរ ដោយបានចុះអានុសារណៈយោគយល់គ្នាស្ដីពីយុទ្ធនាការកាត់បន្ថយការប្រើប្រាស់ប្លាស្ទិក។
ចែករំលែកព័តមាននេះ