កម្មករក្រុមហ៊ុនផលិតរថយន្តបង្កើនការកូដកម្ម បង្កជាពពកខ្មៅលើសេដ្ឋកិច្ចអាមេរិក
សហរដ្ឋអាមេរិក ៖ សហជីពកម្មករក្រុមហ៊ុនផលិតរថយន្តអាមេរិក ដែលហៅកាត់ថា UAW កំពុង
សហរដ្ឋអាមេរិក ៖ សហជីពកម្មករក្រុមហ៊ុនផលិតរថយន្តអាមេរិក ដែលហៅកាត់ថា UAW កំពុងពង្រីកកូដកម្មឈានដល់សប្តាហ៍ទី៣របស់ខ្លួន នៅក្រុមហ៊ុនផលិតរថយន្តធំជាងគេមួយចំនួនរបស់សហរដ្ឋអាមេរិក ដោយបានបញ្ជូនជម្លោះលើប្រាក់ឈ្នួល និងអត្ថប្រយោជន៍ការងារ។ នេះបើយោងតាមប្រភពពី BBC ចេញផ្សាយកាលពីថ្ងៃទី៣០ ខែកញ្ញា ឆ្នាំ២០២៣ កន្លងទៅ។
លោក Shawn Fain ប្រធានសហជីព UAW បានអះអាងថា កម្មករប្រមាណ ៧ពាន់នាក់បន្ថែមទៀត នៅរោងចក្រ Ford និង General Motors (GM) គ្រោងនឹងដើរចេញពីការងាររបស់ពួកគេ ខណៈកម្មករប្រហែល ១៨,០០០នាក់ បានធ្វើកូដកម្មរួចមកហើយ នៅក្នុងជម្លោះដែលក្លាយជាពពកខ្មៅដ៏អាក្រក់លើសេដ្ឋកិច្ចអាមេរិក។ ទោះយ៉ាងណា លោកបានបញ្ជាក់ថា សកម្មភាពកូដកម្មចុងក្រោយនេះ មិនបានកំណត់គោលដៅលើក្រុមហ៊ុន Stellantis នោះទេ ដោយសារតែការមើលឃើញពីសន្ទុះថ្មី នៅក្នុងកិច្ចពិភាក្សា។
ប្រធានាធិបតីអាមេរិក ចូ បៃដិន (Joe Biden) និងអតីតប្រធានាធិបតី ដូណាល់ ត្រាំ (Donald Trump) ដែលកំពុងតែឈរឈ្មោះ សម្រាប់ការបោះឆ្នោតឡើងវិញ បានធ្វើទស្សនកិច្ចនៅតំបន់ Detroit កាលពីពេលថ្មីៗនេះ ដើម្បីដោះស្រាយបញ្ហា ដែលកើតឡើងនៅពេលដែលភាពតានតឹងការងារនៅទូទាំងប្រទេស។
សហជីពបានបើកកិច្ចពិភាក្សា ដើម្បីស្វែងរកការដំឡើងប្រាក់ឈ្នួលប្រហែល៤០% ក្នុងរយៈពេល៤ឆ្នាំ និងបិទបញ្ចប់ការអនុវត្តផ្តល់ឱ្យអ្នកជួលថ្មី ដែលមានប្រាក់ខែទាប និងអត្ថប្រយោជន៍តិចជាងមុន ក្នុងចំណោមការទាមទារផ្សេងទៀត។ បណ្តាក្រុមហ៊ុនមានបញ្ហាបានរក្សាជំហរថា សំណើរបស់សហជីព នឹងប៉ះពាល់ដល់លទ្ធភាពវិនិយោគរបស់ពួកគេក្នុងរយៈពេលវែង ខណៈដែលពួកគេបានប្រឆាំងជាមួយការដំឡើងប្រាក់ខែប្រហែល ២០% និងសម្បទានមួយចំនួនផ្សេងទៀត។ ស្របពេលដែលកម្មករជាច្រើននាក់ ក៏បានបញ្ជាក់ពីគោលជំហររបស់ពួកគេថា បានត្រៀមខ្លួនរួចជាស្រេច សម្រាប់ការធ្វើកូដកម្មបន្តបន្ទាប់ទៀត។
សូមជម្រាបជូនថា សហជីពដែលតំណាងឱ្យកម្មករចំនួន១៤៦,០០០នាក់ នៅក្រុមហ៊ុនផលិតរថយន្តទាំង៣ខាងលើ បាននិងកំពុងដាក់សម្ពាធបន្តិចម្តងៗ លើក្រុមហ៊ុនផលិតរថយន្តឱ្យកម្មករធ្វើកូដកម្ម ចាប់តាំងពីកិច្ចសន្យាការងារបានផុតកំណត់កាលពីថ្ងៃទី១៤ ខែកញ្ញា ឆ្នាំ២០២៣ កន្លងទៅ៕
ចែករំលែកព័តមាននេះ